Navoiy va Gulzor mahallalarida yashovchi aholi uchun chuqurlashtirilgan tibbiy koʻrik tashkil etildi

Aholi salomatligi davlatning rivojlanishi va jamiyatning taraqqiyoti uchun juda muhimdir. Sogʻlom jamiyat kuchli iqtisodiyot va barqaror rivojlanishning asosini tashkil etadi. Shu sababli ham Oʻzbekistonda sogʻliqni saqlash tizimini isloh qilish va aholi salomatligini yanada mustahkamlashga qaratilgan keng koʻlamli ishlar amalga oshirilmoqda. Bu islohotlar orqali koʻrsatilayotgan tibbiy xizmatlarning sifatini oshirish, aholining turmush darajasi va umr koʻrish davomiyligini yaxshilash koʻzda tutilgan.

Aholi salomatligini saqlashda esa tibbiy koʻriklar muhim ahamiyatga ega. Chunki ular kasalliklarni erta aniqlash va oldini olish imkonini beradi. Bundan tashqari, tibbiy koʻriklar jamoat salomatligini yaxshilash va oʻrtacha umr koʻrish davomiyligini uzaytirishga ham xizmat qiladi. Oʻzbekistonda sogʻliqni saqlash tizimida amalga oshirilayotgan islohotlar doirasida tibbiy koʻriklarning ahamiyati yanada ortmoqda.

Amudaryo tumani Tibbiyot birlashmasi tomonidan muntazam ravishda aholini chuqurlashtirilgan tibbiy koʻrikdan oʻtkazish ishlari amalga oshirib kelinmoqda. 27-sentyabr kuni tumanning Navoiy va Gulzor mahallalarida yashovchi aholi uchun ham chuqurlashtirilgan tibbiy koʻrik tashkil etildi. Ushbu tibbiy koʻrikda oilaviy shifokorlardan tashqari, tor doiradagi mutaxassis shifokorlari ham ishtirok etdi. LOR, jarroh, oftalmolog, kardiolog, endokrinolog, ginekolog, travmatolog, onkolog pediatrlar shular jumlasidandir. Bundan tashqari, aholi uchun klinik laborator tekshiruvlar, jumladan ultratovush tekshiruvi, rentgen va EKG kabi diagnostika xizmatlari ham koʻrsatildi.

Aytish jiozki, tumanning Navoiy nomli mahallasi hududida 3 ming 884 nafar aholi istiqomat qiladi. Shulardan 582 nafari tibbiy koʻrikdan oʻtkazildi va koʻrikdan oʻtganlarning 65 nafarida turli kasalliklar aniqlandi. Kasallik belgilari aniqlanganlarning 63 nafariga ambulator sharoitda, 2 nafariga esa statsionar sharoitda davolanish uchun yoʻllanma berildi.

Gulzor mahallasi hududida esa 4 ming 232 nafar aholi yashaydi. Ulardan 719 nafari tibbiy koʻrik davomida tekshiruvdan oʻtkazildi. Tibbiy koʻrikdan oʻtganlarning 71 nafarida kasallik aniqlandi va 70 nafari ambulator, 1 nafari esa statsionar davolanishga yoʻllanma oldi.

Tibbiy koʻrik davomida aholiga sogʻlom turmush tarziga oid qator zaruriy tavsiyalar ham berildi. Jumladan, sogʻlom turmush tarzi insonning umr davomiyligi va sifatini oshirishda muhim omil ekani, jismoniy faollik, toʻgʻri ovqatlanish, yetarli uyqu va stressni boshqarish sogʻlom turmush tarzining asosiy ustunlari ekani qayd qilindi. Kundalik jismoniy faollikni taʼminlash, masalan, piyoda yurish, zinapoyadan foydalanish, velosiped minish yoki sport bilan muntazam shugʻullanish kabi oddiy amaliyotlar inson salomatligini mustahkamlashda muhim ahamiyat kasb etishi taʼkidlandi. Shuningdek, toʻgʻri ovqatlanish, jumladan meva-sabzavotlarni koʻproq isteʼmol qilish, qayta ishlangan oziq-ovqatlardan tiyilish va toʻyimli, muvozanatli ovqatlanish tartibiga rioya qilish tavsiya etildi. Yetarli uyqu ham juda muhim ekani, kattalar uchun kunda kamida 7-9 soat uyqu zarurligi alohida qayd etildi. Bundan tashqari, tamaki va alkogoldan voz kechish, muntazam tibbiy koʻrikdan oʻtish ham sogʻlom turmush tarzining asosiy shartlaridan ekanligini alohida taʼkidlandi.

Shifokorlarning tibbiy koʻrsatmalari asosida, zarur hollarda bemorlarni bepul dori-darmonlar bilan taʼminlash choralari koʻrildi. Bu kabi tibbiy koʻriklar aholining salomatligini saqlash va kasalliklarning oldini olishda muhim ahamiyatga ega boʻlib, ularning muntazam oʻtkazilishi koʻplab kasalliklarning erta aniqlanishi va samarali davolanishiga yordam beradi. Shuningdek, bu turdagi tadbirlar aholining tibbiy madaniyatini yanada oshirishga va sogʻlom turmush tarzini qoʻllab-quvvatlashga xizmat qiladi.