ДОРБОЗ ТЎРАБОЙ ЭШЧАНОВНИНГ 80 ЁШЛИК ЮБИЛЕЙИ НИШОНЛАНДИ

Санъат фидойиликни талаб қилади. Ўз устида тинмай ишлаган, машаққатлардан чўчимай изланган, тинимсиз машқлар давомида маҳоратини юксалтирган ва элига холис хизмат қилган санъаткорлар ҳақиқий фидойилар, дея оламиз.

Амударё туманида дорбозлик санъатига асос солган, иқтидорли дорбозларни тарбиялаб вояга етказган, саксон ёшида ҳам дор устида турли томошалар намойиш этиб, халқимизнинг эътирофига сазовор бўлаётган Тўрабой дорбоз Эшчонов ана шундай инсонлар тоифасидан десак, адашмаган бўламиз.

Тўрабой Эшчанов шу йил 18 апрелда табаррук саксон ёшини қарши олди. Амударё тумани Маданият ва туризм бўлими ташаббуси билан бўлим томошалар залида саксон ёшида ҳам санъатдан қўлини узмай, дор устида томошалар кўрсатиб келаётган таниқли дорбоз бобонинг қутлуғ ёши муносабати билан юбилей кечаси ташкил этилди.

Тўрабой Эшчонов 1943 йилда Манғит шаҳрига туташ Ўрта қалъа овулининг Юсуфхўжа аҳоли пунктида дунёга келган. 1-сонли мактабда 10-синфни тугатиб, Ўзбекистон Давлат Жисмоний тарбия институтида ўқиган ва олийгоҳни тугатиб, дастлаб 4-сонли мактабда жисмоний тарбия фани ўқитувчиси бўлиб меҳнат фаолиятини бошлаган.

Ҳарбий хизмат бурчини ўташ чоғида у цирк санъати ишқибози бўлган доғистонлик йигит билан дўстлашиши, ундаги бу соҳага бўлган қизиқиш янада кучайишига сабаб бўлган. Жисмоний тарбия билан мунтазам шуғулланиб, турли трюклар ижро қилиб юргани унга бу борада жуда қўл келган.

Армиядан қайтгач, Тўрабой Эшчанов Чимбой туманидаги цирк жамоасига қўшилиб, дорбозлик ўйинларини кўрсатиб, ўз иқтидорини ривожлантириб келган. Кейинчалик Тўрабой дорбоз номи билан танилиб, туманимизда ўзи “Жайхун дорбозлари” цирк жамоасини ташкил этди. Ушбу гуруҳ Тўрабой дорбоз кўмагида цирк санъатига қизиқувчи, тош кўтарувчи полвон, иллюзионист, масхарабоз, сурнайчи каби иқтидорли ёшларни бирлаштириб, катта саҳналарда ўз санъатини намойиш этди ва халқимизнинг ҳақли эътирофларига сазовор бўлди.

Гуруҳ аъзоларининг ўз устларида ишлаб, томошаларини бойитиб борганлари туфайли Ўзбекистон миқёсида ҳаваскор цирк жамоалари ўртасида ўтказилган турли фестивалларда, кўрик-танловларда чиқишлари юқори баҳоланган.

“Табаррук ёшингиз муборак” деб номланган юбилей кечасида туман ҳокимлиги масъуллари, устоз дорбознинг шогирдлари, дўстлари, яқинлари масъуллари, маданият ва туризм соҳаси ходимлари, санъат шинавандалари ва кенг жамоатчилик вакиллари иштирок этдилар.

Тадбирни туман ҳокимлиги котибияти мудири Мансур Ўрозбоев очди ва юбилярни қизғин қутлаб, унга туман ҳокимлиги томонидан “Фахрий ёрлиқ” ва совғалар топширди.

Таниқли санъаткорни қутлагани келган Қорақалпоғистон Республикаси Маданият ва туризм вазирлиги ходими Шуҳрат Йўлдошевнинг самимий тилаклари барчани тўлқинлантирди. Шунингдек, маданият ва санъат ходимлари, Тўрабой Эшчановнинг маслакдош шогирдлари, дўстлари, яқинлари табрикларидан сўнг туманимиз санъаткорлари ижросида концерт намойиш этилди.

Отахон дорбоз Тўрабой Эшчанов ўзига кўрсатилаётган бунингдек эҳтиром учун туман ҳокимлигига, туман Маданият ва туризм бўлими маъмуриятига, барча санъат шинавандаларига чуқур миннатдорчилик билдирди.

Юртимизда инсон қадри улуғ, меҳр-оқибат мустаҳкам эканлиги яққол намоён бўлган тадбир барчада улкан таассуротлар қолдирди.

Ойгул РАЖАБОВА.