ТУМАН ҲОКИМИ БОСУВ МАҲАЛЛАСИ ЁШЛАРИ БИЛАН УЧРАШДИ

Ўзбекистон Республикаси Президентининг “Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида”ги Қарорига мувофиқ мамлакатимиз овул, маҳалла, шаҳарчаларида ёшлар етакчилари фаолияти йўлга қўйилганлиги туфайли ёшлар муаммоларини бевосита маҳаллаларда ҳал этиш, маҳалла ҳудудида, таълим муассасаларида маънавий-маърифий ишларни йўлга қўйиш имкони яратилди.

Ёшлар етакчилари зиммасига ҳудуд ёшлари тўғрисидаги зарур маълумотларни “Ёшлар дафтари”, “Ёшлар портали” электрон платформаларига киритиб бориш, улар билан самарали ишлаш, бўш вақтини мазмунли ташкил этиш, миллий халқ ўйинлари ва спорт турларини ёшлар орасида оммалаштириш, “Беш муҳим ташаббус” лойиҳалари, ёшлар фестиваллари ва бошқа маданий-маърифий тадбирларни амалга ошириш вазифалари юкланди. Ёшларнинг ижтимоий фаоллигини ошириш, иқтидори, истеъдоди ва ташаббусларини рағбатлантириш ҳамда ҳаётда ўз ўринларини топишига кўмаклашиш, ёшларни ватанпарварлик руҳида тарбиялаш, уларнинг интеллектуал жиҳатдан камол топишини таъминлаш ҳам шулар жумласига киради.

Ёшлар етакчиларининг бу борадаги саъй-ҳаракатларини мувофиқлаштириш, ёшлар масалалари билан шуғулланиш Қорақалпоғистон Республикаси, вилоятлардаги туман, шаҳарлар ҳокимлари томонидан амалга оширилиши белгиланган.

Амударё туманида ҳам қарор ижросини таъминлаш борасида изчил саъй-ҳаракатлар олиб борилмоқда. Жорий йилнинг 15 июнида Босув маҳалласида ўтказилган “Ҳоким ва ёшлар” учрашуви ҳам шу мақсадга қаратилди.

Учрашув ҳудуддаги 26-сонли мактабнинг файзли ҳовлисида ташкил этилди. Тадбирда туман ҳокими Султонбой Йўлдашев, Халқ қабулхонаси мудири Эркин Ражабов, туман ҳокими ўринбосари Маҳмуд Шерметов, Ёшлар ишлари Агентлиги туман бўлими бошлиғи Сардор Исмоилов, Босув маҳалла фуқаролар йиғини раиси Эркин Эшмуродов, хотин-қизлар фаоли Дилфуза Абдуллаева, ҳоким ёрдамчиси Акбаржон Хўжамуродов, ёшлар етакчиси Нигора Бозорбоевалар иштирок этдилар. Шунингдек, 50 нафардан ортиқ маҳалла ёшлари, ушбу таълим муассасасини битириб, парвозга шайланаётган палапонлар, мактаб ўқитувчилари қатнашдилар.

Учрашувни туман ҳокими Султонбой Йўлдашев очди ва йиғилганларни Ёшлар ойлиги, 30 июнь – Ёшлар куни билан қизғин қутлади. Юртимизда ёшларга яратилаётган имкониятлар, шароитлар ҳақида батафсил гапирди. Шунингдек таълим-тарбия ишларини намунали ташкил этиб, иқтидорли, илмга интилувчи ёшларни камолга етказаётган мактаб ўқитувчилар жамоасига миннатдорлик билдирди.

Шунингдек, жорий ўқув йилида мактабни битираётган Нуршода Саъдуллаева, Шоҳида Нуруллаеваларни билим даражасини белгилаш учун тест синовларидан ўтиб, миллий, халқаро сертификатларни олишга эришганликлари билан қутлаб, уларга ва барча битирувчиларга оқ йўл тилади.

Шундан сўнг Султонбой Йўлдашев маҳалла ёшлари билан юзма-юз мулоқотга киришди. Маҳалла ёшларидан Ғуломжон Каримов ҳайдовчилик курсида ўқиш бадалини тўлашда, Рисгул Бидашева субсидия асосида тикув машинаси олишда, жорий йилда олийгоҳни тугатган Юлдуз Каримова ишга жойлашишда, Қорақалпоқ Давлат Университети 3-босқич талабаси Муҳайё Мирзаева олийгоҳ шартнома пулини тўлашда ёрдам сўраб мурожаат қилдилар.

Учрашувда ёшларнинг мурожаатларини ҳал этиш юзасидан масъулларга топшириқ берилди.

Юзма-юз самимий мулоқот тарзида ўтган учрашув Босув маҳалласи ёшлари ҳаётида ижобий ўзгаришлар ясайди, албатта.

Ойгул РАЖАБОВА.