“Yosh chegarachilar” harbiy-vatanparvarlik musobaqasi oʻtkazildi

Yoshlarni milliy qadriyatlar va madaniyatga boʻlgan tahdidlar hamda yot gʻoyalardan asrash, har tomonlama rivojlangan, zamonaviy bilim va hunarlarni puxta egallagan, milliy anʼanalarga sadoqatli, dunyoqarashi keng, vatanparvar va barkamol qilib tarbiyalash maqsadida har yili “Yosh chegarachilar” harbiy-vatanparvarlik musobaqasi oʻtkazib kelinmoqda. Amudaryo tumanida ham shu kabi musobaqa tashkil qilindi.

Tumanning Doʻstlik mahallasi hududida joylashgan markaziy oʻyingohda oʻtkazilgan musobaqada Davlat xavfsizlik xizmati chegara qoʻshinlari masʼul ofitseri Otabek Madalimov, harbiy xizmatchilar Mirjahon Majidov, Rustam Vahobov hamda umumtaʼlim maktablari oʻquvchi yoshlari ishtirok etdilar.

Tadbirni Davlat xavfsizlik xizmati chegara qoʻshinlari masʼul ofitseri Otabek Madalimov kirish soʻzi bilan ochdi. U oʻz soʻzida harbiy musobaqalar yoshlarning kamolotiga har tomonlama yordam berishi, faqatgina jismoniy tayyorgarligini oshirib qolmasdan, intizom, jamoaviy ishlash, strategik fikrlash va ruhiy barqarorlik kabi muhim fazilatlarini ham rivojlantirishi xususida soʻz yuritdi.

Taʼkidlanganidek, ushbu musobaqa Oʻzbekiston Respublikasi Vazirlar Mahkamasining “Respublika chegaraoldi shahar va tumanlaridagi umumiy oʻrta taʼlim maktablarida tashkil etilgan “Yosh chegarachilar” klublari faoliyatini tartibga solish va qoʻllab-quvvatlash chora-tadbirlari toʻgʻrisida” qarori asosida tashkil etilgan boʻlib, mazkur qaror bu borada muhim dasturulamal boʻlib xizmat qilmoqda.

“Yosh chegarachilar” harbiy musobaqasining tuman bosqichida 22-, 59-, 48-, 36- va 15-sonli umumtaʼlim maktablari oʻquvchilaridan tashkil topgan jamoalar ishtirok etdilar.

Har bir jamoada jami umumtaʼlim maktablarining 10-11-sinf oʻquvchilaridan iborat 10 nafardan oʻquvchi yoshlar, jami 50 nafar ishtirokchi belgilangan shartlar asosida oʻzaro bellashdilar.

Xususan, musobaqa oʻquvchi yoshlardan iborat jamoalarning saf tayyorgarligi koʻrigi, harbiy varaqalar, albom, vimpel, jamoaning ramziy bayrogʻi va nomi yozilgan taxtacha koʻrigi, jamoalarning maxsus formasi koʻrigi, umumtaʼlim fanlari boʻyicha test sinovi, Kalashnikov avtomatini notoʻliq qismlarga ajratish va yigʻish, oʻgʻil bolalar 1000 metrga, qizlar 100 metrga yugurish, turnikda tortilish, azimut boʻyicha harakatlanish, granata uloqtirish, zaharlangan hududdan oʻtish, toʻsiqlar yoʻlagidan oʻtish, tibbiy yordam koʻrsatish, oʻq-dorilarni tashish, Kalashnikov avtomatidan oʻq otish, Kalashnikov avtomatining maketi koʻrigi kabi qiziqarli shartlar asosida boʻlib oʻtdi.

Aytish joizki, umumtaʼlim maktablarida tashkil etilgan “Yosh chegarachilar” klublari hamda harbiy-vatanparvarlik musobaqalari yoshlarning maʼnaviy-intellektual salohiyatini va dunyoqarashini yuksaltirish, ularni milliy qadriyat va anʼanalarga hurmat ruhida tarbiyalash, yoshlarda Amir Temur, Jaloliddin Manguberdi, Zahiriddin Muhammad Bobur, Najmiddin Kubro kabi buyuk siymolarning vatanparvarlik, mardlik va jasurlik tuygʻularini shakllantirish, Vatan himoyachisidek sharafli kasbga hurmat hissini uygʻotish, yoshlar oʻrtasida sogʻlom turmush tarzini targʻib qilish, yoshlarda chegaraoldi hududlarda yuz berishi mumkin boʻlgan yoki sodir boʻlgan favqulodda vaziyatlarda toʻgʻri harakatlanish va jabrlanganlarga yordam koʻrsatish koʻnikmalarini shakllantirish, ularning chidamliligini oshirish hamda har qanday qiyinchiliklarni matonat bilan yengishga oʻrgatishda muhim ahamiyat kasb etmoqda.

Murosasiz kechgan musobaqaning yakuniy natijalariga koʻra 59-sonli maktab jamoasi 3-oʻrinni, 15-sonli maktab jamoasi 2-oʻrinni, 48-sonli maktab jamoasi faxrli 1-oʻrinni egalladi.

Gʻoliblar va faol ishtirokchilar diplom hamda esdalik sovgʻalari bilan taqdirlandi.

Charos Arslonova, tuman hokimligining Axborot xizmati rahbari.