TIBBIYoT XODIMLARI KUNI MUNOSABATI BILAN FIDOYI ShIFOKORLAR RAGʻBATLANTIRILDI

Mamlakatimizda sogʻlikni saqlash sohasiga qaratilayotgan eʼtibor va ragʻbat tufayli mustaqillik yillarida tizimda misli koʻrilmagan oʻzgarishlar amalga oshirildi. Aholiga tibbiy xizmat koʻrsatish sifati va samaradorligi yangi bosqichga koʻtarilib, barcha tuman va shaharlardagi tibbiyot muassasalari zamonaviy tibbiy asbob-uskunalar bilan jihozlandi. Sohaga xususiy sektor jalb qilinib, sogʻlom raqobat muhiti yaratildi. Shifokorlarning kasbiy faoliyatlarini toʻsiqlarsiz, samarali ado etishlari uchun zarur shart-sharoitlar yaratilib, ularga alohida hurmat va ehtirom koʻrsatilmoqda. Soha rivojiga oʻzlarining halol va fidoyi mehnatlari bilan munosib hissasini qoʻshib kelayotgan shifokorlarni moddiy va maʼnaviy ragʻbatlantirish choralari koʻrilayotgani aholiga yanada namunali tibbiy xizmat koʻrsatish imkonini bermoqda.

Maʼlumki, 2006-yil 12-sentyabrda qabul qilingan Oʻzbekiston Respublikasi “Tibbiyot xodimlari kunini belgilash toʻgʻrisida”gi Qonuniga muvofiq har yili anʼanaviy tarzda noyabr oyining ikkinchi yakshanbasi mamlakatimizda tibbiyot xodimlarining kasb bayrami sifatida keng nishonlanadi. Chunki shifokorlik kasbi oʻzining mashaqqati, masʼuliyati, inson hayoti va taqdirida tutgan muhim ahamiyati bilan xalqimiz uchun ham qadrlidir.

Butun mamlakatimizda boʻlgani kabi Amudaryo tumanida ham har yili tibbiyot xodimlari kuniga bagʻishlangan bayram tadbirlari oʻtkazilib, soha fidoyilari moddiy va maʼnaviy ragʻbatlantiriladi.

8-noyabr kuni tuman Tibbiyot birlashmasi qoshidagi Markaziy poliklinikaning majlislar zalida amudaryolik faxriy shifokorlar, tuman tibbiyot sohasi rivojiga munosib hissa qoʻshib kelayotgan sogʻlikni saqlash tizimi fidoyilari ishtirokida shifokorlarning kasb bayrami munosabati bilan tantanali tadbir tashkil etildi. Tadbirda el-yurt hurmatiga sazovor boʻlgan, halol va fidoyi tibbiyot xodimlariga hurmat-ehtirom koʻrsatildi.

Tadbirni Tibbiyot birlashmasi boshligʻi Faxriddin Abdullayev ochdi va olib bordi. U oʻz soʻzida tuman aholisining salomatligini saqlash, malakali va sifatli tibbiy xizmat koʻrsatish, ayniqsa, oʻsib kelayotgan yosh avlod salomatligini, onalik va bolalikni muhofaza etish borasida oʻz bilim va tajribasini, hatto butun hayotini soha rivojiga baxshida etib, fidoyilik namunalarini koʻrsatayotgan shifokorlar nomini alohida hurmat bilan tilga olib, bir guruh shifokorlarga Tibbiyot birlashmasi maʼmuriyati va kasaba uyushmasi tomonidan faxriy yorliqlar va qimmatbaho sovgʻalar topshirdi.

Darvoqe, muhtaram Prezidentimiz tibbiyot sohasi vakillari bilan uchrashuvlaridan birida shunday degan edilar: “Biz barcha sohalardan ham tibbiyot sohasiga alohida eʼtibor qaratdik. Chunki bosh maqsadimiz – xalq salomatligini saqlash va yanada mustahkamlash. Shuni unutmanglarki, xalq tibbiyot sohasiga qanchalik ishonsa, davlatga ham shunchalik ishonadi. Xalq koʻrsatilayotgan tibbiy xizmatdan rozi boʻlsa, davlatdan, bugungi yuritilayotgan siyosatdan ham rozi boʻladi”.

Tadbirda soʻzga chiqqan tibbiyot sohasi faxriylari va yosh, malakali shifokorlar Prezidentimizning ushbu soʻzlari oʻz faoliyatlarida dasturulamal vazifasini oʻtashini alohida qayd etishib, nafaqat aholiga namunali tibbiy xizmat koʻrsatish, balki ularning koʻrsatilayotgan tibbiy xizmatdan rozi boʻlishlariga erishish soha xodimlarining burchi ekanligini taʼkidladilar.

Bayram tadbiri davomida tumanimizda oʻtkaziladigan madaniy-maʼrifiy tadbirlarda faol ishtirok etib kelayotgan tibbiy hamshira va kichik tibbiy xodimlarga tuman madaniyat boʻlimi tomonidan tashakkurnomalar taqdim qilindi. Shundan soʻng, tuman madaniyat boʻlimi sanʼatkorlari tomonidan tayyorlangan kontsert dasturi namoyish etildi. Fidoyi shifokorlarni sharaflovchi kuy-qoʻshiqlar va jozibador raqslar barchaga xush kayfiyat bagʻishladi.

Ayni kunlarda Amudaryo tuman Tibbiyot birlashmasi tasarrufidagi Markaziy kasalxona boʻlimlarida, hududlardagi oilaviy poliklinikalar, oilaviy shifokorlik punktlari, xususiy tibbiyot muassasalarida tibbiyot xodimlari kuni arafasidagi bayramona tadbirlar davom etmoqda.

Biz ham xalq salomatligi yoʻlida fidoyilik bilan mehnat qilayotgan soha xodimlarini anʼanaviy kasb bayramlari bilan chin dildan, samimiy muborakbod etamiz hamda sharafli va mashaqqatli, ezgu ishlarida kuch-gʻayrat, muvaffaqiyatlar tilaymiz!

Robiya Yoʻldosheva.