ТОШЁП ОВУЛИДА САЙЁР ҚАБУЛ ЎТКАЗИЛДИ

Мамлакатимизда инсон манфаатлари олий қадрият даражасига кўтарилди. Бугун барча давлат идоралари фаолиятида аҳолининг мурожаатлари билан ишлаш бўйича сифат жиҳатидан мутлақо янги тизим яратилди. Жойларда ўтаётган сайёр қабуллар халқнинг дардини эшитиш, уларнинг муаммоларини ҳал этишда, шак-шубҳасиз, кутилган натижаларни бермоқда. Зеро, давлатимиз раҳбари таъкидлаганидек, халқ давлат органларига эмас, балки давлат органлари халқимизга хизмат қилиши керак.

Бугунги кунда юртимизда халқ билан фаол ва очиқ мулоқот олиб бориш, аввало инсоннинг ҳуқуқ ҳамда манфаатларини таъминлаш орқали халқимизнинг фаровон, бахтли ҳаёт кечириши учун кўплаб саъй-ҳаракатлар амалга оширилмоқда.

Жумладан, Республикамиз бўйлаб ўтказилаётган сайёр қабуллар жараёнида ёрдамга муҳтож аҳолининг муаммолари ўрганилиб, кўплаб ижобий натижаларга эришилмоқда.

15 сентябр куни Амударё тумани 4-сектори ҳудудидаги Тошёп овулида сайёр қабул бўлиб ўтди. Унда Қорақалпоғистон Республикаси Солиқ бошқармаси бошлиғи Х.Бекчанов ҳамда масъуллар, маҳалла фаоллари иштирок этишди.

Сайёр қабулдан кўзланган мақсад маҳалладаги фуқароларнинг муаммоларини ўрганиш, ижобий ҳал этилишига кўмаклашиш, таклиф ҳамда тавсияларини тинглашдан иборатдир.

Сайёр қабулда маҳалла фуқаролари қатнашиб, сектор раҳбарига мавжуд муаммо ва камчиликлар билан мурожаат қилдилар.

Қабул давомида масъулларга фуқаролар томонидан 11та мурожаатлар келиб тушди. Шундан олий ўқув юртларида таҳсил олаётган фарзандларининг контракт пулларини тўлаб бериш масаласида 2та, ошхона жиҳозини олиб бериш масаласида 1та, моддий ёрдам пули олиш масаласида 1та, кўчада автомошиналар ҳаракатланиши учун йўл чиқариб бериш масаласида 1та, кўчасига тош-шағал ёйиб бериш масаласида 1та, иш билан таъминлаш бўйича 2та, кўприкни таъмирлаш масаласида 1та, ички кўчаларни кенгайтириш масаласида 1та, субсидия асосида тикув машинаси олиш бўйича 1та мурожаатлар келиб тушди.

Мурожаатларнинг 5таси жойида қаноатлантирилди, 1тасига асосли тушунчалар берилди. Қолган 5та мурожаатлар тегишли масала бўйича идора ва ташкилотларга юборилиб, ижроси назоратга олинди.

Шунингдек, сайёр қабул давомида маҳалладаги эҳтиёжманд 16та оилага субсидия асосида 39та қўй, 1та духовка ва 2та тикув машинаси берилди.

Йиғилишда мурожаатлар кўриб чиқилиши ва тез орада ҳал қилинишига келишиб олинди.

Жойларда ташкил қилинаётган бу каби сайёр қабуллар натижасида ҳукумат идоралари ва халқ ўртасидаги кўринмас девор олиб ташланиб, ёрдамга муҳтож фуқаролар ўз муаммоларини мутасадди ташкилот раҳбарларига тўсиқсиз етказишмоқда. Бу орқали кўплаб муаммолар ҳал қилиниб, халқ ва давлат ягона бир мақсад – ватан тараққиёти йўлида бирдек ҳаракат қилаётир.

Туман ҳокимлиги Ахборот хизмати