“MEHRJON” — HOSIL BAYRAMI OʻQUVChILAR QALBIDA ONA TABIATGA MEHR UYGʻOTDI
Aslida inson tabiatning eng oliy mahsuli. Uning yuksak aql-zakovati bilan goʻzalliklar yaratiladi, sogʻlom va baquvvat yashashi uchun ona yer bagʻrida bitmas-tuganmas rizq-nasiba yaratadi, oʻz mehnati bilan tabiatning boyligiga boylik qoʻshadi. Bu jihatdan mirishkor bobodehqonlarning mehnati eʼtibor va tahsinga loyiq. Har bir qarich yerdan dur undirib, turli noz-neʼmatlar yetishtirayotgan hazrati dehqonlarimiz uchun kuz – nafaqat sarbaland hosil xirmonlarini bunyod etish, balki xalqimizning rizq-nasibasi moʻl-koʻlligini xursandchilik bilan namoyish qilish ayyomi hamdir. “Mehrjon” – hosil bayrami ana shu jihati bilan barchamiz uchun aziz va qadrlidir.
Yaqinda Amudaryo tuman Maktabgacha va maktab taʼlimi tasarrufidagi 36-sonli umumtaʼlim maktabining 3-“B” sinf oʻquvchilari tomonidan tashkil etilgan “Mehrjon” – hosil bayrami tadbiri ham mirishkor va fidoyi bobodehqonlarimizning mehnatlarini qadrlash, oʻsib kelayotgan yosh avlod qalbida ona tabiatga mehr-muhabbat tuygʻularini yanada mustahkamlashga qaratilgani bilan muhim ahamiyat kasb etdi. Unda maktab pedagogika jamoasi, boshlangʻich sinflar oʻqituvchilari va oʻquvchilari, shuningdek, ota-onalar ishtirok etishdi.
Tadbirni maktab direktorining oʻquv ishlari boʻyicha oʻrinbosari Sarvar Qutlimurodov ochdi va barchani bayram bilan tabriklab, “Mehrjon” bayramining xalqimiz hayotida tutgan oʻrni va beqiyos katta ahamiyati xususida soʻz yuritdi. Ayniqsa, bobodehqonlarimiz yetishtirgan noz-neʼmatlarning qadriga yetish, ularning isrof qilmaslik zarurligini taʼkidladi.
Shundan soʻng, oʻquvchilar turli noz-neʼmatlar – poliz va sabzavot mahsulotlarini taʼriflovchi sheʼrlar aytib berishdi. Oʻquvchilar “Oltin kuz”, “Dehqonbobo”, “Paxtaoy” siymolarini namoyish etib, sheʼriy satrlar bilan taʼriflab berdilar. Ayniqsa, “Hozirjavob dehqon” sahna koʻrinishini mahorat bilan namoyish etgan oʻquvchilar Azizbek Murodboyev, Muhammaddin Norimmatov, Komronbek Ismoilov va Eldor Baxtiyorovlarning ijrolari barchaga manzur boʻldi.
Tadbir davomida maktab badiiy havaskorlik toʻgaragi aʼzolari tomonidan ijro etilgan “Olti xalfa” raqsi, masxarabozlik soʻz oʻyinlari, “Sholgʻom” ertagidan sahna koʻrinishlari, Dilnura Shomurodova, Guliraʼno Soatboyeva, Mohira Ozodboyeva, Madina Soatboyeva, Kumushbibi Ulugʻbekova hamda Odina Raimovalar ijrolaridagi dilrabo raqslar bayramga yanada fayz bagʻishladi.
“Mehrjon” – hosil bayrami oʻquvchi-yoshlar qalbida ona tabiatni sevish, uning bagʻrida yetishtirilgan noz-neʼmatlardan oqilonalik bilan, isrofgarchiliklarsiz foydalanish, bobodehqonlarimizning fidokorona mehnatlarini qadrlash tuygʻularini yanada mustahkamladi.
Robiya Yoʻldosheva.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
