Нима деяпти?! –4-сонли мактабда давра суҳбати бўлди, деяпти...
“Камбағал бўлиб туғилиш айб эмас, аммо камбағал бўлиб дунёдан ўтиш айб” деган эди донолардан бири. Бу масалада фақат моддиятни тушуниш жоиз эмас. Чунки дунёда моддиятданда устунроқ турадиган тушунчалар бисёр. Шулардан бири – кучли маънавият, ақл-у заковатдир! Тасаввур қилингки, сиз кучли IQ кўрсатгичига эга ва шунга плюс равишда маънавияти бой шахссиз, бироқ, ҳашаматни ёқтирмайсиз. Қайсики даврада сизни оддий кийимингиз, жўнгина пойабзалингиз учун одамлар унчалик хушламади. Чунки у ердаги ҳаммани эгнида қайсидир бренд фирманинг кийими ва қимматбаҳо соат. Лекин улар сизни ўша бренднинг эгаси эканингизни билишмайди. Билишганида эса сизга нисбатан сохта такаллуфлар бошланади. Ҳа, фожиамиз эса бизнинг мана шундай – кўрган нарсамизга, гувоҳи бўлган вазиятимизга бир томонлама ёндашувимизда... Чинакам ақл ва фаросат эгасида эса вазиятни тўғри баҳолаш, моддият ва маънавиятни балансда ушлаб туриш деган кўникмалар бўлади.
Маънавият, илм-у маърифат эса инсонга ҳам ички, ҳам ташқи жиҳатдан зеб бера оладиган, сўзингизни ўткир, дастингизни узун қила оладиган кенг тушунча. Шу сабаб ҳам бугун давлатимиз раҳбари маънавият, илм олиш, китобхонлик деган сўзларга алоҳида урғу бериб, бу йўналишда қатор ислоҳотлар амалга оширмоқда.
Яқиндагина “Тараққиёт кўзгуси” газетаси таҳририятининг ижодий жамоаси Амударё туманининг 2-сектори ҳудудидаги 4-сонли мактабга ташриф буюрди. Ташриф газета таҳририятининг “Билимли ва маънавиятли ёшлар билан – учинчи Ренессанс сари” номли грант лойиҳаси доирасида ташкил этилди.
“Маънавият куни” муносабати билан бўлиб ўтган давра суҳбатида мактаб педагоглари, юқори синф ўқувчилари, туманимизнинг қалами ўткир шоири Одил Шомуродов, “Тараққиёт кўзгуси” газетаси мухбирлари Маҳмуд Шомуродов, Шоҳзод Қурбонбоев ҳамда ижодкор Азиза Мадраҳимовалар иштирок этдилар.
Давра суҳбатини мактабнинг ўқув ишлари бўйича директор ўринбосари Жайҳун Авезов кириш сўзи билан очиб берди. У ўз сўзида бугунги глобаллашув даврида IT ва ахборот технологияларининг ёшлар ҳаётида тутган ўрни, улардан тўғри фойдаланиш, маънавиятли инсоннинг фазилатлари ҳақида гапириб ўтди. Шундан кейин лойиҳа координатори Азиза Мадраҳимова сўзга чиқиб, грант лойиҳаси мақсад ва вазифалари, кутилаётган натижалар ва энг асосийси маънавият деган тушунчага кенг урғу берди. Келган меҳмонларни давра қатнашчиларига таништириб ўтди.
Давра суҳбати давомида шоир Одил Шомуродов ўзининг ёшлик шижоати, инсоний туйғулар тараннум этилган шеърларидан намуналар ўқиди.
Тингловчилар ижод намуналарини қарсаклар билан олқишлади.
Газета мухбири Шоҳзод Қурбонбоев эса маънавий иммунитет нима эканлиги, уни қандай бойитиш мумкинлиги ва жадид боболаримизнинг халқни маърифатли қилиш йўлида чеккан заҳматлари тўғрисида таъсирли фикрларини билдирди ва давра иштирокчиларининг фикрлари билан қизиқди. Замонавий фикрлаш ҳамда замонавий одам қандай бўлиши ҳақидаги саволга мактабнинг 11-синф ўқувчиси Маҳфуза Ўринбоева ўз ҳаёти мисолида жавоб берди.
Ҳа, маънавиятга илмни уйғунлаштира олган ёшларгина Учинчи Ренессансни барпо эта олади, ҳар қандай даврани бошқара олади. Биз мунтазам ўтказиб бораётган маънавият ва китобхонлик тарғиботи тадбирлари ҳам шуниси билан аҳамиятли. Зеро, тадбирда қатнашганларни лоақал тўрттасининг бошида “лампочка” ёнса, маънавий дунёқараши ижобий томонга ўзгарса шевамиз билан айтганда “калишинг тўзганига” ачинмайсан киши.
Азиза Мадраҳимова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
