Тўқсонбости экинлари – мўмай даромад манбаи

Деҳқончиликнинг тўқсонбости усули яхшигина даромад манбаи бўлиш билан бирга, аҳолининг эртаки сабзавот маҳсулотларига бўлган талабини қондириш имконини беради. Амударё туманида аҳолининг эртаки сабзавот маҳсулотларига бўлган талабини тўлиқ қондириш мақсадида ҳосилдан бўшаган майдонларга совуққа чидамли пиёз ва саримсоқпиёз каби экинларни тўқсонбости усулида экиш ишлари уюшқоқлик билан олиб борилмоқда.

1 ноябрь куни туманнинг Амир Темур номли овули ҳудудида фаолият юритувчи “Журъатбек-Султонбек” фермер хўжалигида пиёз, саримсоқпиёз экинларини боғ ичига – мевали дарахтлар қатор ораларига тўқсонбости усулида экиш бўйича семинар бўлиб ўтди.

Семинарда туман ҳокими Собир Хўжаметов, туман ҳокимининг қишлоқ ва сув хўжалиги масалалари бўйича ўринбосари Анвар Юлдашев, фермер хўжаликлари раислари, томорқачилар ва овул ҳамда маҳалла фуқаролар йиғинлари раислари, масъуллар иштирок этишди.

Тўқсонбости деганда қишнинг тўқсон куни назарда тутилган бўлиб, бу усулда кузда ҳам ерга экин экилиб, эрта баҳорда ҳосил олиш имкони пайдо бўлади. Натижада қиш ва баҳор ойларида ҳам бозорларимиз тўкин-сочин, нарх-наво барқарор бўлишига замин яратилади. Халқимизда “Тўқсонда суғорсанг, тўқсон ботмон ҳосил оласан”, деган нақл бежизга айтилмаган. Кузда экилиб, қор остида қолдирилган сабзавот экинлари уруғлари эрта кўкламда ердан жуда барвақт униб чиқиб, тез ривожланиши ҳисобига эрта ҳосил беради. Эрта баҳорда эса маҳсулотнинг бозори чаққон бўлиши сир эмас.

Ушбу масалага ҳукуматимиз томонидан ҳам алоҳида эътибор қаратилиб, аҳолининг соғлом овқатланиши, халқимиз дастурхонига йил давомида ҳар хил сабзавот маҳсулотларининг етиштирилиши учун бир қатор ишлар амалга оширилмоқда. Бу борада Амударё туманида ҳам ишлар уюшқоқлик билан, қизғин олиб борилмоқда.

Семинарда 2024 йил ҳосили учун фермер ва деҳқон хўжаликлари далаларига пиёз ва саримсоқпиёз экинларини боғ қатор орасига тўқсонбости усулида экишнинг аҳамияти ҳақида маълумотлар берилди.

Кейинги йилларда республикада туманларнинг ихтисослашуви, минтақаларнинг тупроқ-иқлим шароитлари ва сув билан таъминланиши ҳамда бошқа омилларни эътиборга олган ҳолда қишлоқ хўжалиги экинларини оқилона жойлаштиришга алоҳида эътибор бериб келинмоқда. Шундан келиб чиққан ҳолда бу йил туман бўйича жами 1777 гектар майдонга пиёз, саримсоқпиёз каби экинларни тўқсонбости усулида экиш режалаштирилган.

Қайд этиш керакки, тўқсонбости экинлари фермер ва деҳқонга даромад келтириши билан бирга, бозорларимизда нарх-наво барқарорлигини таъминлашда ҳам муҳим аҳамият касб этмоқда.

Туман ҳокимлиги Ахборот хизмати