“БАРКАМОЛ АВЛОД” БОЛАЛАР МАКТАБИДА “ОЧИҚ ЭШИКЛАР КУНИ” ТАДБИРИ БЎЛИБ ЎТДИ

Амударё туман Мактабгача ва мактаб таълими бўлими тасарруфидаги “Баркамол авлод” болалар мактаби том маънода ҳар томонлама етук ва баркамол ёшларни тарбиялашда ўз мавқеига эга таълим-тарбия масканларидан бири саналади. Айни пайтда мазкур муассасада 75 нафар ходим фаолият олиб боришади. Шулардан 65 нафари турли йўналишлар бўйича педагоглар, 10 нафари техник ходимлардир. Педагог-ходимларнинг 34 нафари олий, 7 нафари тугалланмаган олий, 26 нафари эса ўрта махсус маълумотга эга мутахассислардир.

Мактабда 69та тўгарак таркибидаги 139та гуруҳда 1668 нафар ўқувчи-ёшлар ўзлари қизиққан йўналишлардаги тўгарак машғулотларида қатнашиш орқали қобилият ва иқтидорларини ривожлантиришлари учун барча зарур шароитлар яратилган.

Асосий 7та, яъни маданият ва санъат, техника конструкторлик ва моделлаштириш, жисмоний тарбия ва спорт, ҳунармандчилик ва қўл меҳнати, туризм ва экология, олий таълим муассасалари ва мактаб таълимига тайёрлов, хорижий тиллар йўналишлари бўйича фаолият олиб борувчи 69та тўгаракда шуғулланаётган ўқувчи-ёшлар орасида турли мусобақалар, кўрик-танловлар ғолиб ва совриндорлари бор.

Жорий йилнинг 15 сентябрь санасида “Баркамол авлод” болалар мактабида “Буюк келажакка баркамол авлод билан” шиори остида “Очиқ эшиклар куни” тадбири бўлиб ўтди. Янги ўқув йили бошланаётгани муносабати билан ўтказилган “Очиқ эшиклар куни” байрам тадбирига Манғит шаҳридаги 40-, 82-, 76-, 31-сонли умумтаълим мактабларининг ўқувчи-ёшлари ҳамда маҳаллалардаги ота-оналар фаоллари таклиф этилди.

Тадбир иштирокчилари, аввало, мактаб ўқувчи-ёшларининг тасвирий санъат, либослар дизайни, робототехника ва конструкторлик, ёш дастурчи, бичиш-тикиш, юмшоқ ўйинчоқлар, тўқиш ва каштачилик, бадминтон, шахмат ва шашка, стол тенниси, ёш ўлкашунос ва сайёҳ, ёш эколог ва табиатшунос ҳамда умумтаълим фанлари бўйича тўгаракларда эгаллаган маҳорат, билим ва кўникмалари ҳақида ҳикоя қилувчи кўргазма билан яқиндан танишдилар. Албатта, ота-оналар ўз фарзандлари томонидан тайёрланган ва кўргазмага қўйилган буюмларни, уларнинг турли беллашув, кўрик-танлов ва мусобақаларда эришган ютуқлари ҳақида ҳикоя қилувчи совринларини фахрланиб томоша қилдилар.

Шундан сўнг, ўқувчи-ёшлар “Баркамол авлод” болалар мактабининг миллий рақс, эстрада-вокал тўгаракларида устозлари раҳбарлигида ўрганган куй-қўшиқлари ва рақсларидан иборат концерт дастурини намойиш этдилар. Концерт дастурининг миллий рақс йўналишидаги қисмида жажжи раққоса қизлар Хоразм халқ рақсларини, доира рақси, Андижон полькаси, шунингдек, сурхонча ҳамда фольклор рақсларини маҳорат билан ижро этиб, тадбир иштирокчиларининг олқишларига сазовор бўлдилар.

Эстарада-вокал тўгараги аъзолари томонидан ижро этилган Ватанни, онани, дўстлик ва тинчликни, мустақилликни мадҳ этувчи қўшиқлар уларнинг ота-оналарига завқ-шавқ бағишлади, ўз навбатида ота-оналар фарзандларининг иқтидорли, билимдон, ҳунарманд инсонлар бўлиб камол топаётганларидан мамнун эканликларини изҳор этдилар.

Робия ЙЎЛДОШЕВА