Афғон уруши фахрийлари учун байрам тадбири ташкил этилди

15 феврал – Совет қўшинлари Афғонистондан олиб чиқилганига 35 йил тўлди. Ҳар йили ушбу сана арафасида бутун мамлакатимиз бўйлаб жойларда учрашувлар, давра суҳбатлари, хотира тадбирлари, байрам тантаналари мунтазам равишда ташкил этилиб, кенг миқёсда нишонланади.

 Ушбу сана муносабати билан туманимизда амударёлик байналмилал афғончи-жангчиларнинг учрашувлари, байрам тадбирлари ташкил этилди. Туманимиздаги афғон уруши қатнашувчилари Хотира майдонида “Мотамсаро она” ҳайкали пойига гулчамбарлар қўйдилар. Музей фаолияти билан танишиш мобайнида афғончи жангчилар бугунги дориломон кунларга шукроналик келтирдилар.

Шундан сўнг туман ҳокимлиги ташаббуси билан уруш фахрийлари учун “Шер” тўйхонасида ажойиб байрам тадбири ташкил этилди. Байрам тадбирида туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодир Камолов, туман “Инсон” ижтимоий хизматлар маркази бошлиғи Ғуломжон Дуйсенбоев, туман Мудофаа ишлари бўйича бўлим бошлиғи Шерзод Муродов ҳамда Қорақалпоғистон Республикаси фахрий байналмилал жангчилар уюшмасининг туман бўлими руҳбари Баҳодир Жуманиёзов бошчилигидаги бир гуруҳ фахрий жангчилар иштирок этдилар.

Байрам тадбирини туман ҳокими ўринбосари Нодир Камолов очиб берди. Нодир Камолов ўз сўзида Афғонистонда чорак асрча давом этган ўзаро урушларга барҳам бериш учун собиқ иттифоқ армияси сафида сафарбар қилинган, мураккаб шароитларда жанг-у жадалларда қатнашиб, омон қайтган фахрийлар учун 15 февраль – собиқ иттифоқ қўшинлари олиб чиқиб кетилган сана чинаккам байрам эканлигини таъкидлади ҳамда уларни байрам билан табриклади. Сана муносабати билан ҳар йили мамлакатимизда турли тадбирлар ўтказилиб, собиқ афғончиларга алоҳида ҳурмат-эътибор кўрсатилаётганини қайд этиб ўтди.

Тадбирда сўзга чиққанлар, мамлакатимизда ёшларни ватанпарварлик руҳида тарбиялаш, юртимиздаги тинчлик-осойишталикни қадрлаш, жангчи-фаҳрийларни қўллаб-қувватлаш ва ҳалок бўлган ватандошларимизнинг хотирасини абадийлаштиришга катта эътибор қаратилаётганини, Афғон урушида ҳалок бўлган фахрийларни хотирлаш ҳар биримизнинг инсоний бурчимиз эканлигини алоҳида таъкидладилар.

Маълумотларга кўра, Афғон урушида 65 минг нафар Ўзбекистон фуқаролари қатнашиб, 1500 нафардан кўпроғи ҳалок бўлган. Амударё туманидан ҳарбий ҳаракатларда иштирок қилган фуқароларнинг 13 нафари жангларда ҳалок бўлган, 278 нафари эса бугунги кунда тинч ва осойишта юртимизда умргузаронлик қилмоқда.

Байрам тадбирида Афғон уруши фахрийларига ташаккурномалар ҳамда эсдалик совғалари топширилди. Шунингдек, туман Маданият бўлими томонидан концерт дастури намойиш этилди. Бир-биридан ажойиб Ватан, она, тинчлик, шукроналик ҳақидаги шўх-шодон куй-қўшиқлар фахрийларимизга кўтаринки байрамона кайфият беғишлади.

Тадбир сўнгида Афғон уруши фахрийлари барча тадбир ташкилотчиларга, “Шер” тўйхонаси раҳбариятига ўз миннатдорчиликларини билдирдилар.

Чарос Арслонова, туман ҳокимлигининг Ахборот хизмати раҳбари.