АМУДАРЁДА А.ҲАИТОВ ИШТИРОКИДА КУЗГИ ЭКИНЛАРНИ ТЎҚСОНБОСТИ УСУЛИДА ЭКИШ БЎЙИЧА КЎРГАЗМАЛИ СЕМИНАР ЎТКАЗИЛДИ
Амударё туманига Ўзбекистон Фермер, деҳқон хўжаликлари ва томорқа ер эгалари Кенгаши раиси Актам Ҳаитов ташриф буюриб, туман ҳудудидаги фермер хўжаликлари далаларида кузги экинларни тўқсонбости усулида экиш бўйича амалга оширилаётган ишлар билан яқиндан танишди.
19 октябрь куни Тўлқин овулидаги “Илҳом Матлуба” фермер хўжалиги даласида кўргазмали семинар ташкил этилди. Семинарга ташриф буюрганлар ушбу хўжаликда ажратилган 3 гектар далада экилган тўқсонбости экинларининг парвариши билан қизиқди.
Семинарда Актам Ҳаитов тўқсонбости экинларни парваришлаш бўйича маслаҳат ва тавсиялар бериб ўтди. Шунингдек, мамлакатимиз аҳолисининг эртанги сабзавот маҳсулотларига бўлган талабини тўлиқ қондириш мақсадида ҳосилдан бўшаган майдонларга совуққа чидамли экинлардан пиёз, саримсоқпиёз ҳамда ноябрь-декабрь ойларида эса сабзи, ош лавлаги, кўкатлар, редиска ва карам кабиларни тўқсонбости усулида экиб, етиштириш муҳим аҳамиятга эгалигини таъкидлади. Ундан ташқари, озиқ-овқат хавфсизлигини таъминлаш учун ҳозирдан ҳаракат қилиш кераклигини айтиб, тўқсонбости экинларини ўз вақтида экиш, агротехник тадбирларни амалга ошириш юзасидан тегишли кўрсатмалар берди.
Таъкидлаш жоизки, туманда жорий йилда 2024 йил ҳосили учун пиёз ва саримсоқ пиёз экинларини тўқсонбости усулида экиш режаси фермер хўжаликлари томонидан 110 гектар, деҳқон хўжаликлари томонидан 766 гектар, томорқа ер эгалари томонидан 876 гектар қилиб белгиланган. Бугунги кунда туманимизнинг барча ҳудудларидаги хўжаликлар далаларида экинларни мазкур усулда экиш ишлари якунига етиб бормоқда.
Семинар иштирокчилари овули ҳудудидаги фермер хўжаликлари томонидан тўқсонбости усулида экилган экинлар ҳамда “Яшил макон” умуммиллий лойиҳаси доирасида дала четларида амалга оширилаётган кўчат экиш ишлари билан яқиндан танишдилар. Иштирокчилар ушбу ҳудудларда етиштирлаётган иқлимга мос бўлган манзарали ва мевали дарахтлар кўчатларини парваришлаш бўйича тажриба ўрганиб, ўз фикрларини билдириб ўтдилар.
Шундан сўнг, Актам Ҳаитов Чойкўл овули ҳудудидан ўтувчи катта Қипчоқ йўли бўйида “Яшил макон” умуммиллий лойиҳаси доирасида тумандаги 49та маҳалла фуқаролар йиғинлари бешлиги иштирокида ўтказилаётган кўчат экиш ишларида ҳам қатнашди.
Семинар Арнабўйи маҳалласи ҳудудидаги “Камалов Гулмирза” фермер хўжалиги далаларида давом эттирилди. Ушбу хўжаликда дала четларида шпаллер усулида узум экилган. Шунингдек, ҳудуддаги 5 гектар далада 30та фермер хўжаликлари бирлашган ҳолда тўқсонбости экинларини экиб парвариш қилишмоқда. Ушбу ишларни кўздан кечирган семинар иштирокчилари, қишлоқ хўжалиги ходимлари, тажрибали деҳқонлар тўқсонбости экинларини экиш ишларини тизимли ташкил қилиш ва маҳсулот етиштириш ҳажмларини ошириш бўйича фикр алмашишди.
Тадбир иштирокчилари Куюк кўпир овули ҳудудидаги “Ўрозалиев Хўжааҳмед” ҳамда Намуна маҳалласи ҳудудида “Музаффар Ешчанов” фермер хўжаликлари далаларда жадал давом этаётган экинларни тўқсонбости усулида экиш ишлари билан ҳам яқиндан танишдилар.
Туман ҳудуди бўйлаб Ўзбекистон Фермер, деҳқон хўжаликлари ва томорқа ер эгалари Кенгаши раиси Актам Ҳаитов иштирокида бўлиб ўтган мазкур семинарларда деҳқончиликнинг тўқсонбости усули яхшигина даромад манбаи бўлиш билан бирга, аҳолининг эртаки сабзавот маҳсулотларига бўлган талабини қондириш имконини бериши алоҳида таъкидланди. Шу сабабли агротехник тадбирларни ўз вақтида ўтказишни таъминлаш масалаларга жиддий эътибор қаратиш лозимлиги айтилиб, туманда тўқсонбости экинларни етиштириш ҳажмини ошириш бўйича тавсиялар, зарур маслаҳатлар берилди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
