Амударё туманида Қорақалпоғистон Республикаси Вазирлар Кенгаши Раиси иштирокида жорий йил ҳосили учун чигит экиш бўйича кўргазмали семинар бўлиб ўтди

Жорий йилнинг 30 март санасида Амударё туманида Қорақалпоғистон Республикаси Вазирлар Кенгаши Раиси Фарҳод Эрмонов иштирокида жорий йил ҳосили учун чигит экиш бўйича кўргазмали семинар бўлиб ўтди.

Туманнинг Чойкўл овулидаги "Чойкўл Дўстлик" фермер хўжалигида ташкил этилган кўргазмали семинарда республика ҳамда туман миқёсидаги қишлоқ хўжалиги соҳаси масъуллари иштирок этдилар. Семинар мобайнида жорий йилги пахта ҳосили режасини бажариш бўйича олдинда турган устувор вазифалар хусусида сўз юритилди.

Дастлаб Қорақалпоғистон Республикаси Вазирлар Кенгаши Раиси Фарҳод Эрмонов, туман ҳокими Собир Хўжаметов ҳамда барча семинар иштирокчилари илк чигит уруғларини яхши ният билан фермер хўжалиги даласига сепдилар. “Юсуф Эшон бобо” жомъе масжиди имоми Абдураҳмон ҳожи Матсапоев юртимиз тинч, осмонимиз мусаффо бўлиши, бу йилги пахта ҳосили мўл бўлиб, контрактация шартномаларини ортиғи билан бажариши учун барча фермерларга катта куч-ғайрат ва ҳамжиҳатлик тилаб дуога қўл очди.

Шундан сўнг семинарга йиғилган барча қишлоқ хўжалиги соҳаси масъуллари билан чигитни ўз вақтида экиш, зарурий менирал ўғитларни белгиланган миқдорда ва ўз вақтида бериш юзасидан тавсиялар берилди ҳамда олдинда турган вазифалар хусусида сўз юртитилди.

Хусусан, пахтанинг энг унумдор навлари билан бир қаторда чет элдан олиб келинадиган янги навларини экиш бўйича таклиф ҳамда тавсиялар берилди. Пахтадан яхши ҳосил олиш мақсадида агротехник тадбирларни ўз вақтида ўтказиш, сувни тежовчи технологиялардан фойдаланган ҳолда қишлоқ хўжалиги маҳсулотларини экиш бўйича амалга оширилиши лозим бўлган ишлар ҳақида маълумотлар берилди.

Маълумот ўрнида келтириш жоизки, Амударё туманида жорий йилги пахта ҳосили учун жами 352 та фермер хўжаликларидаги 13 900 гектар майдонга чигит экиш режалаштирилган. Ушбу майдонларда етиштирилиши кутилаётган пахта ҳосилини сотиш бўйича 6 та кластерлар билан шартномалар имзоланган.

5 апрелдан 15 апрелгача бўлган вақт оралиғида режалаштирилган экин майдонларида чигит экиш ишларини амалга ошириш учун 112 нафар аъзолардан иборат 65 та чигит экиш отрядлари тузилган. Мазкур отрядлар таркибига отряд раҳбари, кластерлар аграномлари, ер тузувчилар, агроинспекция ходимлари, уруғлик чигит етказиб беришга, минерал ўғит етказиб беришга масъул ходимлар бириктирилган. Отрядларга жами 3209та техникалар бириктирилган бўлиб, шундан жами ҳайдов тракторлари 145тани, жами ер текислагичлар 346тани, чигит экиш сеялкалари 150 донани ташкил этади.

Шунингдек, жами эртапишар навлар экиладиган ер майдонлари 12 минг 802 гектар бўлиб, шундан 8 минг 802 гектар майдонига “Султон” нави , 4000 гектар ер майдонига “Равнақ-2” нави экилиши режалаштирилган. 500 гектар ер майдонига янги навлар, 1598 гектар ер майдонига эса хорижий навлар экилиши белгиланган. Жорий йилги пахта ҳосили учун белгиланган жами уруғлик чигит 857,5 тонна бўлиб, 6 та ҳудудда чигит етказиб бериш шохобчаси ташкил этилган.

Шундан сўнг Қорақалпоғистон Республикаси Вазирлар Кенгаши Раиси Фарҳод Эрмонов ҳамда барча семинар иштирокчилари аҳоли томорқаларида амалга оширилаётган ишлар, қишлоқ хўжалигинининг турли йўналишлари билан шуғулланиб, оиласига яхши даромад олиб келётган хонадонлар билан яқиндан танишдилар.

Семинар давомида тумандаги овул ва маҳалла фуқаролар йиғинларида фаолият олиб бораётган “еттилик” масъулларига аҳоли хонадонларидаги томорқалардан унумли фойдаланиш бўйича тизимли ишларни ташкил этиш, қишлоқ хўжалигининг деҳқончилик, чорвачилик, паррандачилик, асаларичилик каби тармоқларини янада ривожлантириш бўйича тегишли топшириқлар берилди.

Чарос Арслонова, туман ҳокимлигининг Ахборот хизмати раҳбари.