30-70 yosh va undan katta yoshdagi aholi vakillaridan sport sinovlarini qabul qilishga bagʻishlangan tadbir oʻtkazildi
Aholining jismoniy faolligini oshirish, harakatsizlik tufayli tobora keng tus olayotgan baʼzi kasalliklarning oldini olish, ayniqsa, yoshlarni, shu barobarida keksa avlod vakillarini sportga keng jalb etish maqsadida mamlakatimizda tizimli ishlar amalga oshirilmoqda. Oʻzbekiston Respublikasi Prezidentining 2021-yil 16-iyundagi "Aholining jismoniy tayyorgarlik darajasini baholash tizimini joriy etishning tashkiliy chora-tadbirlari toʻgʻrisida"gi hamda Vazirlar Mahkamasining 2022-yil 15-yanvardagi "Aholining jismoniy tayyorgarlik darajasini baholash boʻyicha sport sinovlarini tashkil etish va oʻtkazish toʻgʻrisida"gi Qarorlariga muvofiq Oʻzbekiston Respublikasi Sport vazirligi, Oila va xotin-qizlar qoʻmitasi hamda Oʻzbekiston Mahallalari uyushmasining qoʻshma Qarori asosida 2024-yildan boshlab har yilda bir marta Respublikada mavjud barcha mahallalardagi mahalla tizimi xodimlari hamda aholi vakillaridan "Jismoniy tayyorgarlik darajasi" sport sinovlari qabul qilib borish tizimining joriy etilgani oʻzining ilk ijobiy samaralarini bermoqda.
Ayniqsa, aholi vakillarining oʻzlariga maʼqul keladigan sport turlari bilan shugʻullanishlari, ularning fitnes klublarida, sport toʻgaraklarida sport bilan muntazam shugʻullanishlari uchun koʻmaklashish maqsadida qiziqarli sport oʻyinlarini tashkil etishga qaratilgan chora-tadbirlar esa xalqimizning sport-sogʻlomlashtirish mashgʻulotlarida ixtiyoriy tarzda qatnashishga boʻlgan intilishlarini ragʻbatlantirish imkonini bermoqda.
Bu borada Amudaryo tumani sport ishlari boʻlimi, Oila va xotin-qizlar boʻlimi hamda Oʻzbekiston mahallalari uyushmasi Amudaryo tuman boʻlimi tomonidan amalga oshirilayotgan chora-tadbirlar eʼtiborga munosib. Ayniqsa, "Salomatlik uchun 5000 qadam", "Tonggi piyoda yurish ", "Salomatlik marafonlari" kabi sport-sogʻlomlashtirish tadbirlari, "Biz oilaviy sportchilarmiz" musobaqalarida keng aholi vakillari ixtiyoriy ravishda, qiziqish bilan ishtirok etishib, oʻz salomatliklariga eʼtiborli boʻlayotganlari quvonarlidir.
Joriy yilning 20-avgust kuni Amudaryo tuman sport maktabi sport maydonchasida boʻlib oʻtgan 30-70 yosh va undan katta yoshdagi aholi vakillaridan sport sinovlarini qabul qilishga bagʻishlangan tadbir ham ishtirokchilarning jismoniy faolligini oshirishga qaratilgani bilan yorqin taassurotlarga boy boʻldi.
Avvalo shuni alohida qayd etish kerakki, "Jismoniy tayyorgarlik darajasi" sport sinovlari qabul qilish jarayoniga puxta tayyorgarlik koʻrilib, unda ixtiyoriy ravishda ishtirok etish istagini bildirgan aholi vakillariga "Jismoniy tayyorgarlik darajasi" koʻkrak nishoni taqdim etilishi toʻgʻrisida maʼlumotlar berildi. Koʻrilgan chora-tadbirlar va amalga oshirilgan targʻibot ishlari tufayli joriy yilning 20-avgust sanasida Amudaryo tumani sport maktabi sport maydonchasida boʻlib oʻtgan mazkur tadbir ishtirokchilarning yuqori darajadagi faolliklari asosida amalga oshirildi.
Tadbirda ishtirok etgan 30-70 yosh va undan yuqori yoshdagi tumanning barcha mahallalaridan kelgan erkak va ayol aholi vakillari "Jismoniy tayyorgarlik darajasi" sport sinovlari qabul qilish boʻyicha Nizomda belgilangan talablar darajasidagi mashqlarni ixtiyoriy ravishda bajarish asnosida oʻzlarining qay darajada jismoniy tayyorgarlikka ega ekanliklarini bilib oldilar.
Tadbir yakunida eng faol, shuningdek, jismoniy tayyorgarlik darajasi yuqori boʻlgan ishtirokchilar hamkor tashkilotlar tomonidan ragʻbatlantirildi.
Robiya Yoʻldosheva.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
