Yoʻllarda harakatlanish xavfsizligini taʼminlash maqsadida reyd tadbirlari oʻtkazilmoqda

Yoʻl harakati qoidalariga rioya qilish, shubhasiz, har bir haydovchi va piyodaning asosiy majburiyatidir. Bu qoidalar harakat xavfsizligini taʼminlash, har bir fuqaroning hayoti va sogʻligʻini himoya qilish va transport oqimini muvofiqlashtirish uchun moʻljallangan boʻlib, ularga amal qilish orqali avvalo yoʻl-transport hodisalarining oldi olinadi. Statistik maʼlumotlarga koʻra, qoidalarga rioya qilinganda yoʻllarda sodir boʻladigan avariyalar soni sezilarli darajada kamayadi. Bu esa, oʻz navbatida, insonlarning hayoti va sogʻligʻini saqlashga yordam beradi.

Yoʻl harakati qoidalariga amal qilish transport vositalari toʻqnashuvining oldini oladi, bu esa transport vositalariga yetkaziladigan zararni kamaytiradi va haydovchilarga moliyaviy yoʻqotishlardan saqlanish imkonini beradi. Shuningdek, yoʻl harakati qoidalari jamiyatda tartib va intizomni mustahkamlaydi. Har bir haydovchi va piyoda qoidalarga rioya qilganda, bir-birlariga hurmati va masʼuliyati oshadi. Qolaversa, yoʻl harakati qoidalariga amal qilish tirbandliklarning oldini oladi. Bu esa, vaqtni tejash va iqtisodiy samaradorlikni oshirishga yordam beradi hamda transport vositalaridan toʻgʻri va samarali foydalanish orqali atmosferaga chiqariladigan zararli moddalar miqdori kamayadi.

Shunday ekan, har birimiz yoʻllarda xavfsizlikni taʼminlash uchun oʻz hissamizni qoʻshishimiz kerak.

Amudaryo tumani Ichki ishlar boʻlimining Yoʻl harakati xavfsizligi boʻlinmasi xodimlari yoʻl harakati ishtirokchilari tomonidan qoidalarga amal qilinishini oʻrganish maqsadida doimiy ravishda reyd tadbirlarini oʻtkazib keladi. Bu tadbirlarning asosiy maqsadi — yoʻl harakati qoidalarini buzish holatlarini aniqlash va oldini olish, shuningdek, haydovchilar va piyodalarning yoʻllardagi madaniyatini oshirishdir. Reydlar davomida xodimlar nafaqat qoidabuzarliklarni aniqlaydilar, balki yoʻl harakati qoidalarini tushuntirish ishlarini ham amalga oshiradilar. Bu esa, yoʻllarda xavfsizlikni taʼminlashga qaratilgan uzoq muddatli strategiyaning bir qismi hisoblanadi.

Bundan tashqari, reyd tadbirlari davomida yoʻl infratuzilmasi holati ham tekshirib boriladi. Bu esa yoʻllarning xavfsizlik talablariga javob berishini taʼminlashga yordam beradi. Masalan, yoʻl belgilari, chiziqlar va yoʻl harakatini tashkil etish vositalarining holati koʻrib chiqiladi va zarurat boʻlganda, ularni yangilash yoki taʼmirlash ishlari amalga oshiriladi.

Navbatdagi reyd tadbirlari yoʻl harakati xavfsizligi sohasidagi huquqbuzarliklarga imkon berayotgan omillarni aniqlash va ularni bartaraf etishga qaratildi. Bu orqali yoʻl harakati ishtirokchilarini yoʻl-transport hodisalaridan himoya qilish, huquqbuzarliklarni aniqlash va bartaraf qilish koʻzda tutilgan.

Yoʻl harakati xavfsizligi xodimlari tomonidan oʻtkaziladigan reyd tadbirlari davomida shuningdek, harakat ishtirokchilari tomonidan elektroskuter va shu kabi oʻziyurar vositalardan foydalanish qoidalariga rioya qilinishi alohida nazoratga olindi. Elektroskuterlar – bu zamonaviy yoʻl transportining ajralmas qismi boʻlib, ular qulayligi va ekologik tozaligi tufayli koʻplab foydalanuvchilarning eʼtiborini tortmoqda. Biroq, elektroskuterlarning ommalashuvi bilan birga, ularni boshqarish va yoʻl harakatida ishtirok etish bilan bogʻliq ayrim huquqbuzarliklar ham sodir etilmoqda.

Oʻzbekistonda elektroskuterlar uchun yoʻl harakati qoidalari mavjud boʻlib, ular yoʻl harakati xavfsizligini taʼminlash va yoʻl-transport hodisalarining oldini olish maqsadida ishlab chiqilgan. Mazkur qoidalar, jumladan, elektroskuterlarning tezligi, ularni boshqarishga ruxsat berilgan shaxslar, shuningdek, ularning yoʻl belgilari va svetoforlarga boʻlgan munosabatini tartibga soladi.

Elektroskuterlarni boshqarishda faqat belgilangan tezlik chegaralari doirasida harakatlanish, yoʻl belgilari va svetoforlarning ishoralariga amal qilish, tegishli xavfsizlik choralarini koʻrish, jumladan, himoya dubulgʻasi kiyish va tungi vaqtda yoritish moslamalaridan foydalanish kabi talablar mavjud.

Reyd tadbirlari davomida shu va boshqa qoidalarga amal qilmagan, shuningdek, tormoz tizimi, rul boshqaruvi, tovushli ishorasi, shuningdek sutkaning qorongʻi vaqtida yoki koʻrinish cheklangan vaziyatlarda nosoz fara chiroqlari yoki fonarlar hamda orqa fara chiroqlari ishlamaydigan elektroskuterlarni boshqarayotgan fuqarolar toʻxtatilib, tegishli choralar koʻrildi.

Transport vositalarini boshqarishda masʼuliyatli boʻlish va qoidalarga amal qilish muhim ahamiyatga ega. Yoʻl harakati xavfsizligi xodimlari tomonidan oʻtkazilayotgan reyd tadbirlari esa tegishli qoidalarga rioya qilinishini nazoratga olish va qoidabuzarliklarning oldini olishda muhim ahamiyat kasb etmoqda.

Anvar Yusupov, Amudaryo tumani IIB yoʻl-patrul xizmati boʻlinmasi boshligʻi