1-сонли мактабда “Келажагимсан, фарзандим!” номли ноананавий мажлис ўтказилди

Оила – фарзанд туғилгач, илк кўзини очиб дунёни кўрадиган, олам рангларини ҳис қиладиган макон. Шу маконда норасидаларнинг ахлоқи, қобилияти, ақл-идроки, юриш-туриши, ўзгалар билан ўзаро муносабатлари шаклланади. Оилада ота-она, фарзандлар ва бошқа яқинлар бирлиги, ўзаро ҳамжиҳатлиги, меҳр-оқибати янги туғилган гўдак учун сабоқ бўлади. Бола қуруқ насиҳат, йўл-йўриқларга қараганда кўпроқ оиласида кўрганларидан сабоқ олиб улғаяди. Шу маънода олиб қарайдиган бўлсак, катталарнинг ёш болалар олдидаги бурч ва масъулияти нақадар юксак эканлигини англаш қийин эмас.

Инсон яшар экан албатта, бахтли-саодатли, тинч-хотиржам яшаб, ўзидан муносиб авлодлар қолдиришни истайди. Шу мақсад йўлида елиб-югуради, фарзандини баркамол қилиб вояга етказишга интилади. Бунда маҳалла, таълим муассаси ва оила ҳамкорлиги муҳим ўрин тутади. Оилада соғлом фикрли, ахлоқли қилиб тарбияланган боланинг дунёқараши мактабда таълим олиши жараёнида янада кенгаяди, шуури ойдинлашади ва кенг жамоатчиликда, маҳаллада буни намоён қила олади.

Баркамол авлод ҳар бир ота-онанинггина эмас, уларга таълим бераётган устоз-муаллимларнинг ҳам орзусидир. Ахир қайси ўқитувчи шогирдларининг эзгу ишлар туфайли, устозингга раҳмат” деган олқишни олиб юришни истамайди, дейсиз?

Шу йил 20 май куни Манғит шаҳридаги 1-сонли мактабда 8-А синфи ўқувчиларининг ота-оналари билан ўтказилган “Келажагимсан, фарзандим!” номли ноананавий мажлис ҳам шу мақсадга қаратилди.

Мажлисда мактаб директори, ўринбосарлари, ўқитувчилар, синф раҳбари ва ўқувчиларнинг ота-оналари иштирок этдилар.

Тадбирда дастлаб мазкур синф раҳбари, қорақалпоқ тили ўқитувчиси Аптабида Абдимуратова ўқувчиларнинг дарс машғулотларини чуқур ўзлаштиришларига эришиш билан бир қаторда, уларни муносиб хулқ-атворли, бир-бирига садоқатли дўст, меҳрли-оқибатли қилиб тарбиялаш борасида қилаётган ишларига кенг тўхталди. Бу борада таълим муассасаси билан ота-оналар ҳамкорлиги ҳам жуда зарур эканлигини таъкилади. Шу хусусда ота-оналарнинг ҳам фикрлари тингланди.

Шундан сўнг турли викториналар, қизиқарли ўйинлар ташкил этилди. “Ота-онамга мактуб” мавзусида ўқувчилар синф раҳбари топшириғига кўра ота-оналарига ёзган мактублари эгаларига топширилди. Мактубларни ўқиш жараёни жуда ҳаяжонли бўлди. Чинки ўғил-қизлар ота-онаси билан оилада ўзаро муомалада айтишга жазм этолмаган ё ийманган тилакларини, фикрларини мактубда изҳор этган этдилар. Мактублар ўқиб бўлингач, ўқувчилар ота-оналарига совғалар ҳадя этишди.

Шунингдек, ўқув йили давомида аъло ўқиши ва намунали хулқи билан бошқаларга ўрнак бўлган ўқувчиларнинг ота-оналарига мактаб маъмурияти томонидан ташаккурномалар топширилди.

Тадбир ўқувчиларда ҳам, уларнинг ота-оналарида ҳам улкан таассуротлар қолдирди.

“Келажагимсан, фарзандим!” Бу шунчаки баландпарвоз эмас, ҳар бир ота-онанинг дилида жаранг сочувчи сўздир. Фарзанд камоли йўлидаги ҳар бир эзгу иш эса эътирофга сазовор. Шу боисдан ҳам ноанаънавий тадбир учун ота-оналар Аптабида Абдумуратовага чуқур миннатдорчилик билдирдилар ва келгусида ҳам таълим муассасаси билан яқиндан ҳамкорлик қилишга ваъда бердилар.

Ойгул РАЖАБОВА.