ФИДОЙИ МУАЛЛИМА ВА ЭЛИМ, ЮРТИМ ДЕГАН ТАДБИРКОР

Ҳаётда яхши инсон ва яхши мутахассис бўлиш учун эл-юрт манфаати йўлида ўзни сафарбар этиш, халққа манзур ишлар қилиш, ўз атрофингдагиларнинг қалбларига хотиржамлик бахш этиб яшаш керакки, токи эл-у юртинг сендан рози бўлсин. Элни рози қилиб, кўпнинг дуоларини олиб яшаш эса ҳаммага ҳам насиб этавермайди.

Агар таъбир жоиз бўлса, Чойкўл овулида истиқомат қилувчи Муяссархон Маткаримова ўзининг фидойилиги билан эл-юртга чин дилдан қайишиб, кўплаб инсонларнинг ҳурмат ва эътирофига сазовор бўлган, пировардида  эл дуосини олиб яшаётган инсонлардан.

Асли касби тил ва адабиёт ўқитувчиси бўлган Муяссархон Маткаримова 22 йиллик педагогик тажрибага эга. Табиатан болажон, янгиликка интилувчан бўлган Муяссархон ўзининг асосий касбий фаолиятидан ажралмаган ҳолда тадбиркорлик билан шуғулланишга қарор қилди. Чойкўл овулининг “Чоқча” аҳоли пунктидаги қаровсизликдан хароба ҳолатга келиб қолган, бир вақтлар болалар боғчаси, кейинчалик қишлоқ шифокорлик пункти вазифаларини ўтаган бинонинг 2020 йилда ким ошди савдосига қўйилаётганини эшитиб, ўзини синаб кўрмоқчи бўлди. Омади келиб, бинони кимошди савдосида ютиб олган Муяссархон бинонинг ҳақиқий ҳолати билан танишгач, ҳатто: “бекор олдиммикан?” – дея иккиланиб ҳам юрди. Унга қайнотаси Янгибой ота Ўрозалиев ва умр йўлдоши Мақсуджон яқин масалаҳатгўй ҳамда кўмакчи бўлишди. Мақсуджон тадбиркор эмасми, бино таъмири учун 1 млрд. сўмдан зиёд маблағ ажратди. Жорий реконструкциядан сўнг “чиройи” очилиб қолган бинони қувона-қувона жиҳозлади. Замонавий диван-каравотлар, юмшоқ мебеллар тўпламлари, 3 ёшдан 6 ёшгача бўлган болаларга мўлжалланган ўйинчоқлар олиб келиб, бинонинг ичкариси ва ҳовлисини эртак қаҳрамонларининг расмлари, ҳайкалчалар билан безатди. 2022 йилда 50 ўринга мўлжалланган “Ширинтой” нодавлат мактабгача таълим ташкилоти ўз фаолиятини бошлади.

Ниҳоятда кўримсиз ҳолга келиб қолган бинода “Ширинтой” нодавлат мактабгача таълим ташкилоти фаолиятини йўлга қўйиш истагида икки йилдан ортиқ вақт елиб-югурган Муяссар Маткаримованинг уддабуронлигидан, “чоқча”лик ёш оилалар учун яратиб берган шароитидан, нодавлат МТТдаги намунали таълим-тарбия муҳитидан элдошлари бугун мамнун.

Эътиборлиси шундаки, мазкур нодавлат МТТ ташкил этилиши билан чойкўлллик 8 нафар аёл-қизларнинг доимий иш билан бандлиги таъминланди. Фарзандини МТТга бериш учун ойлаб навбат кутадиган ёш оналар учун қулайлик яратилди, болажонлари шундоқ ўзлари яшаб турган маҳалланинг ўзида, кўзлари олдида таълим-тарбия олиш имконига эга бўлдилар.

Қолаверса, оналар ўз фарзандларининг ҳар томонлама қулай шарт-шароитларга эга муассасада тарбияланишларини хоҳлашади. “Ширинтой” нодавлат МТТда ана шундай қулай маънавий-маърифий муҳит яратилган. Фарзандларини мазкур муассасага бериш истагида бўлган оналар сафи кун сайин ошиб бораётганини ҳисобга олган Муяссархон шартнома асосида болаларни муассасага хавфсиз олиб келиш ва олиб кетиш бўйича хизматни ҳам йўлга қўйди. Эндиликда иккита “Дамас” русумли атомошинада овулнинг олис маҳаллаларидаги ёш оналарнинг хотиржам ишлашлари учун болажонлар МТТга ҳар куни ўз вақтида олиб келинади ва кечқурун уларни ота оналарига беминнат олиб-бориб топширишади.

Муяссархоннинг режалари кўп. Келажакда нодавлат МТТда ясли гуруҳини ҳам очиш ниятида. Бундан ташқари, болажонлар учун инглиз, рус тили, спорт тўгараклари фаолиятини йўлга қўйиш орқали мактабгача тайёрлов гуруҳида тарбияланаётган болажонларнинг тил ўрганиш ва жисмоний чиниқиш кўникмаларини ривожлантириш, мактабгача таълим гуруҳини ташкил этиб, альфавитни ва карра жадвалини ўзлаштирган болажонларни тарбиялаш орзусини рўёбга чиқариш учун фидойилик билан меҳнат қилмоқда.

- Мақсадим, ҳар томонлама етук ва билимга интилувчан болажонларни тарбиялаш орқали мамлакатимиз таълим-тарбия соҳасига ўз ҳиссамни қўшиш – дейди Муяссархон Маткаримова.

Биз эса тиниб-тинчимас фидойи ўқитувчи, эл-юрт фаровонлиги, оилалар хотиржамлигини таъминлаш йўлида беминнат хизмат қилаётган тадбиркор Муяссархон Маткаримовага толмас куч-қувват, ишларига муваффақият тилаймиз.

Робия ЙЎЛДОШЕВА.