44-сонли мактаб — маънавий-маърифий ишлар яхши йўлга қўйилган таълим масканларидан бири
Мактабда маънавий-ахлоқий тарбия ишларини ташкил қилиш, тарбиявий ишлар режасини ишлаб чиқиб, ижросини назорат қилиш, муассаса ўқувчилари, педагоглари иштирокидаги маънавий-маърифий тадбирларнинг сифатини ошириш мактаблар директорларининг маънавий-маърифий ишлар бўйича ўринбосарларининг зиммасидаги асосий вазифалардир. Шунингдек, миллий анъана ва қадриятлар, халқимизнинг бой маънавий мероси асосида ўқувчиларни ватанпарварлик руҳида тарбиялаш ишларини ташкил этиш, синф раҳбарларининг синфдан ва мактабдан ташқари тарбиявий фаолиятига раҳбарлик қилиш, ота-оналар билан яқин ҳамкорлик қилиш ҳам уларнинг ваколат доирасидаги масалалардир.
Қайсики таълим муассасасида бу вазифалар масъулият билан адо этилаётган бўлса, шу жамоада эришилаётган ютуқлар ҳам салмоқли бўлади.
Амударё телеканали таҳрарияти томонидан амалга оширилаётган “Юксак маънавиятли ва ахлоқли ёшлар – келажак пойдевори” номли грант лойиҳаси иш режасига мувофиқ тумандаги 44-сонли мактаб фаолияти билан танишиш борасида бунга яна бир бор амин бўлдик.
Мактаб маъмуриятининг аввало ўқитувчи кадрларни жой-жойига қўйиб, дарслар самарадорлигини қатъий назорат қилиб бораётгани, ўз устида ишлайдиган, таълимдаги инновацион педтехнологияларни пухта эгаллаб, ўз фаолиятида қўллай оладиган илғор ўқитувчиларни рағбатлантириб бораётгани ўзининг ижобий самараларини бераётир. Айниқса, мактаб директорининг маънавий-маърифий ишлар бўйича ўринбосари Руфат Дўсимбетов бу борада ёшлик ғайрат-шижоати билан ишлаб, ўқитувчилар, ўқувчилар орасида ҳурматга сазовор бўлаётир.
У 1989 йилда туманимизнинг Бобур номли овулида дунёга келди. Мактабни тамомлаб, Қорақалпоқ давлат университетининг география факультетига ўқишга кирди. Ўқитувчилик фаолиятини 2011 йилда 44-сонли мактабда география фани ўқитувчиси бўлиб ишлашдан бошлади.
2015-2016 йилларда мазкур мактаб “Камолот” етакчиси, 2018 йилда Ёшлар етакчиси бўлиб ишлади. 2019 йил сентябрдан бошлаб, мактабнинг маънавий-маърифий ишлар бўйича директор ўринбосари бўлиб ишлаб келмоқда.
У мазкур лавозимда иш бошлаган давридан бошлаб, жамоасида соғлом маънавий муҳит барқарор бўлишига интилди. Яхши натижаларга эришаётган муаллимларни рағбатлантириб, ўқувчиларни ҳам дарс машғулотларини пухта эгаллашга ундай олди, турли танловлар, билимлар синовларида юқори натижаларга эришган ўқувчиларни ўрнак қилиб кўрсатиш, орқали барча ўқувчиларни билим асосларини пухта эгаллашга ундади.
Жорий йилги “Ёш китобхон” кўрик-танловининг туман босқичида мактабнинг 11-синф ўқувчиси Райҳона Назарбоева иккинчи ўринни эгаллади, 8-синф ўқувчиси Райҳона Шомуродова шахмат бўйича Қорақалпоғистон, Ўзбекистон чемпионати, нуфузли халқаро мусобақалар ғолиби, совриндори, Фарзона Турсунбоева, Диёра Кенжабоева, Севинчой Гулимбетовалар спортнинг бадиий гимнастика тури бўйича ўтказилаётган кўпгина мусобақаларда муваффақиятли қатнашмоқда.
“Беш ташаббус олимпиадаси” мусобақаларининг жорий мавсумида ўғил болалар жамоаси волейбол бўйича туманда иккинчи ўринни эгаллади. Якунланган ўқув йилида муассасани 40 нафар ўқувчилар тугатишган бўлса, уларнинг 12 нафари турли олийгоҳлар талабалари бўлдилар.
Мактабнинг жисмоний тарбия фани ўқитувчиси Аъзамжон Нуруллаев туманда энг яхши спорт мураббийси сифатида тан олинган, беш нафар ўқитувчилар халқаро ва миллий сертификатларга эга.
Руфат Дўсимбетов уларнинг сафи кенгайиши, ўқувчиларнинг билим асосларини чуқур эгаллашлари учун доимо изланишда, интилишда.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
