ЖИНОЯТЧИЛИК, ҲУҚУҚБУЗАРЛИКЛАРГА ҚАРШИ КУРАШ САМАРАДОРЛИГИНИ ОШИРИШГА ОИД ЙИҒИЛИШ ЎТКАЗИЛДИ

Мамлакатимизда ҳуқуқбузарликлар, жиноятларга қарши кураш самарадорлигига эришиш, оилаларда соғлом турмуш тарзи барқарорлигини таъминлаш мақсадида маҳаллалар “қизил”, “сариқ”, “яшил” тоифаларга ажратилиб, энг оғир ва низоли вазиятларнинг ҳуқуқбузарликка айланишига йўл қўймаслик учун уларни маҳаллаларнинг ўзидаёқ бартараф этиш ишлари олиб борилмоқда, аҳолининг ижтимоий ҳолатини яхшилаш борасида тизимли ишлар, профилактик чор-тадбирлар амалга оширилмоқда. Ҳуқуқбузарликларга қарши “маҳаллабай” тарзда курашиш мақсадида “қизил”, “яшил”, “сариқ” тоифаларга ажратиш – манзилли профилактикани амалга ошириш имконини бермоқда.

Амударё тумани ҳокимлигининг мажлислар залида маҳалла фуқаролар йиғинлари раислари, хотин-қизлар фаоллари, ёшлар етакчилари иштирокида “қизил”, “сариқ”, тоифага киритилган маҳаллаларда ҳуқуқбузарликлар, майда ўғирликлар содир бўлишининг олдини олиш ва “яшил” тоифага ўтказишга эришиш вазифаларини муҳокама қилиш мақсадида йиғилиш бўлиб ўтди.

Йиғилишда Ўзбекистон Республикаси Миллий гвардиясининг Қорақалпоғистон Республикаси Қўриқлаш бошқармаси, 4-сектор масъуллари иштирок этдилар.

Йиғилишни 4-сектор бошлиғи, туман солиқ қўмитаси раиси Айдос Сейитов очди ва олиб борди. У ўз сўзида 4-сектор ҳудудидаги “қизил”, “сариқ” тоифадаги маҳаллаларда жиноятчилик, ҳуқуқбузарликлар содир этилишининг олдини олиш борасида олиб борилаётган ишларга кенг тўхталди. Бу борада ҳамкор ташкилотлар Ички ишлар, Миллий гвардия, прокуратура, Қўриқлаш хизмати ходимларининг биргаликда олиб бораётган профилактик ишларини янада кучайтириш, низоли оилаларнинг аҳил яшаб кетишига эришиш, қўни-қўшни, маҳалладошларнинг ўзаро аҳил-иноқ яшашини таъминлаш, бунда кўп асрлик миллий қадриятларимизни, урф-одатларимизни аҳолига сингдиришда кекса ёшдаги нуронийларнинг кўмагидан, ўгит-насиҳатларидан фойдаланиш лозимлигига кенг тўхталди.

Туман Қўриқлаш бўлими бошлиғи, майор Қанатбай Раманов ҳудудларда ўғирлик, ҳуқуқбузарликлар содир этилишининг олдини олишда хонадонлар, якка тартибдаги уйлар қўриғи, маҳаллалар ҳудудидаги объектлар қўриғи муҳим аҳамият касб этишини таъкидлади. Шунингдек, видеокузатув билан жиҳозланиши ҳам эътиборга молик эканлигини, маҳаллаларда жиноятчилик, ҳуқуқбузарликларнинг олдини олишда маҳалла фуқаролар йиғинлари масъуллари ҳамкор ташкилотлар билан ўзаро ишлашишни яхшилаши лозимлигини қайд этди.

Йиғилишда ҳудудлардаги жиноят ўчоқларини тугатишда “хавфсиз хонадон”, “хавфсиз ҳовли” тизимини йўлга қўйиш, низоли оилалар ва муаммоли шахслар билан “маҳаллабай”, “оилабай” ва “фуқаробай” ижтимоий профилактика ишларини самарали олиб бориш лозимлиги, бунда қўриқлаш хизмати имкониятларидан кенг фойдаланиш, видеокузатув мосламаларини ўрнатиш афзалликлари кенг тарғиб этилди.

Йиғилишда муҳокама этилган масалалар юзасидан тегишли қарорлар қабул қилинди.

Ойгул РАЖАБОВА.