Туман Санитария-эпидемиологик осойишталик ва жамоат саломатлиги бўлимида ўтказилган йиғилишда юқумли касалликларнинг олдини олиш бўйича кўрилаётган чоралар ҳолати таҳлил қилинди

Аҳоли орасида “ифлос қўллар” ҳамда “сариқ касаллиги” номи билан юритиладиган вирусли гепатит “А” касаллигига қарши тегишли тиббий-ташкилий тадбирларнинг амалга оширилиши ва болаларда вирусли гепатитни ташхислаш ва даволаш соҳасида эришилган муайян ютуқларга қарамай, ушбу касаллик бутун дунёда долзарблигича қолмоқда. Вирусли гепатит “А” касаллиги одамдан одамга ўтадиган юқумли касаллик бўлиб, ҳар қандай ёшдаги инсон организмида жигар тўқималари жароҳатланиши билан кечади. Мазкур касаллик кўпроқ кичик ёшдаги болаларда кузатилади.

Жорий йилнинг 6 июнь куни Амударё тумани Санитария-эпидемиологик осойишталик ва жамоат саломатлиги бўлимининг мажлислар залида туман аҳолиси орасида 2024 йилнинг 5 ойи давомида аниқланган юқумли касалликларнинг келиб чиқиш сабаблари ва бу касалликларнинг олдини олишга қаратилган чора-тадбирлар муҳокамасига бағишланган йиғилиш бўлиб ўтди.

Тадбирни туман санитария-эпидемиологик осойишталик ва жамоат саломатлиги бўлими бошлиғи вазифасини вақтинча бажарувчи Нигора Эшимова очди ва олиб борди. У ўз сўзида тумандаги аҳоли орасида аниқланган юқумли касаллик ҳолатлари ҳақида гапириб, шифокорларга юқумли касалликларни камайтиришга доир тегишли кўрсатмалар берди.

Шундан кейин жамоат саломатлиги бўлими шифокори Тўрамурод Бобониёзов сўзга чиқиб, бўлимнинг тасдиқланган йиллик режасига кўра, аҳоли орасида юқумли касалликларнинг олдини олишга қаратилган тарғибот-ташвиқот ишларини олиб боришни, айниқса вирусли гепатит “А” касаллиги ва ботулизм – овқатдан заҳарланиш касалликларидан сақланишга доир оммавий ахборот воситаларида кенг маълумот улашиш зарурлигини таъкидлади.

Шунингдек, тадбирда эпидемиолог шифокор Мирзабек Аманқулов томонидан туманда жорий йилнинг 5 ойи давомида болалар орасида вирусли гепатит “А” касаллиги бўйича эпидемиологик вазият яхши эмаслиги таъкидланди. У ўз сўзида касалликни камайтиришга доир зарур тавсияларини билдириб, вирусли гепатит “А” касаллигига қарши профилактик эмлаш чора-тадбирларини янада кучайтиришни таклиф қилди.

Ўтказилган ўрганишлар давомида 2023 йилнинг 12 ойи давомида қайд қилинган касалланишлар сонига нисабатан 2024 йилнинг 5 ойи давомида аниқланган касалланишлар сони юқори эканлиги маълум бўлган. Вирусли гепатит “А” касаллиги жорий йилнинг январь-май ойлари давомида 33 нафар фуқарода кузатилган. Шундан 6та ҳолат Манғит шаҳар ҳудудига тўғри келади. Шунингдек, ушбу касаллик билан Куюк кўпир, Қипчоқ, Назархон, Хитой овулларидаги аҳоли орасида ҳам касалланиш қайд этилган. Бўлим ходимлари томонидан барча касаллик ўчоқлари эпидемиологик назоратга олинган.

Вирусли гепатит “А” касаллиги билан касалланишлар ҳолати ёшга доир таҳлил қилинганда, 3-5 ёшдаги болалар орасида 3 нафар, 6-14 ёшли болалар орасида 9 нафарни ташкил этади. Жорий йилда Ижтимоий ҳимояга муҳтож ва эҳтиёжманд оилада тарбияланаётган 3-8 ёшли болалардан 50 нафари бепул, 23 нафар бола тўлов асосида касалликка қарши вакциналар билан эмланган.

Тадбирда таъкидланганидек, сувни қайнатмасдан ичиш, қўлларни совунлаб ювмасдан овқатланиш, мева-сабзавотларни ювмасдан истеъмол қилиш, рухсат этилмаган очиқ сув ҳавзалари, айниқса туриб қолган сув ҳавзаларида чўмилиш ҳамда маиший мулоқотда махсус қоидаларга амал қилмаслик инфекциянинг асосий юқиш омилларидан ҳисобланади.

Зарарли маҳсулотларнинг савдога чиқарилишининг олдини олиш мақсадида бўлимнинг санитария-гигиена лабораториясига олиб келинган озиқ-овқат маҳсулотлари белгиланган тартибда ходимлар томонидан доимий текшириб борилади. Шунингдек, овқатдан заҳарланиш ва ботулизм касаллигининг олдини олиш юзасидан режага кўра туман Санитария-эпидемилогик осойишталик ва жамоат саломатлиги бўлими ходимлари ҳамда “Мангит деҳқон бозори” ҳудудидаги санитария-ветеринария лабораторияси ходимлари томонидан аҳоли гавжум жойларда жойлашган озиқ-овқат савдо дўконларида санитария-профилактик тушунтириш ва тарғибот ишлари олиб бориляпти.

Туман Санитария-эпидемиологик осойишталик ва жамоат саломатлиги бўлимининг тегишли буйруқлари асосида жорий йилнинг 4 ойи давомида ноқонуний равишда уй шароитида тайёрланган озиқ-овқат маҳсулотлари савдоси билан шуғилланаётган 18 нафар фуқарога нисбатан Ўзбекистон Республикаси “Маъмурий жавобгарлик тўғрисида”ги Кодексининг тегишли моддаларига асосан жарима жазоси қўлланилди. Шунингдек, ботулизм касаллигининг олдини олиш мақсадида истеъмолга яроқсиз озиқ-овқат маҳсулотлари савдодан олиниб, тегишли тартибда йўқ қилинди.

Ҳар бир инсон кундалик турмуш тарзи ҳамда озиқ-овқат маҳсулотлари истеъмолида санитария-гигиена қоидалари ва меъёрларига амал қилиш орқали ўзини ва оиласини юқумли касалликлардан сақлаши лозим. Зеро, ўз саломатлигимизга ўзимиз масъул эканлимизни унутмайлик.

Минаввар Кашкорова, Мирзабек Аманкулов, Амударё тумани Санитария-эпидемиологик осойишталик ва жамоат саломатлиги бўлимининг олий тоифали шифокорлари.