Туманимизда минг нафарга яқин ёшларга ер берилди

Мамлакатимизда ёшларнинг мустақил ҳаётга қадам қўйишлари, ўз иқтидори ва салоҳиятини тўлиқ намоён этишлари учун шароитларни кенгайтириш, уларнинг бандлигига кўмаклашиш, доимий иш билан ҳамда муносиб даромад олишини таъминлаш борасида туб ислоҳотлар амалга оширилмоқда.

2024 йилнинг 23 февраль куни ўтказилган видеоселектор йиғилишида давлатимиз раҳбари томонидан ёшлар бандлигини таъминлаш мақсадида ишсиз ёшларга қишлоқ хўжалиги маҳсулотларини етиштириш учун ер ажратиш бўйича топшириқлар берилгани бу борада яна бир муҳим қадам бўлди.  Мазкур вазифалар ижросини таъминлаш юзасидан Амударё туманида ҳам самарали ишлар амалга оширилмоқда.

Туман ҳокими Собир Хўжаметов, ҳокимнинг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодир Камолов ҳамда ёшлар масалалари бўйича тегишли масъуллар, қишлоқ хўжалиги соҳаси мутасаддилари барча овул ва маҳаллалардаги ёшлар ҳамда фермерлар билан учрашиб, ҳудудлардаги ишсиз ёшларнинг бандлигини таъминлаш учун уларга ер беришдан кўзланган мақсад ва вазифалар хусусида тушунчалар берди.

Дастлаб туман ҳокими бошчилигидаги ишчи гуруҳ Қангли ҳамда Қипчоқ овулларидаги ёшлар билан учрашди. Учрашувда овул фуқаролар йиғин масъуллари, ҳоким ёрдамчилари, хотин-қизлар фаоллари, ёшлар етакчилари, жамоатчилик вакиллари ҳамда ёшлар иштирок этдилар.

Туман ҳокими Собир Хўжаметов сўнгги йилларда мамлакатимизда аҳоли, шу жумладан, ёшларнинг ижтимоий ҳимояга муҳтож, турмуш шароити оғир, ишсиз ва касб-ҳунарга эга бўлмаган, ҳуқуқий ва маънавий-психологик қўллаб-қувватлашга зарурати бўлган қатламига давлат томонидан манзилли кўмаклашиш бўйича мутлақо янгича тизим жорий қилинганлигини алоҳида таъкидлади.

Суҳбат чоғида фермерлар ҳар бири 5 нафардан ишсиз ёшларни оталиққа олиш, ер бериб, уларга иш ўргатиш, ердан яхши даромад олиш бўйича ўз тавсиялари ҳамда тажрибаларини бўлишиш таклифларини берди.

Шундан сўнг туман ҳокими бошчилигидаги ишчи гуруҳ Чойкўл, Тўлқин, Оқ олтин овулларидаги аҳоли фаоллари, фермерлар ҳамда ёшлар билан учрашдилар.

Туман ҳокими ўз сўзида давлатимиз томонидан ёшлар сиёсатига энг устувор йўналишларидан бири сифатида алоҳида эътибор қаратилаётгани, ёшларнинг жамиятдаги ўз ўрнини топишларида, ўз иқтидори ва қобилиятларини намоён этишларида, турли ёт ғоялари таъсирига тушиб қолишларининг олдини олишда барча бирдек масъул эканлигини таъкидлади.

Эътироф этиш жоизки, давлатимизнинг кучли ижтимоий сиёсатида ёшларга сифатли таълим бериш, касб-ҳунарга ўргатиш, интилишларини қўллаб-қувватлаш борасида тизимли ишлар амалга ошириб келинмоқда.

Хусусан, ҳар бир овул ва маҳаллада “Ёшлар бандлиги дастури” амалга оширилмоқда, “Беш ташаббус олимпиадаси”, “Маданият карвони” тадбирлари ва турли фестиваллар ўтказиб келинмоқда.

Президент фармони билан “Ўзбекистон – 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури қабул қилинди. Дастурда ёшлар муаммоларини ҳал қилиш ва салоҳиятини юзага чиқариш, уларни талаб юқори бўлган касб-ҳунарга ўқитиш орқали бандлигини таъминлаш бўйича кўплаб вазифалар илгари сурилди.

Туман ҳокими бошчилигидаги ишчи гуруҳ Жумуровул маҳалласи, Жумуртов шаҳарчаси, Бобур номли ҳамда Куюк кўпир овулларида бўлиб, овул ва маҳаллалар масъуллари, фермерлар ва ёшлар билан учрашдилар.

Учрашув мобайнида туман ҳокими Собир Хўжаметов муҳтарам Президентимиз томонидан жорий йилнинг 23 февраль санасида ўтказилган видеоселектр йиғилишида белгилаб берган ёшлар сиёсатига оид устувор вазифалар хусусида сўз юритди.

Таъкидланишича, ёшларни ишга жойлаштириш, замонавий касб-ҳунарлар ва тадбиркорликка жалб этиш мақсадида ёшларнинг бизнес билан шуғулланишига қўшимча имкониятлар яратилиб, оилавий тадбиркорлик дастури доирасида ажратилаётган кредитларнинг камида 40 фоизи шу мақсадларга йўналтирилади.

“Ёш тадбиркор” танловлари ўтказилиб, ғолиб бўлган бизнес лойиҳа ва ғоялар эгалари хорижий давлатларга малака оширишга юборилади. Ҳозирги кунда ёшларбоп истиқболли соҳа бу рақамли технологиялар. Шу боис Давлат дастурида “Ҳар бир маҳалладан икки нафар дастурчи” лойиҳаси белгиланган. Шунингдек, бу йил ахборот технологиялари соҳасида 70 минг ёшни банд қилиш режалаштирилган.

Аҳоли бандлигини таъминлашда қишлоқ хўжалигида имкониятлар кенг. Олдинги йилларда шу мақсадда 200 минг гектар пахта ва ғалла майдонлари қисқартирилиб, деҳқончилик учун аҳолига бўлиб берилган эди. Бу йил яна 60 минг 500 гектар ер ёшларга ажратиб берилиши ҳамда қишлоқ хўжалиги маҳсулотлари етиштиришга йўналтирилиши белгиланган.

Туман ҳокими ёшлар билан яқиндан мулоқот қилар экан, уларга яратилаётган имкониятлардан самарали фойдаланиш, ажратилаётган ер майдонларига яхши даромад келтирадиган маҳсулотлар экиш, уларни парваришлаш бўйича фермерлардан тажриба ўрганиш, фидойилик билан меҳнат қилиш зарурлиги, ўз устида ишлаш лозимлиги хусусида тавсия ҳамда таклифлар берди.

Чарос Арслонова, туман ҳокимлигининг Ахборот хизмати раҳбари.