ТАНИҚЛИ ИЖОДКОР МАКТАБ ЎҚУВЧИЛАРИ БИЛАН УЧРАШДИ
Маълумки, 2019 йилнинг март ойида Ўзбекистон Республикаси Президенти томонидан 5 та муҳим ташаббус илгари сурилган эди. Бу ташаббуслар ёшларни маданият, санъат ва спортга кенг жалб этиш, уларда замонавий ахборот технологияларидан тўғри фойдаланиш кўникмаларини шакллантириш, китобхонлик маданиятини юксалтириш вазифаларини ўз ичига олган эди.
Айни кунда мамлакатимизнинг барча жойларида, жумладан Амударё туманида ҳам мана шу 5 та муҳим ташаббус доирасида белгиланган вазифаларни бажариш юзасидан кўламли ишлар амалга оширилмоқда.
Бу борада айниқса, 56-сонли мактабда олиб борилаётган ишлар кишини қувонтиради. Айни кунда бу таълим муассасасида ўқувчиларни китобхонликка, санъатга ва спортга қизиқтириш мақсадида қатор тадбирлар ўтказилмоқда.
Шундай тадбирлардан бири яқинда Бойовул маҳалласида истиқомат қилаётган таниқли рассом ва ҳайкалтарош, Ўзбекистон халқ таълими аълочиси Бозорбой Холимбетов иштирокида ўтказилди. Ушбу учрашув тадбирини мактабнинг ижодий-маданий масалалар бўйича тарғиботчиси Алламберган Жуманиёзов кириш сўз билан очиб, ўқувчиларни рассом ва ҳайкалтарош Бозорбой Холимбетов билан таништирди ҳамда унинг ижодий фаолияти ҳақида гапириб берди.
Шундан кейин Бозорбой Холимбетов тасвирий ва амалий санъат ҳамда уларнинг турлари ҳақида маъруза қилди. Ушбу маърузада тасвирий санъатнинг рангтасвир, мозаика, миниатюра, натюрморт, ҳайкалтарошлик, амалий санъатнинг ўймакорлик, наққошлик, заргарлик, зардўзлик, каштачилик ва гиламдўзлик турлари бўйича берилган тушунчалар ўқувчиларда катта таассурот қолдирди.
Учрашув тадбирида мактабнинг 7-синф ўқувчиларидан Райхон Тўрабоева, Умида Нуруллаева, Руслан Олимбоев, Руҳшона Жумабоева ва Гўзалой Шукуруллаевалар сўзга чиқишиб, бу учрашув уларда тасвирий ва амалий санъатга бўлган қизиқишни янада оширгани ҳақида гапирдилар.
Учрашув тадбири якунида маънавий-маърифий ишлар бўйича мактаб директори ўринбосари Роҳатой Худойберганова сўзга чиқиб,мактабга ташрифи учун таниқли рассом ва ҳайкалтарош Бозорбой Холимбетовга мактаб жамоаси номидан миннатдорчилик билдирди.
Мадина МУҲАММАДСОЛИЕВА, мактабнинг “Ёш журналистлар” тўгараги аъзоси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
