АМУДАРЁДА БИР ГУРУҲ ҚИШЛОҚ ХЎЖАЛИГИ СОҲАСИ ХОДИМЛАРИ ТАҚДИРЛАНДИ
Амударё туманида жорий йилги қишлоқ ҳўжалиги соҳасида бир қанча ютуқларга эришилди. Йил давомида ғалла, пахта, сабзавот ва полиз экинларини етиштириш, боғдорчилик, чорва, балиқчилик ва паррандачилик йўналишларини ривожлантириш борасида самарали ишлар олиб борилиб, юқори натижаларга эришилди.
28 декабрь куни “Бешгужум” тўйхонасида очиқ ва тўкин дастурхон атрофида соҳа ходимлари учун байрам тадбири ташкил этилди. Тадбирда Қорақалпоғистон Республикаси Вазирлар Кенгаши, Қишлоқ хўжалиги вазирлигидан бир гуруҳ масъуллар, Амударё тумани ҳокими Собир Хўжаметов, секторлар раҳбарлари, ҳоким ўринбосарлари ҳамда тумандаги қишлоқ хўжалиги соҳаси мутасаддилари, ходимлари иштирок этишди.
Байрам тадбирида сўзга чиққан Қорақалпоғистон Республикаси Вазирлар Кенгаши, Қишлоқ хўжалиги вазирлигидан ташриф буюрган бир гуруҳ масъуллар ҳамда Амударё тумани ҳокими Собир Хўжаметов қишлоқ хўжалиги соҳасида фидокорона меҳнат қилаётган ходимларнинг йил давомидаги меҳнатини эътироф этиб ўтишди. Мамлакатимизнинг қишлоқ хўжалиги соҳасига қўшаётган ҳиссаси ва меҳнати учун тумандаги барча фермер ҳўжаликлари раҳбарлари, соҳа мутасаддиларига миннатдорчилик билдиришди. Шунингдек, барчасини кириб келаётган янги 2024 йил билан қутлаб, келгуси йилда янги ютуқ ва зафарлар тилашди.
Ундан ташқари, тадбир давомида қишлоқ хўжалиги йилида юқори кўрсаткичларга эришган 37 нафар илғор фермер ва деҳқонлар, томорқачиларга Ўзбекистон фермер, деҳқон ва томорқа ер эгалари Кенгаши томонидан берилган “Илғор фермер”, “Меҳнаткаш деҳқон”, “Намунали томорқачи” номли кўкрак нишонлари топширилди. Жорий йил давомида фидойилик кўрсатган 87 нафар қишлоқ хўжалиги ходимларига туман ҳокимлигининг ташаккурномалари, эсдалик совғалари берилди.
Таъкидланганидек, туманимиз ҳудудида жами 102 минг 119 гектар ер майдони бўлиб, шундан, 32 минг 506 гектари суғориладиган экин ерлар, 38 минг гектари бўз ерлар, 450 гектари боғлар, 39 гектари узумзорлар, 887 гектари тутзорларни ташкил қилади. Жами суғориладиган қишлоқ хўжалик ерлари 32 минг 920 гектарни ташкил қилади. Ҳозирги кунда туманимиз ҳудудида жами 45 минг 740 гектар майдонда 608 нафар фермер ва қишлоқ хўжалик корхоналари фаолият кўрсатмоқда.
2023 йилги деҳқончилик йилида тумандаги 361 та фермер хўжаликларининг жами 7000 гектар ер майдонига ғалла уруғлари экилган эди. Ушбу майдонлардан режадагидан ҳам мўл ҳосил етиштирилди. Экин майдонларининг 13 минг 900 гектарига кўкламда чигит экилган эди. Йил бошидан бери деҳқонларнинг улкан марраларни кўзлаб қилган фидойи меҳнатлари, ғўза парвариши даврида агротехник тадбирларнинг ўз вақтида сифатли адо этилгани пахта майдонларида мўл ҳосил тўпланишини таъминлади ва 47 минг тонна пахта хом ашёси етиштирилди.
Аҳолининг озиқ-овқат маҳсулотларига бўлган талабини қондиришда ғаллачиликнинг ўрни алоҳидадир. Шулар инобатга олинган ҳолда 2024 йилги ҳосил учун 5 минг 630 гектар майдонга ғалла экилди ва тўлиқ ниҳол ундириб олишга эришилди. Шунингдек, халқимизнинг эртаки сабзавот маҳсулотларига бўлган талабини тўлиқ қондириш мақсадида ҳосилдан бўшаган майдонларнинг 1777 гектарига совуққа чидамли пиёз ва саримсоқпиёз каби экинлар тўқсонбости усулида экилди.
Қишлоқ хўжалиги ходимларини тақдирлаш муносабати билан Янги йил байрами арафасида ўтказилган мазкур тадбирда туман Маданият бўлими ходимлари томонидан куй-қўшиқлар намойиш этилиб, барчага кўтаринки руҳ бахш этилди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
