Уйшин маданият уйида Референдум тарғиботига бағишланган тадбир ўтказилди

Бундан йигирма бир йил аввал 2002 йил 27 январда Ўзбекистон Республикасида икки палаталик парламентни шакллантиришга бағишланган Референдум бўлиб ўтган эди. Бу йил ўтказиладиган референдумда Конституциямизга киритиладиган кўшимча ва ўзгартиришлар ҳеч кимни бефарқ қолдирмаётганлигини, жонажон халкимизнинг онгида ва қалбида эртанги кунга бўлган ишончи, ғурур-ифтихори порлаб турганлигининг ҳар онда гувоҳи бўлмоқдамиз.

 Юртбошимиз таъбири билан айтганда, конституциявий ислоҳотни фуқароларимиз фикри ва қўллаб-қувватлаши асосида, референдум орқали амалга оширсак, бу том маънода халқимиз хохиш иродасининг ифодаси-ҳақиқий халқ Конституцияси бўлади.

 Халқимизнинг бевосита хоҳиш ва истаклари ифода этиладиган кун этиб 30 апрель санаси белгиланди. Ушбу сиёсий жараёнда фуқароларнинг фаол иштирокини таъминлаш мақсадида турли тарғибот тадбирлари ўтказилиб келинмоқда. Амударё туманининг Уйшин маданият марказида бўлиб ўтган тарғибот тадбири ҳам шулар жумласидандир.

Тадбирда Референдум ўтказишга кўмаклашувчи комиссия аъзолари, кенг жамоатчилик вакиллари, фаол фуқаролар иштирок этишди.

Тарғибот тадбирида сўзга чиққанлар Конституциявий Қонун лойиҳасини тайёрлаш ва маромига етказишда Қонунчилик палатасининг 2022 йил 24 июндаги қарори билан “Қонун лойиҳаларининг умумхалқ муҳокамаси тўғрисида”ги Қонун талабларига риоя этилган ҳолда икки босқичда умумхалқ муҳокамаси ўтказилганлиги, ушбу жараёнда “Meningkonstitutsiyam.uz” электрон платформаси, қисқа рақамли call-маркази, почта алоқаси, маҳаллалар, халқ депутатлари маҳаллий Кенгашлари ва ижтимоий тармоқлар орқали Республикамизнинг барча ҳудудларидан фуқароларимиз, айниқса ёшларимиздан 220 мингдан ортиқ фикр ва таклифлар қабул қилинган ҳамда таҳлил қилинганлигини айтиб ўтишди.

Шунингдек, янги таҳрирда қабул қилинаётган Ўзбекистон Республикаси Конституцияси 65 фоизга янгиланиб, моддалар сони ҳозирги 128 тадан 155 тага, ундаги нормалар эса 275 тадан 434 тага оширилаяпти. 128 та модданинг 91 тасига концептуал ўзгаришлар киритилмоқда.

Шу ўринда айтиш керакки, жамият ва давлат ҳаётининг энг муҳим масалалари юзасидан ўтказиладиган референдум ҳақида ҳар бир фуқаро албатта билимга эга бўлиши, қонунчиликни яхши билиши, ўз ҳуқуқларидан тўла-тўкис унумли фойдаланиши ғоят муҳим аҳамият касб этади.

Конституциямизга киритилаётган ўзгартишлар эса, келгусида ҳаётимизнинг ҳар бир жабҳасида ўзининг ижобий ифодасини топиши шубҳасиз.

Азиз юртдошлар! 2023 йил 30 апрелда ўтказиладиган референдум, бу шунчаки муҳим сиёсий тадбир бўлиб ўтадиган кун бўлибгина қолмай, ҳар биримизнинг,  фарзандларимизнинг тинчлигини, фаровон ва осуда ҳаётини белгилаб берувчи ҳужжатнинг қабул қилиниши учун овоз бериладиган кун эканлигини унутмайлик!

Шундай экан, референдумда фаол иштирок этиб, ўз Конституциявий бурчимизни рўёбга чиқарган ҳолда овоз берайлик!

Диана Базарбаева ҚДУнинг журналистика факультети талабаси