“Vatan tayanchi” otryadi aʼzolari oʻrtasida “Vatanparvarlik” harbiy-sport musobaqasining tuman bosqichi boʻlib oʻtdi

Harbiy-sport musobaqalari orqali yosh avlodni vatanparvarlik ruhida tarbiyalash, jismoniy va aqliy qobiliyatlarini rivojlantirish maqsadida mamlakatimizda umumtaʼlim maktablarining 10-11-sinf oʻquvchilari oʻrtasida “Vatanparvarlik” harbiy-sport musobaqalari anʼanaviy tarzda oʻtkazib kelinmoqda.

Bu musobaqalar nafaqat yoshlarning jismoniy va maʼnaviy tayyorgarligini oshirish, balki ularning harbiy sohaga boʻlgan qiziqishini kuchaytirishda ham muhim oʻrin tutadi. Ishtirokchilar mashgʻulotlar orqali birdamlik, masʼuliyat va fidoyilik kabi fazilatlarni shakllantirish imkoniga ega boʻladilar.

Yaqinda Amudaryo tumanining Doʻstlik mahallasidagi bolalar va oʻsmirlar markaziy oʻyingohida “Vatan tayanchi” otryadi aʼzolari oʻrtasida “Vatanparvarlik” harbiy-sport musobaqasining tuman bosqichi boʻlib oʻtdi. Unda saralash bosqichidan muvaffaqiyatli oʻtgan 6 jamoa gʻoliblik uchun bellashdi.

Tadbirni tuman hokimi oʻrinbosari Bahodir Yernazarov ochib, ishtirokchilarga muvaffaqiyat tiladi. Tadbirda tuman Mudofaa ishlari boʻlimi boshligʻi, mayor Shuhrat Mamatov yoshlarni vatanparvarlik ruhida tarbiyalashning ahamiyati va bu borada amalga oshirilayotgan ishlar xususida toʻxtaldi.

Musobaqa Nizomda belgilangan shartlar asosida tashkil etildi. Dastlab, jamoalar saf yurish va harbiy-vatanparvarlik qoʻshiqlari ijrosini namoyish qildi. Boʻlajak harbiylar shaxdam qadam tashlab, birgalikda ijro etgan qoʻshiqlari orqali intizom va jamoaviy harakat qilish mahoratlarini namoyish etishdi.

Keyingi sinov ­– harbiylashtirilgan estafetada jamoalar tezkorlik va tayyorgarlik darajasini sinovdan oʻtkazishdi. Ishtirokchilar harbiy qurolni notoʻliq qismlarga ajratish va yigʻish, gazga qarshi niqob kiyish hamda belgilangan yukni koʻtarib yugurish kabi vazifalarni bajarib, jismoniy chaqqonlik va taktik koʻnikmalarini namoyon qilishdi.

Bundan tashqari, musobaqa davomida yoshlar jangovar vaziyatlarda tez va aniq qaror qabul qilish, jismoniy mustahkamlikni saqlash va stress holatida samarali harakat qilish koʻnikmalariga ham ega boʻlishdi. Bu kabi mashgʻulotlar ularning kelajakda turli sinovlarga tayyor turishlariga xizmat qiladi.

Shundan soʻng, stadion boʻylab yugurish shartiga navbat berildi. Belgilangan masofani toʻxtovsiz bosib oʻtish talab etilgan bu sinov yoshlarning chidamliligi, tezligi va jismoniy bardoshini sinovdan oʻtkazdi.

Yakuniy bellashuv — arqon tortish shartida jamoalar kuch, hamjihatlik va oʻzaro ishonch asosida gʻoliblik uchun kurashdi. Bu sinov ishtirokchilarning jamoaviy hamkorlik va ruhiy mustahkamlik koʻnikmalarini oshirishga xizmat qildi.

Musobaqa yakunida gʻoliblar diplom va esdalik sovgʻalari bilan taqdirlandi. Tuman bosqichida 1-oʻrinni qoʻlga kiritgan jamoa keyingi bosqichda ishtirok etish huquqiga ega boʻldi. “Vatanparvarlik” harbiy-sport musobaqalari yoshlarni jismoniy chiniqtirish, harbiy kasbga qiziqishni kuchaytirish va vatan himoyachisi sifatida masʼuliyatini his etishiga muhim hissa qoʻshdi.

Shohzod Qurbonboyev.