ONA TABIATNI ASRAYLIK!

Qipchoq Davlat oʻrmon xoʻjaligida "Oʻrmon toʻgʻrisida”gi, "Tabiatni muhofaza qilish toʻgʻrisida”gi, Oʻzbekiston Respublikasi "Ekologik nazorat toʻgʻrisida”gi Qonunlarining bajarilishini taʼminlash borasida ijobiy ishlar amalga oshirilmoqda. Davlat oʻrmon xoʻjaliginining davlat oʻrmon fondi maydonlari jami 16469 gektar boʻlib, shundan oʻrmon bilan qoplangan maydonlari 3124 gektarni, madaniy oʻrmonzorlar 180 gektarni, siyrak oʻrmonzorlar 480,2, yaylovlar 2800, qumliklar 2576, boshqa yerlar esa 6878 gektarni tashkil qiladi. Oʻrmon xoʻjaligida Nazarxon va Qipchoq oʻrmon tuzilmalari mavjud boʻlib, oʻrmon fondi yerlari toʻrtta oʻrmon aylanmalariga biriktirilgan. Oʻrmon xoʻjaligining asosiy vazifalari mavjud oʻrmonlarni saqlash, qoʻriqlash, koʻpaytirish, madaniy oʻrmonlar barpo qilish, niholxonalarda mevali, dorivor va manzarali daraxt koʻchatlarini yetishtirishdan iborat. Oʻrmon xoʻjaligimizda "Qipchoq Davlat oʻrmon xoʻjaligining 2015-2017-yillarga moʻljallangan rivojlanish dasturi” asosida rejaviy ishlar amalga oshirilmoqda.

Dasturda joriy yilda 65 gektar maydonda madaniy oʻrmonzorlar bunyod etish, 2,3 gektarga mevali va manzarali daraxtlar urugʻidan, 0,7 gektar yerga qalamcha ekish, niholxonalarni tashkil etish hamda ushbu dastur asosida dorivor oʻsimliklar turkumiga kiradigan 30 gektar shirinmiya (boʻyon) plantatsiyasi, 1,4 gektar yerga chilonjiyda koʻchatlarini ekishga kirishildi. 10 gektar yerga oshqovoq va 5 gektar yerga boshqa qishloq xoʻjaligi ekinlaridan ekish, asalarichilik, parrandachilik va baliqchilik mahsulotlarini yetishtirish hamda 2015-yilda 100 tonna shirinmiya (boʻyontomir), 500 kilogramm isiriq kabi dorivor oʻsimliklar tayyorlash rejalashtirilmoqda. Yuqorida koʻrsatib oʻtilgan rejalarni amalga oshirish, yerlarni ekishga tayyorlash, texnika taʼminoti, yoqilgʻi-moylash manbalari zahirasini yaratish, tayyorlanadigan dorivor va ozuqabop oʻsimliklar xom-ashyosini sotish boʻyicha "Oʻzfarmsanoat” DAK korxonalari bilan kontraktatsiya shartnomalarini tuzish ishlari olib borildi.

Joriy yilning 1-aprel holatiga oʻrmon xoʻjaligining qum hududiga 38 gektar yerga saksovul koʻchatlari, niholxonalarga esa 14 turdagi mevali va manzarali daraxt urugʻlari ekildi. "Tabiatni muhofaza qilish toʻgʻrisida”gi, "Oʻrmon toʻgʻrisida”gi va "Ekologik nazorat toʻgʻrisida”gi Oʻzbekiston Respublikasi Qonunlari ijrosini taʼminlash maqsadida oʻquv muassasalari va aholi oʻrtasida keng tushuntirish-targʻibot ishlari olib borilganligi bois, tumanimizda yil sayin yashil daraxtzorlar maydoni kengayib bormoqda.

Oʻrmonzorlarga koʻp miqdorda ziyon yetkazadigan holat - bu oʻrmon yongʻini boʻlib, oʻsimlik va hayvonot dunyosi jiddiy zararlanadi. Oʻrmonlarda oʻrmon yongʻinining oldini olish va unga qarshi kurashni kuchaytirish maqsadida har yilning mart oyidan boshlab oʻrmon yongʻini xavfsizligi mavsumi boshlanadi. Tuman hokimining "Qipchoq oʻrmon xoʻjaligiga qarashli oʻrmonzorlarda yongʻinning oldini olish va unga qarshi kurashni kuchaytirish toʻgʻrisida”gi qarori asosida korxona-tashkilotlar, dehqon-fermer xoʻjaliklari, ovul, mahalla fuqarolar yigʻinlari rahbarlariga, shu hududda yashovchi aholiga mavjud oʻrmon daraxtlarini, oʻsimlik va hayvonot dunyosini muhofaza qilish, yongʻinga qarshi chora-tadbirlar koʻrish, tumanda ekologik muhitni yaxshilash boʻyicha koʻrsatmalar berildi.

Oʻrmon fondi yerlari bilan chegaradosh hududlarda dala atroflarini, ariq va zovurlarni tozalash paytida yongʻinning oldini olish maqsadida qamishzorlarga oʻt qoʻymaslik, aholi oʻrtasida targʻibot-tashviqot ishlarini olib borish hamda huquqni muhofaza qiluvchi organlar xodimlariga oʻrmon daraxtlarini oʻzboshimchalik bilan noqonuniy chopib, oʻgʻirlash holatlari, brokonerlar va oʻrmon qonunbuzarlariga nisbatan tegishli choralar koʻrish topshirildi.

Oʻtgan yili oʻrmon qoʻriqchilari tomonidan 6 ta oʻzboshimchalik bilan daraxt kesish holatlari aniqlanib, 4145,6 ming soʻmlik oʻsimlik dunyosiga keltirilgan zarar aybdorlardan undirildi.

2014-yil davomida 58 gektar yerdagi oʻrmonzorlar tabiiy tiklanishiga erishildi, oʻrmon zararkunandalariga qarshi kurash ishlari 168 gektar maydonda olib borildi.

Xulosa oʻrnida aytish kerakki, oʻrmon - milliy boyligimiz. Uni asrash esa burchimizdir.

R.DOSMANOV,

Qipchoq davlat oʻrmon xoʻjaligi direktori v.v.b.