Манғит шаҳридаги замонавий умумий овқатланиш шохобчалари сони яна биттага кўпайди
Мамлакатимизда амалга оширилаётган ижтимоий-иқтисодий ислоҳотларнинг пировард натижаси аҳоли бандлигини таъминлаш, тадбиркорликни ривожлантириш, хусусан хизматлар кўрсатиш сифатини оширишга қаратилган. Бугунги кунда умумий овқатланиш шохобчалари – ресторан ва кафелар мамлакатимизда иқтисодиётнинг асосий тармоқларидан бирига айланган.
Амударё туманида инфратузилмани ривожлантириш, аҳолига, айниқса, туманимизга ташриф буюрувчи меҳмонлар ва туристларга сифатли хизмат кўрсатувчи меҳмонхоналар ва рестаронларни ташкил этиш учун бир қатор шароитлар яратилмоқда. Шу ўринда маҳаллий тадбиркорлар томонидан соҳа ривожи йўлида кўплаб янги кўнгилочар масканлар, умумий овқатланиш шохобчалари барпо этилмоқда. Туманимизнинг Олмазор маҳалласида яқинда иш фаолиятини бошлаган “Diamond” ресторани ҳам шулар жумласидандир.
Муассасанинг тантанали очилиш маросимида Амударё тумани ҳокими Собир Хўжаметов, ҳоким ўринбосарлари, сектор раҳбарлари, тадбиркорлар, нуронийлар ва аҳоли вакиллари иштирок этишди.
Тадбирни туман ҳокими Собир Хўжаметов табрик сўзи билан очиб, муассаса раҳбариятини самимий такриклади ва тадбиркорларнинг келгуси фаолиятидаги муваффақиятларга тилакдош бўлди.
Дарҳақиқат, Амударё тумани ўзига хос пазандачилик мактабига эга бўлиб, бир-биридан бетакрор таомлари ва таом тайёрлаш анъаналарининг турли-туманлиги билан ажралиб туради. Шунингдек, туманимизга ташриф буюрган меҳмонлар орасида Амударё балиқлари ва балиқ таомлари машҳур.
Мамлакатимизда умумий овқатланиш соҳасини ривожлантириш учун зарур ташкилий-ҳуқуқий шарт-шароитлар яратилган. Умумий овқатланиш йўналишида фаолият юритаётган тадбиркорларни қўллаб-қувватлаш, юқори малакали ошпазлар ва мутахассислар тайёрлашга ҳам катта эътибор берилмоқда. Буларнинг барчаси миллий пазандачиликнинг нуфузининг янада ошишига, уни кенг миқёсда оммалаштиришга замин яратади.
Тадбирда иштирок этган нуроний ҳожи отахонлар юртимизга тинчлик, қут-барака, тадбиркорларимизнинг ишларида ривож тилаб, дуо қилишди.
Шундан кейин меҳмонлар маросим учун махсус тайёрланган рамзий тасмани кесиб, ресторанга ташриф буюришди.
Маълумот ўрнида, “Diamond” умумий овқатланиш мажмуаси “Расулов Ойбек таомлари” оилавий корхонаси томонидан ташкил этилган. Мазкур оилавий корхона 2011 йилдан буён умумий овқатланиш соҳасида самарали фаолият юритади. Айниқса, корхона таркибидаги “Олмос” кафеси яратилган шароитлар, ўзига хос таомлари ва хизмат кўрсатиш сифати билан аҳоли орасида алоҳида эътироф этилган.
“Diamond” ресторанининг биринчи қавати миллий анъаналар асосида жиҳозланган бўлиб, бир вақтнинг ўзида 120 нафар мижозга хизмат кўрсатади. Айниқса, нуронийлар учун мосланган миллий супалар меҳмонлар эътиборини ўзига жалб қилади. Иккинчи қават эса замонавий-меъморий андозалар асосида ишлов берилган залдан иборат бўлиб, бу ўринда ҳар хил зиёфатлар ўтказиш имконияти мавжуд. Ресторан таомномасидан миллий таомлар, турк ва европача таомлар жой олган.
Таъкидлаш жоизки, “Diamond” ресторани “Расулов Ойбек таомлари” оилавий корхонасининг ўз маблағлари ҳамда “Ҳамкорбанк” акциядорлик тижорат банкидан 7 йил муддатга олинган 2 млрд сўм кредит маблағлари ҳисобидан барпо этилди. Мазкур ресторанда 30 нафар фуқаронинг ҳар хил вазифаларда бандлиги таъминланган.
Мамлакатимизда хизмат кўрсатиш соҳасида оилавий тадбиркорликни ривожлантиришга эътибор қаратилиши ва бу фаолиятни қўллаб-қувватлаш натижасида ҳудудларда мана шундай ресторан, кафе, меҳмонхона ва кўнгилочар масканлар сони кўпаймоқда. Бу каби замонавий шароитларга эга бўлган хизмат кўрсатиш муассасалари барча амударёликлар, туманимизга ташриф буюрган меҳмонлар ва хорижликларнинг дам олиб, ҳордиқ чиқаришлари учун айни муддаодир.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
