DXX chegara qoʻshinlariga qarashli harbiy qismda “Ochiq eshiklar kuni” oʻtkazildi

Har bir oʻzbek xonadonida oʻgʻil bola dunyoga kelsa askar tugʻildi, deya suyunchilar ulashilib, elga osh beriladi. Albatta, bu bejizga emas. Dastlab, oilada oʻgʻil bolaga haqiqiy himoyachi, ertangi kun ishonchi sifatida qaralib, tarbiya berilsa, keyinchalik esa jamiyatda, taʼlim maskanlarida yigitlarimizga chinakam vatan himoyachisi boʻlishlari uchun zamin yaratiladi. Bu borada yoshlarni vatanparvarlik ruhida tarbiyalash maqsadida tashkil qilinayotgan “ochiq eshiklar kuni” tadbirlarining ahamiyati katta. Ana shunday tadbirlardan biri yaqinda Amudaryo tumanida joylashgan Davlat xavfsizlik xizmati chegara qoʻshinlariga qarashli harbiy qismda oʻtkazildi.

Tadbirda Amudaryo tuman Mudofaa ishlari boʻlimi boshligʻi, mayor Shuhrat Mamatov, Nukus shahar Prokuraturasi xodimi Farid Ramazonov, DXX chegara qoʻshinlari masʼul ofitseri Sanjarbek Toshmatov, DXX chegara qoʻshinlari xodimi Mirjahon Majidov, shuningdek, tumanimizda muddatli harbiy xizmatni oʻtayotgan oddiy askarlar hamda tuman maktabgacha va maktab taʼlimi boʻlimiga qarashli umumtaʼlim maktablari oʻquvchilari qatnashdilar.

Tadbirning asosiy maqsadi yoshlarni vatanparvarlik ruhida kamol toptirish, ularda shu yurt taqdiriga va kelajagiga daxldorlik tuygʻusini uygʻotish hamda chinakam vatan himoyachilarini kashf etishdan iborat.

“Ochiq eshiklar kuni”da soʻzga chiqqan masʼullar maktab oʻquvchilariga ona yurt sarhadlarida sobit qadam boʻlib, oʻzi tugʻilib oʻsgan diyorning tinchligi va osoyishtaligini saqlash har bir farzandning muqaddas burchi ekanini alohida taʼkidlashdi. Shuningdek, vatan tinchligi yoʻlida fidokorona xizmat qilib, mardlarcha halok boʻlgan bir qator harbiylarimizning sharafli umr yoʻlini oʻquvchilarga ibrat sifatida keltirib oʻtdilar. Darhaqiqat, Milliy Armiyamizning qudratini oshirishda mard va jasur oʻgʻlonlarimizning oʻrni beqiyos.

Milliy armiya – har bir davlat mustaqilligining kafolati, Vatanning mustahkam qalqonidir. Yoshlar armiyada nafaqat harbiy bilim va koʻnikmalarga ega boʻladilar, balki jismonan baquvvat, irodali va vatanparvar insonlar sifatida shakllanadilar. Muddatli harbiy xizmat yoshlarga tartib-intizomli boʻlish, jamoa bilan ishlash va masʼuliyatni his qilishni oʻrgatadi.

Shu sababli ham vatan himoyachisi boʻlish har bir yigitning orzusi, desak mubolagʻa boʻlmaydi. Yigitlarimizda harbiy xizmatga chaqirilguniga qadar yigitlik burchi qay tarzda ado etiladi, harbiy texnikalardan qay tartibda foydalaniladi, umuman, Armiya hayoti qanday boʻladi, degan savollar boʻlishi tabiiy.

Tadbir davomida oʻquvchilar ushbu savollarga javoblar oldilar. Oʻsmirlar va yoshlar tadbir davomida muddatli harbiy xizmatni oʻtayotgan askarlarimizning yashash joylari, ularga yaratilgan sharoitlar bilan yaqindan tanishdilar. Shu bilan birga, ular harbiy texnikalardan, qurol-aslahalardan, xizmat otlari va xizmat itlaridan foydalanish, ular bilan qay tartibda ishlash boʻyicha maʼlumotga ega boʻldilar.

Tadbir ishtirokchilari harbiylardan oʻzlarini qiziqtirgan savollarga tegishlicha javoblar oldilar. Albatta, oʻtkazilayotgan bu kabi tadbirlar yurtimizda Jaloliddin Manguberdi izdoshlarining safini kengaytirishda, yoshlarimizning harbiy xizmatga, ona yurtga boʻlgan muhabbatini yanada oshirishda muhim ahamiyat kasb etadi.

Aziza Madrahimova