БОЙОВУЛ МАҲАЛЛАСИДА ИСТИҚЛОЛ ШУКУҲИ

Истиқлолимизнинг 32 йиллик тантанаси яқинлашаётган айни кунларда мустақил юртимиз аро байрам шукуҳи кезмоқда. Халқимиз учун азиз ва қадрли бўлган Мустақиллик шундай улуғ неъматки, у ўзимиз ва ўзлигимизни, миллий анъана ва қадриятларимизни англаш имконини берди. У туфайли ўзлигимизга қайтиб, миллий давлатчилигимиз, бой тарихимиз ва маънавиятимиз, асосийси, ҳақ-ҳуқуқ ва қадр-қимматга эга бўлдик. Диёримизнинг ҳар бир гўшасидаги ўзгаришлар, бунёдкорликлар, ободлик ва фаровонликлар ҳаммаси мустақиллик берган имкониятлар мевасидир.

Байрам яқинлашаётган айни кунларда ҳар бир маҳалладаги хонадонлардан тортиб, таълим муассасалари, ташкилот ва корхоналарда Ватанимиз мустақиллигининг 32 йиллигини муносиб кутиб олинаётгани, бунда уларга “Янги ҳаёт учун, Янги Ўзбекистон учун!” шиори янада кўтаринкилик бахш этаётганини кўриш мумкин.

17 август куни Бойовул маҳалласидаги 16-сонли ихтисослаштирилган давлат умумтаълим мактаби ҳовлисида фуқаролар йиғини масъуллари ва кўчабошчи аёллар томонидан ташкил этилган ”Қадриятларимиз – бебаҳо бойлигимиз” номли байрам тадбири ўтказилди. Тадбирда туман ҳокими ўринбосари Гўзал Собурова ҳамда фуқаролар йиғини масъуллари, кўчабошчи ва фаол аёллар, маҳалла аҳолиси, 16-сонли мактабнинг ўқитувчи ва ўқувчилари иштирок этишди.

Тадбирга ташриф буюрганлар маҳаллада яшовчи ҳунармандларнинг қўл меҳнатлари намуналаридан ташкил қилинган кўргазмани томоша қилдилар. Кўргазмага қўйилган миллий ва замонавий аёллар либослари, қуроқ кўрпача ва ёстиқ жилдлари, юмшоқ ўйинчоқлар, рангли иплардан тўқилган турфа гуллар, уй-рўзғор буюмлари, темирчилик маҳсулотлари меҳмонларга ниҳоятда манзур бўлди.

Очиқ дастурхон атрофида ташкил этилган байрам тадбирини фуқаролар йиғини раиси Эркин Ҳусаинов очиб берди ва барчани мустақиллик байрами билан қизғин қутлади. Шунингдек, туман ҳокими ўринбосари Гўзал Собурова ва маҳалланинг ёши улуғ нуронийлари ҳам сўзга чиқиб, истиқлол берган неъматлар, имкониятлар ҳақида сўз юритдилар. Туманимизда бугун ёшларимиз барча шароитлар яратилган мактаб ва мактабгача таълим ташкилотларида таълим-тарбия олишаётгани, кўплаб оилалар ўзининг замонавий типдаги ҳовлиси, уй-жойи, юртимизда ишлаб чиқилган енгил автомашинасига эгалигини, маҳаллаларда тинчлик ва тотувлик ҳукмронлиги, хурсандчилик, тўй-тантана ва байрамлар авжидалиги, буларнинг барчаси, мустақилликнинг бизга берган улуғ неъмати эканлигини фахру-ифтихор билан сўзлаб ўтишди.

Шундан сўнг, 16-сонли мактаб ва маҳалланинг фаол аёллари иштирокида тайёрланган байрам томошаларига навбат берилди. Аёллар саҳна кўринишларида миллий урф-одатларимизга кўра қиз танлаш, совчи кутиш, қиз узатиш каби маросимларни чиройли тарзда ифодалаб беришди. Онахонлар ўз ижролари орқали азалдан келин-куёв танлаш ота-онанинг вазифаси ҳисоблангани, аввал бўлғуси келин танланиши, бунда ёшларнинг юлдузи тўғри келиш-келмаслиги, қизнинг насл-насаби суриштирилиши, қиз топилгач, унинг уйига совчиликка борилишини, тўй маросимларида кекса ёшли, баъмани нуронийлар иштироки, уларнинг бош бўлиши зарур ва ўта муҳим ҳисобланишини кўрсатиб беришди.

Кайвони, гапга чечан онахонлар ижросидаги “Ёр-ёр” ва “Келин салом”лар, асрлар оша давом этиб келаётган удумларимиз ҳам ёшларга ниҳоятда манзур бўлди. Дуторчи қиз Шоҳинур Мадаминова чалган куй-наволар, ўқувчи-қизларнинг дилрабо рақслари байрам иштирокчиларига хуш кайфият улашди.

Меҳмонлар байрам дастурхонидаги турли ноз-неъматлар, миллий таомлардан татиб, шундай дориломон кунларга етказганига шукроналар айтишди, мустақиллигимиз абадий бўлишини тилаб, дуолар қилишди.

Қизиқарли ўтган тадбир бутун маҳалла аҳлига байрамона руҳ, кўтаринкилик бахш этди.

О.Худойберганова.