“ТАШАББУСЛИ БЮДЖЕТ” ОРҚАЛИ КЎПГИНА ИЖТИМОИЙ МУАММОЛАР ҲАЛ ҚИЛИНАЯПТИ

Мамлакатимизда бюджет маблағларининг маълум қисмини жамоатчилик фикри асосида йўналтириш, ташаббусли бюджетлаштириш тизими изчил давом эттирилмоқда. Фуқароларнинг бюджет маблағларининг бир қисми сарфланишида иштирок этаётгани ҳудудлардаги энг долзарб муаммоларнинг ижобий ҳал этилиб, одамларнинг эртаги кунга ишончини оширишда муҳим омил бўлмоқда. Боиси, ташаббусли бюджетлаштириш бу аҳолининг бюджет маблағларининг маълум қисмини сарфлаш мақсадидаги ташаббусларини илгари суриши орқали маҳаллий бошқарувда тўғридан тўғри иштирок этишини таъминлайди.

Бунинг учун 18 ёшдан ошган ташаббускор фуқаролар якка ёки гуруҳ бўлиб лойиҳа таклиф қилиши керак. Ушбу лойиҳалар экспертизадан ўтказилиб, сараланади ва овоз беришга қўйилади. Энг кўп овоз тўплаган лойиҳалар молиялаштирилади.

Амударё тумани аҳолиси ҳам ушбу жараёнда фаол иштирок этиб, энг долзарб лойиҳаларни илгари суриб, ғолиб бўлиб, турмушидаги кўпгина муаммоларнинг ҳал бўлишига эришмоқдалар.

Ўтган 2022 йилда “Очиқ бюджет” ахборот порталида ўтказилган “Ташаббусли бюджет” жараёнида иштирок этган туманимизнинг фаол фуқаролари 1-босқичида ўзларининг лойиҳаларини илгари суриб, 9 та ижтимоий муаммоларнинг ҳал этилишга эришдилар. Туманимиз инфаратузилмасини ривожлантириш лойиҳаларига фуқароларнинг ташаббуслари асосида бюджет маблағлари ажратилиб, лойиҳалар муваффақиятли амалга оширилди. Яъни, ғолиб чиққан 9 та лойиҳа учун 4 млрд. 720 миллион сўм ажратилди.

Ушбу лойиҳалардан бири Тўлқин овулидан ўтган улкан асфальт йўл бўйига пиёдалар йўлакчаси қуриш эди. 33-сонли мактабга қатновчи ўқувчилар, овул фуқаролари учун йўл бўйида йўлакча йўқлиги йўлда ҳаракатланганда анча ноқулайликлар туғдириб келаётган эди. Овул фаол фуқаролари “Очиқ бюджет” порталидаги “Ташаббусли бюджет” жараёнида ушбу лойиҳани илгари суриб, ғолиб бўлдилар. Пиёдалар йўлакчаси “Жайхун Мастер Строй” масъулияти чекланган жамияти томонидан сифатли қуриб битказилди ва фойдаланишга топширилди.

Шунингдек, Арнабўйи маҳалласидаги 33-сонли мактабгача таълим ташкилотини жорий таъмирлаш бўйича тақдим этилган лойиҳа ҳам фуқароларнинг фаоллиги туфайли ғолиб бўлди ва муассаса 299 миллион сўм маблағ эвазига жорий таъмирланди. Иккинчи босқичда эса 6 та лойиҳа ғолиб деб топилди ва ушбу ижтимоий муаммолар ижобий ҳал этилиши учун 5 миллиард 799 миллион 500 минг сўм сарфланди.

Амударёликлар “Очиқ бюджет” порталидаги “Ташаббусли бюджет” жараёнида жорий йилда ҳам ўз ҳудудларидаги турли ечимини кутаётган муаммолар билан иштирок этишди. Бу борадаги таклифларнинг 16 таси ғолиб бўлди.

Эндиликда ушбу лойиҳалар молиялаштирилиб, ҳудудлардаги электр тармоқларини янгидан тортиш, мактаблар биноларини мукаммал ва жорий таъмирлаш, қўшимча бино қуриш, иситиш тизимини таъмирлаш, йўлларга тош, асфальт ётқизиш каби ижтимоий аҳамиятга молик ишлар амалга оширилади. Айни кунларда мазкур лойиҳаларнинг лойиҳа-смета ҳужжатлари ишлаб чиқилмоқда.

Эътиборли жиҳати, жорий йилда биринчи босқичда ғолиб бўлган лойиҳаларнинг 5 тасида умумий ўрта таълим мактабларини жорий, капитал таъмирлаш, иситиш тизимини янгилаш ва қўшимча бино қуриш ташаббуслари илгари сурилган. Бу – ўсиб келаётган ёш авлоднинг сифатли таълим олиши, бўш вақтларини мазмунли, мақсадли ўтказишига имконият яратиш мақсадида режалаштирилган хайрли лойиҳалардир.

Ойгул РАЖАБОВА