35-СОНЛИ МАКТАБДА ЯНГИ ЎҚУВ ЙИЛИГИА ЧОРЛОВЧИ ҚЎНҒИРОҚ ЖАРАНГЛАДИ
Бугун 4 сентябрь тонгини бутун мамлакатимиз бўйлаб умумтаълим мактаблари, касб-ҳунар билим юртлари ва олий таълим муассасалари ўқувчи ва талаба-ёшлари қалбларида оламча орзулар ва шодиёналик билан қарши олдилар. Қучоқлари турфа гулдасталарга тўлган ўқитувчи-мураббийлар қувончининг чегараси йўқ. Чунки бугундан эътиборан ўқитувчи-мураббийлар ва илмга чанқоқ ёшлар учун илм-у заковат йўлидаги орзулар сари дадил интилишлар бошланади.
Амударё туманининг 2-сектор ҳудудидаги 35-сонли умумтаълим мактаби туман мактабгача ва мактаб таълими бўлими тасарруфидаги намунали мактаблардан бири саналади. Бошланаётган 2023-2024 янги ўқув йилида мазкур мактабда 690 нафар ўқувчи таълим-тарбия олишади. ўз касбининг фидойиси бўлган 68 нафар тажрибали педагог ходимлар фаолият олиб борадиган ўқув муассасаси 2021 йилда инвестиция дастури доирасида реконструкция қилиниб, қўшимча 330 ўринли янги бино қурилган. Мактаб 2 та замонавий компьютер синфи 100 мб/с тезликдаги интернет билан таъминланган. Фан ўқитувчиларининг 4 нафари олий, 9 нафари 1-тоифага, 18 нафари 2-тоифага эга бўлиб, 2022-2023 ўқув йилида бир нафар ўқувчи Зулфия номидаги Давлат мукофоти соҳибаси бўлди. Спорт соҳасида қувонарли натижаларга эришилди. Хусусан, спортнинг минифутбол тури бўйича қизлар жамоаси Қорақалпоғистон Республикасида фахрли 1-ўринни қўлга киритишди. 6 нафар ўқувчи ОТМлар талабалари бўлишди.
Тадбирда бу ҳақда алоҳида эътироф этилиб, янги 2023-2024 ўқув йилида янада ғайрат-шижоат билан ишлаш, туман мактаблари рейтингида юқори поғоналарга эришиш бўйича режалар хусусида сўз юритилди. Тадбирда 2-сектор раҳбари, Амударё тумани прокурори А.Рўзметов, ўқувчи-ёшлар ва уларнинг ота-оналари иштирок этишди.
“Биринчи қўнғироқ” тадбирини мактаб директори Жасур Аҳмедов очди ва байрам иштирокчиларини янги ўқув йилининг бошланиши, билимлар куни байрами билан табриклади.
Тадбир давомида Холимбег овулининг фаоллари, намунали ўқувчи-ёшларнинг ота-оналари ҳам сўзга чиқишиб, фарзандларининг билимдон, жисмонан етук инсонлар бўлиб, вояга етишлари учун давлатимиз томонидан кўрсатилаётган эътибор ва ғамхўрликдан миннатдор эканликларини билдирдилар. Тадбирда жорий ўқув йилида 1-синфга қадам қўйган 58 нафар жажжи ўқувчи-болажонларга Президент совғаси – 12 номдаги ўқув қуроллари жамланмаси тантанали равишда топширилди.
Шундан сўнг ўқувчиларни илмга,интилувчанликка чорловчи қўнғироқ жаранглаб, мактабнинг барча синфхоналарида мустақиллик дарслари бошланди.
Мактаб бағри келажак авлоднинг бахтиёр, интилувчан вакиллари – ўқувчи-ёшларнинг нурли орзуларга тўла қадамларидан янада обод бўлди.
Робия ЙЎЛДОШЕВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
