Yashil maydonlar hududi kengaymoqda

Iqlim oʻzgarishi dunyo miqyosida jiddiy ekologik va ijtimoiy muammolarni keltirib chiqarmoqda. Uning salbiy oqibatlari — havo haroratining oshishi, choʻllanish, suv resurslarining tanqisligi va bioxilma-xillikning qisqarishi — barcha mamlakatlar, jumladan, Oʻzbekiston uchun ham jiddiy muammoga aylanmoqda. Bu muammolarni yumshatish uchun eng samarali va tabiiy yechimlardan biri daraxtzorlarni koʻpaytirishdir.

Daraxtlar tabiatning bebaho neʼmati boʻlib, ularning iqlim oʻzgarishini yumshatishda tutgan oʻrni beqiyosdir. Ular karbonat angidridni oʻzlashtirib, kislorod ishlab chiqaradi, bu esa havodagi issiqxona gazlari kontsentratsiyasini kamaytiradi. Shaharlar va qishloqlarda daraxtzorlar yozning issiq kunlarida havo haroratini moʻʼtadillashtiradi. Qolaversa, daraxtlar tuproq eroziyasining oldini oladi va suv resurslarini saqlashga yordam beradi. 

Shu sababli ham yurtimizda Prezidentimiz tashabbusi bilan bir necha yillardan beri “Yashil makon” umummilliy aktsiyasi oʻtkazilib, bu ishlarda jamoatchilik faol ishtirok etib kelmoqda. Mana shunday xayrli ishga hissa qoʻshish maqsadida Qoraqalpogʻiston Respublikasi “Nuroniy” jamgʻarmasi boshligʻi Tursunboy Abdujabbarov va jamgʻarmaning Amudaryo tumani boʻlimi rahbari Bekman Allaberganovlar bir guruh mahalla faollari bilan birgalikda tuman hokimligi binosi atrofida ajratilgan maxsus dalaga daraxt koʻchatlarini oʻtqazdilar.

Nuroniylar taʼkidlaganlaridek, daraxt ekish — ajdodlarimizdan meros boʻlgan azaliy qadriyatlardan biridir. Xalqimizning bayram va marosimlarida, ayniqsa, bahorda va erta kuzda koʻchat ekish ishlari anʼanaga aylangan boʻlib, buning zamirida nafaqat tabiatga hurmat, balki kelajak avlod uchun qulay muhit yaratish maqsadi ham mujassamdir. 

Chindan ham, ekologik muammolarni hal etishda yashil maydonlarning ahamiyati nihoyatda katta. Har yili bahor va kuz fasllarida “Yashil makon” umummilliy harakati doirasida mamlakatimiz boʻylab millionlab daraxtlar ekilib, ekologik barqarorlikni taʼminlashga hissa qoʻshilayotgani atrof-muhit havosining yaxshilashi va aholi salomatligining mustahkamlanishida muhim omil boʻlishi shubhasiz.

“Yashil makon” umummilliy harakatida ovul va mahallalar ahli ham hamjihatlikda faol ishtirok etmoqda. Daraxtlar ekish va bogʻlar barpo etish ishlariga Amudaryo tumanining Choykoʻl ovuli aholisi ham oʻz hissalarini qoʻshmoqda. Fuqarolar yigʻini maʼmuriyati, “Mahalla yettiligi” aʼzolari va ovul faollari Choykoʻl OFY binosi hududidagi maydonda hamjihatlik bilan mahalla bogʻini barpo qildilar. Avvalo, ekin maydoni begona oʻtlardan tozalanib, qondirib sugʻorildi. Yer tayyor boʻlgach, mahalla faollari koʻchat ekish ishlariga kirishdilar. Ularga tumandagi davlat organlari va jamoat tashkilotlari xodimlari ham yordamga keldi.

Fuqarolar yigʻini binosi atrofidagi maxsus ajratilgan maydonga mevali va manzarali daraxtlarning koʻchatlari tartib bilan ekilib, yangi bogʻ tashkil etildi. Bu jarayonda aholi bir tan-u bir jon boʻlib harakat qildi. Nuroniy otaxon va onaxonlar, ovul faollari va yoshlar oʻzining fidokorona mehnati bilan mahalla bogʻini yaratish ishlarida faol ishtirok etdilar. 

Shunisi eʼtiborliki, yangi bogʻga hududning iqlim sharoitlariga mos koʻchatlar tanlab ekildi. Bogʻning barqaror rivojlanishini taʼminlash, sugʻorish va parvarishlash ishlarini muntazam tashkil qilish maqsadida tajribali bogʻbonlar biriktirildi.

“Yashil makon” umummilliy harakati doirasida tumanning boshqa ovul va mahallalarida, mehnat jamoalarida ham bu kabi tadbirlar uzluksiz davom etmoqda. Bunday loyihalar nafaqat ekologik muhitni yaxshilash, balki jamiyatda birlashuv va ijtimoiy masʼuliyat tuygʻusini shakllantirishda ham muhim rol oʻynaydi. 

Choykoʻl ovul fuqarolar yigʻini maʼmuriy binosi yonida bogʻ barpo qilishdek ovul aholisining ushbu xayrli tashabbusi mahalla hududini yanada obod qilishga hissa qoʻshib, kelajak avlod uchun sogʻlom va qulay yashash muhitini yaratish yoʻlida muhim qadam boʻladi. 

Aziz yurtdoshlar! Har birimiz ushbu hayrli harakatda faol ishtirok etib, tabiatga boʻlgan masʼuliyatimizni amalda namoyon etish orqali uyimiz atrofida, koʻchamizda va ishxonamizda yashil maydonlarni koʻpaytirishga hissa qoʻshaylik!

Kuz fasli — daraxtlar koʻchatlari va qalamchalarini ekish uchun eng maqbul davr hisoblanadi. Bu vaqtda tabiat sukunatga ketar ekan, daraxtlar tuproqqa yaxshi moslashadi va kelgusi yil bahorida tez oʻsishni boshlaydi. Keling, har birimiz kamida oʻn tup daraxt koʻchatini ekaylik. Daraxtlar nafaqat tabiatning koʻrki, balki iqlim oʻzgarishining salbiy oqibatlariga qarshi samarali vosita ekanini unutmaylik. “Yashil makon” umummilliy harakatida faol ishtirok etib, jannatmakon diyorimizni obod va koʻkalamzor goʻshaga aylantiraylik!