ТЎЛҚИН ОВУЛИДА ТЎҚСОНБОСТИ ЭКИНЛАРИ ВА КЎЧАТ ЭКИШ ИШЛАРИ УЮШҚОҚЛИК БИЛАН АМАЛГА ОШИРИЛМОҚДА

Шу кунларда мамлакатимиз бўйлаб “Яшил макон” умуммиллий лойиҳаси доирасида кўчат экиш ишлари жадал суръатларда олиб борилмоқда. Амударё туманида ҳам лойиҳа доирасида дарахт ва бута кўчатларини экиш ишлари уюшқоқлик билан амалга оширилмоқда.

23 октябрь куни Тўлқин овулида ҳам лойиҳа доирасидаги турли манзарали ва мевали дарахтлар кўчатларини экиш ишлари бошлаб юборилди. Шу муносабат билан бўлиб ўтган тадбирда Амударё тумани ҳокими Собир Хўжаметов, Тўлқин овул фуқаролар йиғини раиси Рашид Абдуғалиев ҳамда бошқа масъуллар, “Нуронийлар” жамоатчилик Кенгаши раиси Бекман Аллаберганов, овул нуронийлари, кўчабошчилари, фаоллари иштирок этишди.

Тадбирда дастлаб фуқаролар йиғини биноси олдидан ажратилган 5 сотихга яқин ер майдонига пиёз уруғлари тўқсонбости усулида экилди. Шундан сўнг, 200 тупдан ортиқ мевали ва манзарали дарахтлар кўчатлари ўтқазилди.

Тадбир давомида 2023 йил кузида ва 2024 йил “Яшил макон” умуммиллий лойиҳаси доирасида Ўзбекистонда 200 миллион туп, туманимизда эса куз мавсуми давомида 488 минг туп кўчат экиш режалаштирилгани таъкидлаб ўтилди. Шунингдек, ҳудуд иқлими ниҳоятда иссиқ ва қурғоқ бўлгани сабабли дарахтлар ва яшил майдонлар барпо этилиши кераклиги, дарахтзорлар кўпайтирилиши натижасида атроф салқинлик ва кислород билан таъминланиши ва экологияни яхшилаши хусусида фикр юритилди.

Таъкидланганидек, туманимиз иқлим шароитида шумтол, оддий қайрағоч, катальпа, оқ акация, дала заранги, гледичия, япон сафораси каби манзарали дарахтлар, беҳи, ўрик, олма, нок, узум, олча, гилос каби мевали дарахтлар яхши ривожланади. Шунингдек, оқ ва кўк терак, жийда, тол, тут дарахтлари, аморфа, бирючина, сурия атиргули каби бутасимонлар, шарқ биотаси, виргин арчалари, қрим қарағайи ва чинорлар ҳам ҳудуд иқлимига тезда мослашади.

Тадбирда қишлоқ хўжалиги соҳаси мутахассислари шу каби маълумотлар билан бирга кўчатларни парваришлаш бўйича ҳам тавсиялар бериб ўтдилар. Тажрибали боғбонлар кўчатларни озиқлантириб туриш муҳим аҳамиятга эгалигини, ўғитлар баҳорда илдизларнинг интенсив ўсишидан олдин ёки кузда ернинг музламайдиган қатламига берилиши кераклигини, азотли ўғитларнинг ўз вақтида берилиши дарахтларнинг июнь-июль ойларида ҳам ўсишини таъминлашини, ўсимликларнинг жадал ўсиши пайтида фосфорли ва калийли ўғитлар тўйинтирилиши кераклиги, бу дарахтларнинг совуққа чидамлилигини оширишини тушунтириб, керакли маслаҳатларни бердилар.

Тадбир ҳудуддаги 31-сонли Мактабгача таълим ташкилотида давом эттирилди ва махсус ажратилган ҳудудга 100 тупга яқин кўчат экилди. Ташриф буюрган масъуллар ташкилот биносида кичкинтойлар учун яратилган шарт-шароитлар билан ҳам танишиб чиқди.

Шундан сўнг, тадбир иштирокчилари овулдаги Ўрозимбат Камолов, Гулмирза Ражабов, Озод Бовубековлар хонадонларига ташриф буюришди. Ушбу хонадонларнинг томорқа ерларидан ажратилган 2-3 сотих ерда тадбир иштирокчилари билан биргаликда тўқсонбости экинларидан пиёз экилди, ёзги экинлардан бўшаган ерларга экилган саримсоқпиёзнинг парвариши билан қизиқишди. Бу бўйича ҳам тажриба алмашилиб, фикр-мулоҳазалар билдирилди, керакли тавсиялар берилди.

“Яшил макон” умуммиллий лойиҳаси доирасидаги кўчат экиш ишлари 33-сонли мактабда давом эттирилиб, мевали ва манзарали дарахтлар кўчатлари экилди. Тадбир иштирокчилари таълим масканидаги куз-қиш мавсумига тайёргарлик ишлари, бошланғич синф ўқувчиларига тарқатилаётган бепул нонушталарни бериш тартиби ва синфлардаги давомат билан ҳам танишдилар.

 Шу куни овулдаги “Жумабеков Жўллибай” фермер хўжалигида ҳам “Яшил макон” умуммиллий лойиҳаси доирасида кўчат экиш ишларини амалга оширишга доир семинар ўтказилди. Ушбу семинарда туман ҳокими Собир Хўжаметов ҳамда секторлар раҳбарлари, ҳоким ўринбосарлари, мутасадди идора-ташкилотлар раҳбарлари, фуқаролар йиғини масъуллари қатнашишди. Тадбирда фермер хўжалик ҳудудидаги далалар четларига мевали ва манзарали дарахтлар кўчатларини экиш билан бирга қишлоқ хўжалиги мутахассислари томонидан уларни парваришлаш бўйича тегишли тавсиялар берилди.

Шундан сўнг, фуқаролар йиғини маъмурий биносида умумий ҳисобот йиғилиши ўтказилди. Йиғилишда 1-сектор ҳудудидаги овул ва маҳалла фуқаролар йиғинлари масъуллари қатнашишди. Туман ҳокими Собир Хўжаметов олиб борган ушбу йиғилишда фуқаролар йиғинлари масъулларининг ўтган давр мобайнидаги амалга оширилган ишлар юзасидан ҳисоботлари тингланди. Шунингдек, маҳалла еттилиги томонидан бажарилиши лозим бўлган ишлар, белгиланган вазифалар хусусида сўз юритилиб, келгусидаги режалар белгилаб олинди.

Тўлқин овулида бўлиб ўтган ушбу тадбирларда туманнинг барча ҳудудларида тўқсонбости экинларини етиштириш кўламини кенгайтириш, “Яшил макон” умуммиллий лойиҳаси доирасида кўчат экиш ишларини жадаллик билан амалга ошириш кабиларга чора-тадбирлар белгилаш юзасидан тегишли топшириқ ва вазифалар берилди.

О.Худойберганова.