52-сонли мактабда “Китоб – қалб қуёши” номли маънавий-маърифий тадбир ўтказилди

Инсонларнинг маънавий дунёсини бойитиш, Ватанга муҳаббат ва садоқат туйғуларини юксалтиришда китобларнинг ўрни беқиёс. Туманимизда китобхонликка қаратилаётган эътибор, ёшларнинг китобга меҳрини ошириш борасидаги саъй-ҳаракатлар кенг кўламда олиб борилмоқда.

Шу жумладан, Амударё туманининг Намуна маҳалласидаги 52-сонли умумий ўрта таълим мактабида ҳам ўқувчи ёшлар ўртасида китобхонликни кенг тарғиб қилишга бағишланган тадбирлар, давра суҳбатлари ўтказилиб келинмоқда.

Ушбу мактабда бугунги кунда 391 нафар ўқувчига 41 нафар малакали ўз касбининг етук мутахассислари бўлган ўқитувчилар таълим-тарбия бериб келишмоқда.

Мактаб директори Қодирберган Эшчонов мактаб жамоасига раҳбарлик қилиб, таълим-тарбия ишларини доимий назоратга олган ҳолда ўз фаолиятини олиб бормоқда.

Мактабда ташкил этилган мўжазгина кутубхонада ўқувчиларнинг савиясини бойитишга, дунёқарашини кенгайтиришга ва маънавиятини юксалтиришга хизмат қилувчи бадиий ва илмий китоблар кўплаб топилади. Ҳар йили кутубхонага ўзбек ва жаҳон адабиётининг етук намоёндалари тарафидан ёзилган дурдона асарлар ва илмий адабиётлар олиб келиниб бойитиб борилади.

Шунингдек, мактабда доимий равишда турли хил спорт мусобақалари, маданий-маърифий тадбирлар ўтказилиб келинади.

15 апрель куни мактабда “Китобхонлик маданиятини юксалтириш− буюк мақсадларимизга эришишнинг муҳим кафолатидир” шиори остида “Китоб- қалб қуёши” номли тадбир ўтказилди. Тадбирда мактаб ўқувчилари ўзларининг бор билим ва истеъдодларини намойиш этиб фаол иштирок этишди.

Бадиий кечада сўзга чиққанлар мамлакатимизда китобхонликка қаратилаётган эътибор, ёшларнинг китобга меҳрини ошириш борасидаги саъй-ҳаракатларга тўхталиб, бунга ёшларимиз ҳам муносиб жавоб бераётганликларини, бунёд этилаётган маърифат ўчоқлари – кутубхоналар аҳоли маънавий оламини янада бойитишга, фарзандларимизни эзгу ғоялар асосида, китобга меҳрли этиб тарбиялашда яқиндан кўмак беришини эътироф этишди.

Бадиий кечада иштирок этган ўқувчилар китоб ҳақида шеърлар айтишди. Унинг инсон камолоти, дунёқарашини ривожлантиришдаги ўрнини бадиий ва таъсирли сўзлар билан ифодалаб беришди. Шунингдек, ўқувчилар ўзбек мумтоз қўшиқларига, таниқли хонандалар томонидан қўшиқ қилиб ижро этилган ғазал куйларига рақсга тушдилар.

Бадиий асарлардан олинган парчаларни саҳна кўринишлари орқали гавдалантириб бердилар. Тадбир якунида ёшларни мантиқий фикрлашга ундовчи, қизиқарли савол-жавоблар бўлиб ўтди.

Ушбу тадбирни ташкил этишда мактабнинг ижодий-маданий масалалар бўйича тарғиботчиси Гулмирза Бобожонов, мактаб директорининг маънавий ва маърифий ишлар бўйича ўринбосари Зарифбой Эшниёзов, ўзбек тили ва адабиёти фани ўқитувчиси Севара Эшчонова ва бошқа педагог ҳодимларнинг хизматлари катта бўлди.

Шуни айтиб ўтиш керакки, мактабларда ташкил этилаётган китобхонлик тадбирлари ўқувчиларнинг қалбида китобга бўлган меҳр-муҳаббатнинг янада юксалишида муҳим аҳамият касб этади.

Ота-боболаримиз китобни бекорга билим манбаи, тафаккур ўчоғи, ақл чироғи, кўнгил табиби, руҳият озиғи деб айтишмаган. бекорга

Шундай экан, азиз ёшлар, ўтаётган ҳар бир кунимизни ғанимат билиб билим олиш, дунёқарашимизни бойитиш пайида бўлайлик!

Шаҳло Сабирова, Бердақ номидаги ҚДУнинг журналистика факулътети 2-курс талабаси.