Ўзбекистон Республикаси Қишлоқ хўжалиги вазири Иброҳим Абдураҳмонов Амударё туманига ташриф буюрди

Бугунги кунда мамлакатимизда муҳтарам Президентимиз ташаббуси билан қишлоқ хўжалиги соҳасини ва унинг тармоқларини янада ривожлантириш борасида тизимли ислоҳотлар амалга оширилмоқда.

Ўзбекистон Республикаси Қишлоқ хўжалиги вазири Иброҳим Абдураҳмонов соҳада олиб борилаётган ислоҳотлар ижросини ўрганиш, амалга оширилаётган ишлар ва уларнинг самараси билан танишиш мақсадида Амударё туманига ташриф буюрди.

Қишлоқ хўжалиги вазири ҳамда республика миқёсидаги аграр соҳа масъуллари, олимлар ташриф чоғида дастлаб Чойкўл овули ҳудудидаги “Чойкўл Дўстлик” фермер хўжалигидаги экин майдонига Хитойдан келтирилган уруғлик чигит экиш ишлари билан танишдилар. Вазир учрашувга йиғилган тумандаги қишлоқ хўжалиги соҳа мутасаддиларига пахта уруғини экиш технологияси, ҳосилдорликни ошириш, хитой уруғи ва уни экиш борасида тавсиялар берди.

Шунингдек, дала ўқув семинари ташкил этилиб, Хитойдан келтирилган чигитни ерга қадашдан тортиб, унга бериладиган ўғитлар, келгуси ҳосилдорлик, агротехник тадбирларга риоя қилишнинг аҳамияти ва моҳияти юзасидан шу ернинг ўзида амалиёт сифатида кўрсатиб, тушунтириб берилди.

Фермерлар семинарда иштирок этаётган олимларга Хитойдан келтирилган уруғлик чигитнинг ўзига хос хусусиятлари хусусида саволлар бердилар, олимлар томонидан тегишли тушунтиришлар берилди.

Ташриф мобайнида Қишлоқ хўжалиги вазири Иброҳим Абдураҳмонов ҳамда семинар иштирокчилари тумандаги томорқалардан унумли фойдаланиш борасида амалга оширилаётган ишлар, ёшларга ажратилган ер майдонларида олиб борилаётган экиш ишлари билан яқиндан танишди.

Шу ўринда таъкидлаш керакки, бугунги кунда юртимизда давлатимиз раҳбари ёшларни ҳар томонлама қўллаб-қувватлаш, улар учун муносиб шароит яратиш, эртанги кун эгаларини касбга йўналтириш ва бандлигини таъминлаш энг устувор аҳамиятга эга йўналишлардан бири сифатида алоҳида эътибор қаратмоқда.

Қишлоқ хўжалиги вазири туманда ёшлар бандлигини таъминлаш мақсадида ажратилган экин ер майдонларида олиб борилаётган ишлар билан ҳам яқиндан танишди. Маълумот ўрнида, семинар иштирокчилари борган Холимбег овули ҳудудидаги 70 нафар ишсиз ёшларга 15 сотихдан 30 сотихгача бўлган ер майдонлари қишлоқ хўжалиги маҳулотларини экиш ва ўзини ўзи банд қилиб, оила иқтисодига даромад олиб келишлари учун берилган. Шунингдек, ёшларнинг қишлоқ хўжалиги, деҳқончилик сир-синоатларини ўрганишлари, экин майдонидан яхши ҳосил олишлари ҳамда ҳосилдан юқори даромад олишлари учун ҳар 5 нафар ёшга 1 нафар фермер бириктирилган.

Фермерлар ёшларга берилган экин ер майдонларида экиш ишларини жадал суратларда ташкил этишлари учун техника ва уруғлик кўчатларни етказиб беришмоқда, қолаверса, билим, тажрибаларини аямасдан ҳар томонлама қўллаб-қувватламоқдалар.

Берилган имкониятдан самарали фойдаланиб, юқори даромад олишни мақсад қилган ёшлар ўзларига ажратиб берилган экин ер майдонларида турли сабзавот кўчатлари, хусусан, картошка, пиёз, карам каби маҳсулотлар ҳамда қовун, тарвуз каби полиз экинлари уруғларини ерга қадашмоқда. Масъуллар ёшларга ажратилган экин далаларида иш қизғин кетаёгани, кўзларида эртанги кунга қатъий ишонч акс этган фаол ва ишбилармон йигит-қизлар ердан унумли фойдаланиб, оиласи иқтисодини яхшилаш ва мамлакат тараққиётига ҳисса қўшишга бел боғлагинининг гувоҳи бўлдилар.

Вазир Иброҳим Абдураҳмонов ташриф мобайнида нафақат қишлоқ хўжалиги объектларида, балки аҳоли хонадонларида ҳам бўлиб, томорқасидан самарали фойдаланаётган юртдошларимиз билан суҳбатлашди, уларга деҳқончилик маданиятини янада юксалтириш, ҳар қарич ердан самарали фойдаланиш бўйича ўз тавсияларини берди.

Холимбег овули ҳудудида яшовчи ҳамюртимиз Эркин Қўшаев томорқасида ҳар хил қишлоқ хўжалиги маҳсулотларини етиштириб келаётган, кўп йиллик тажрибага эга, деҳқончилик сирларидан яхшигина хабардор бўлган томорқачилардан бири сифатида ҳурмат ва эътиборга сазовор.

Томорқасидаги ҳар бир қарич ердан унумли фойдаланадиган Эркин Қўшаев юқори эътибор ва алоҳида парвариш талаб қиладиган қулупнай, лимон, хурмо каби мевалар, картошка, пиёз, помидор, бодринг каби сабзавотлар экиб, йилига икки мартадан ҳосил олади ва оласига яхши даромад олиб келади. Шунингдек, деҳқончилик билан бир қаторда паррандачилик, қуёнчилик ҳамда чорвачиликни ҳам йўлга қўйган.

Маҳаллада истиқомат қилувчи яна бир ҳамюртимиз Шавкат Ўрозбоевнинг томорқаси билан танишиш чоғида меҳмонлар бу юртдошимизнинг ҳам анъанавий усулда қишлоқ хўжалиги экинларини етиштиришдан ташқари, 16 сотих майдонда иссиқхона ташкил этиб, ердан самарали фойдаланаётганига гувоҳ бўлишди. Томорқада помидор ва бодринг етиштириб, оилавий даромадини йил сайин ошириб бораётган деҳқон ердан самарали фойдаланиш бўйича кўп йиллик тажрибаси ва бу йилги режалари тўғрисида меҳмонларга маълумотлар берди.

Чарос Арслонова, туман ҳокимлигининг Ахборот хизмати раҳбари