Кичик саноат зоналари ҳудудларнинг инвестицион жозибадорлигини оширади

Мамлакатимизда кичик бизнесни ривожлантириш бўйича кўплаб самарали ишлар амалга оширилмоқда. Жумладан, кичик саноат зоналари ташкил этилиб, уларнинг фаолияти давлат томонидан қўллаб-қувватланмода. Сабаби, тадбиркорлик субъектларини жойлаштиришга мўлжалланган, муҳандислик-коммуникация ва инфратузилма объектларини, ишлаб чиқариш майдонини ўз ичига олган кичик саноат зоналари жойлашган ҳудудининг ривожланишига катта имконият яратади. Хусусан, саноат ишлаб чиқаришни жадаллаштиради, ҳудудларнинг инвестицион жозибадорлигини ошириб, бўш турган бинолардан унумли фойдаланишга имконият яратади.

Амударё туманида ҳам Президентимизнинг 2018 йилнинг 6 мартидаги “Қорақалпоғистон Республикасида кичик саноат зоналарини ташкил этиш чора-тадбирлари тўғрисида”ги қарори билан мана шундай махсус саноат зоналари ташкил этилди. Қарор асосида туманимиздаги “Амударё пахта тозалаш заводи” акциядорлик жамиятининг эски биноси кичик саноат зонасига айлантирилди.

Кичик саноат зонасида фаолият олиб бораётган тадбиркорларнинг иш фаолиятини, муаммо ва таклифларини ўрганиш мақсадида Қорақалпоғистон Республикаси прокуратураси бўлим прокурори Ренат Худойбергенов, Қорақалпоғистон Республикаси кичик ва ёшлар саноат зоналарини бошқариш бўйича ягона дирекцияси етакчи мутахассиси Бахауддин Хўжамбергеновлар Амударё туманига ташриф буюришди.

Масъуллар дастлаб тадбиркор Тамара Юсуповага тегишли “Tamara tekstil” масъулияти чекланган жамиятига қарашли тикувчилик корхонасида бўлишди. Корхонада аёллар, эркаклар ва болалар кийимлари, тўқувчилик маҳсулотлари тайёрланади, ҳар хил ёш тоифасидаги харидорлар учун турли хилдаги кийим-кечаклар тикилади. 2009 йилда тикувчилик бўйича тадбиркорлик фаолиятини бошлаган Тамара Юсупова ўз ишини дастлаб 3 млн. сўм кредит маблағи олиб ишлашдан бошлаган. Кейинчалик 40 млн ва 136 млн. сўм миқдорида имтиёзли кредит олиб, тадбиркорлик фаолиятини кенгайтирган.

Шундан сўнг масъуллар тадбиркор Баҳодир Камоловга қарашли “Камолов эшиклари” масъулияти чекланган жамиятида бўлдилар.

Ушбу корхона 2013 йилда иш бошлаган бўлиб бу ерда замонавий русумдаги эшик ва дераза ромлари, уй-рўзғор мебеллари сифатли ва ҳамёнбоп нархларда ишлаб чиқарилади. Айни пайтда корхонада катта уста даражасига эришган 5 нафар ишчи ходим 10 нафардан зиёд шогирд-ишчиларига дурадгорлик касбининг сир-асрорларини пухта ўргатиб келишмоқда.

Корхонада ишчилар учун барча шароитлар яратилган бўлиб, узоқдан келиб ишловчилар учун ётоқхоналар ҳам мавжуд. Ишчилар кунига 2 маҳал иссиқ овқат билан таъминланади. Уларнинг ишлаб чиқарган эшик ва дераза ромларининг сифатига қараб 2 млн.дан 3 млн. сўмгача ойлик иш ҳақи тўланади.

Кичик саноат зонасидаги навбатдаги ташриф тадбиркор Назокат Аллабергеновага тегишли “Mang‘it milk” масъулияти чекланган жамиятига бўлди. Ўз иш фаолиятини дастлаб 30 литр сут маҳсулотини қайта ишлашдан бошлаган тадбиркорнинг корхонасида бугунги кунда 1 тоннадан ортиқ сут қайта ишланиб, кефир, қаймоқ, творог каби маҳсулотлар ишлаб чиқарилади.

Тадбиркор аёл 2018 кичик саноат зонасида фаолият бошлаган пайтида 350 млн. сўм миқдорида кредит олган эди. У ҳозирда кредитни тўлиқ тўлаб, яна катта миқдорда имтиёзли кредит олишни ва ушбу маблағлар эвазига пишлоқ ишлаб чиқарувчи ускуна харид қилишни ният қилган.

Кичик саноат зонасининг бир чеккасида темир эшиклар ишлаб чиқаришга мўлжалланган корхона ҳам фаолият юритмоқда. Тадбиркор Жасур Бобожанов 2013 йилда “Аму металл ковка арт” масъулияти чекланган жамиятини очган эди.

Ушбу корхонада сифатли ва ҳамёнбоп эшик ва иситиш қозонхоналари, замбиллар тайёрланиб, ички бозорларимизда ўз харидорларига эга бўлмоқда. Тадбиркорнинг нияти – экспортни йўлга қўйиш ва ўз фаолиятини янада кенгайтириб, ишсиз ёшларни иш билан таъминлашдир.

Масъуллар кичик саноат зонасидаги корхона эгалари билан яқиндан суҳбатлашиб, уларнинг келгусидаги иш фаолиятларига муваффақиятлар тилашди.

Айтиш керакки, бугунги кунда ушбу кичик саноат зонасида тадбиркорлар учун инвестиция лойиҳаларини амалга оширишда барча шароит яратилмоқда. Хусусан, транспорт қатновининг қулайлиги ва муҳандислик-коммуникация инфратузилмасининг мавжудлиги ишлаб чиқариш саноати ривожида муҳим аҳамият касб этаётир.

Туман ҳокимлигининг Ахборот хизмати.