49-sonli maktabgacha taʼlim tashkiloti binosi yangidan qurilib, foydalanishga topshirildi
Maktabgacha taʼlim bolalarning intellektual va jismoniy rivojlanishida muhim bosqich sanaladi. Shu bois, davlat tomonidan sohaga alohida eʼtibor qaratilib, maktabgacha taʼlim qamrovi va sifati yil sayin yaxshilanmoqda. 2017-yilda mamlakatimizda bolalarni maktabgacha taʼlim bilan qamrab olish darajasi 27 foizni tashkil etgan boʻlsa, bugungi kunga kelib bu koʻrsatkich 75 foizdan oshdi. Bu natijaga erishishda keng koʻlamli islohotlar, yangi bogʻchalar qurilishi va mavjud muassasalarni rekonstruktsiya qilish kabi tashabbuslar muhim rol oʻynadi.
Amudaryo tumanining Qangli ovuli hududidagi 49-sonli maktabgacha taʼlim tashkilotining binosi yangidan qurilib, 12-fevral kuni foydalanishga topshirilgani shu yoʻnalishdagi ishlarning yana bir yorqin namunasi boʻldi. Ushbu muassasaning avvalgi binosi 1975-yilda 60-oʻringa moʻljallab qurilgan boʻlib, yillar davomida taʼmirtalab ahvolga kelib qolgan edi. Natijada, bolajonlar yetarlicha sharoitga ega boʻlmagan joyda taʼlim-tarbiya olishga majbur boʻlib kelishayotgandi. Davlatimizning maktabgacha taʼlim sohasidagi izchil islohotlari samarasi oʻlaroq bu muammo oʻz yechimini topdi.
Muassasa binosining tantanali ochilish marosimida tuman hokimi oʻrinbosari, Oila va xotin-qizlar boʻlimi boshligʻi Goʻzal Saburova, tuman maktabgacha va maktab taʼlimi boʻlimi boshligʻi Yalgʻash Shomurotov, soha mutaxassislari, nuroniylar hamda mahalla faollari ishtirok etishdi.
Tadbirda soʻz olgan hokim oʻrinbosari Goʻzal Saburova keyingi yillarda maktabgacha taʼlim tizimiga qaratilayotgan eʼtibor, yangi taʼlim muassasalarini barpo etish, sohaga xususiy tadbirkorlarni jalb qilish orqali qamrov koʻrsatkichini yanada oshirish hamda bolalar uchun qulay sharoitlar yaratish borasida olib borilayotgan islohotlarga alohida toʻxtalib oʻtdi. Ushbu oʻzgarishlar nafaqat taʼlim sifatini oshirishi, balki ota-onalar uchun ham katta qulayliklar yaratishi qayd qilindi.
Muassasa binosini foydalanishga topshirish marosimi bolajonlarning ijodiy chiqishlari bilan davom etdi. Kichkinotoylar Vatan, baxtli bolalik haqida kuy-qoʻshiqlar ijro etib, mehmonlarni iliq qarshi olishdi. Kichkintoylarning quvonchga toʻla chehrasi, quvnoq raqs oʻyinlari bayramga oʻzgacha shukuh bagʻishladi.
Maʼlumot oʻrnida, 49-sonli maktabgacha taʼlim tashkilotining yangi binosi Investitsiya dasturi doirasida 3,5 milliard soʻm mablagʻ evaziga bunyod etildi. Qurilish ishlari “Jumurtov tex taʼmir servis” MChJ tomonidan amalga oshirilib, qisqa muddat ichida 90-oʻrinli zamonaviy 2 qavatli bino qad rostladi.
Ushbu taʼlim muassasasi mahalla aholisi uchun katta ahamiyatga ega. Avvalo, bu yerda bolalar uchun zamonaviy, xavfsiz va qulay sharoitlar yaratildi. Ular endilikda zamonaviy sharoitlarda taʼlim-tarbiya olish imkoniyatiga ega boʻldilar. Bundan tashqari, avval 60 bolani qamrab olgan ushbu muassasaning imkoniyatlari kengaytirilib, 90-oʻrinli zamonaviy binoga aylantirildi. Bu esa maktabgacha taʼlim qamrovini yanada oshirishga xizmat qiladi.
Oʻtgan yilning oʻzida tumanimizda 6 ta taʼlim sohasi obʼekti, jumladan, 3 ta maktab uchun qoʻshimcha bino va 3 ta MTT binosi foydalanishga topshirildi. Bu esa davlat tomonidan taʼlim tizimiga qaratilayotgan eʼtiborning amaliy isbotidir.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
