Амударё туманида ғалла ўрим-йиғимига киришилди

9 июнь куни Амударё туманидаги “Юсуф хўжа” фермер хўжалигида жорий йилги ғалла ўрим-йиғими бошланиши муносабати билан кўргазмали семинар ўтказилди. Семинарда туман ҳокими Султонбой Йўлдашев, секторлар раҳбарлари, Ўзбекистон Республикаси Қишлоқ хўжалиги вазирлиги ҳузуридаги Агросаноат мажмуи устидан назорат қилиш инспекциясининг Қорақалпоғистон Республикаси Бошқармаси бошлиғи Махсет Шанхиев, қишлоқ хўжалиги бўйича туманга бириктирлган вакил Икром Йўлдашев, қишлоқ хўжалиги бўлими масъуллари, фермер ҳамда механизаторлар қатнашдилар.

Семинар аввалида ёши улуғ отахонлар ғалла майдонларида етиштирилган буғдой ҳосили бу йил ҳар йилдагиданда мўл бўлишини, юртимизда тўкин-сочинлик ҳукм суриб, дастурхонларимизда ноз-у неъматлар бисёр бўлишини тилаб дуо қилдилар ва деҳқонларга ғалла ўрим-йиғими мавсумидаги машаққатли, шу билан бирга шарафли ишларида куч-қувват тиладилар.

Семинар иштирокчиларига 12 июнь кунидан 1 июлга қадар давом этадиган ғалла ўрим-йиғими ишларини сифатли тарзда амалга ошириш бўйича чора-тадбирлар дастури бўйича батафсил маълумотлар берилди.

Таъкидланганидек, 2023 йилги ғалла ҳосили учун тумандаги 361 та фермер хўжаликларининг жами 7000 гектар ер майдонига ғалла уруғлари экилган эди. “Қипчоқ ғалла кластери” масъулияти чекланган жамияти 5861 гектар, “Amu Rich Harvest” масъулияти чекланган жамияти 1139 гектар экин майдонларида етиштирилган ғалла ҳосилини харид қилиш бўйича фермер хўжаликлари билан шартнома имзолашган. Туман бўйича жорий йилги мавсумда ғалла кластерларининг қабул масканларига қабул қилинадиган жами дон миқдори 16 минг 460 тоннани ташкил этади. Етиштирилган ҳосилнинг 1450 тоннаси уруғлик дон учун, 8000 тоннаси эса истеъмол учундир. Ундан ташқари, жорий йилги ҳосилдан 7010 тонна дон маҳсулоти биржа савдолари учун вақтинча сақлашга йўналтирилади.

Жорий йилги ғалла ўрим-йиғим мавсумини уюшқоқлик билан ўтказиш, ғаллани ўришга тайёрлашдан тортиб, уни қабул масканларига элтишгача бўлган жараёндаги ишларни тизимли равишда ташкил қилиш мақсадида штаб ташкил қилиниб, 24 та ўрим отрядлари тузилган ва уларга 24 та комбайнлар бириктирилган.

Комбайнлар билан бир қаторда мавсумда дон ташишга мўлжалланган ҳамда хизмат кўрсатадиган техникалар ҳам жалб қилиниб, уларнинг ҳам мавсум давомида тўлиқ ишчи ҳолатида бўлишини таъминлаш чоралари кўрилди. Комбайнларга бириктирилган 48 нафар операторлар учун эса барча зарурий шарт-шароитлар яратиб берилган.

Ундан ташқари, ғалла ўрим-йиғимини беталофат ва хавфсизлик қоидаларига риоя қилган ҳолда ўтказиш мақсадида туман Ички ишлар бўлими, Фавқулодда вазиятлар бўлими, Миллий гвардия туман бўлимининг жами 52 нафар ходимлари жалб қилинган.

Семинар якунида ғалла майдонларида ўрим-йиғим олдидан ёнғин хавфсизлиги қоидаларига риоя этиш, ғалланинг исроф бўлиб ўрилишига йўл қўймаслик, ўрилган ғалла майдонларидаги сомонларни ёқмаслик борасида фермер хўжаликларининг мутасадди ходимларига, ғаллакор ва механизаторларга тушунтиришлар бериб ўтилди.

Туман ҳокимлигининг Ахборот хизмати.