36-СОНЛИ МАКТАБДА “КИТОБИМ ҚЎЛИМДА” ДЕБ НОМЛАНГАН ТАДБИР ЎТКАЗИЛДИ
Баҳор ойининг иккинчи ойида Халқаро болалар китоби куни муносабати билан дунё миқёсида турли тадбирлар, йирик китоб ярмаркаларининг ўтказилиши анъана тусига кирган. Юртимизда ҳам бу кун кенг нишонланади ва турли тадбирлар ўтказилади.
Шу муносабат билан 36-сонли мактабнинг бошланғич синфлари иштирокида “Китобим қўлимда” деб номланган маънавий-маърифий тадбир ташкил этилди. Мактабнинг бошланғич синф ўқитувчиси Зулхумор Жамолова ҳамда 3-“В” синф ўқувчилари томонидан ўтказилган ушбу тадбирда мактаб директорининг маънавий-маърифий масалалар бўйича ўринбосари Ваҳобжон Давлетов, бошланғич синфлар услуббирлашмаси раҳбари Насиба Бобожонова ҳамда бошланғич синф ўқитувчилари ва ўқувчилари қатнашишди.
Тадбирни мактаб директорининг маънавий-маърифий масалалар бўйича ўринбосари Ваҳобжон Давлетов очиб берди ва халқимиз, миллатимиз илм-фанни, китобни, китобхонликни азал-азалдан қадрлаб келганини, аждодларимизнинг қадим даврларда ҳам китобхонлик давралари, мушоиралар, олиму фузалолар иштирокидаги кечалар ташкил этганлари, достонлар асосида бахшилар, оқинларнинг айтишувларини уюштирганлари ҳақида сўзлади. Буларнинг ҳаммаси халқимиз маънавиятини юксалтиришга хизмат қилганини айтиб, ўқувчиларни китобхонликка даъват этди.
Тадбирда иштирок этган мактаб кутубхоначиси Назокат Саъдуллаева ҳам сўзга чиқиб, болаларга сифатли китоблар етказиб бериш учун ижтимоий аҳамиятга молик лойиҳалар амалга оширилаётганини, натижада болалар кўнглига тез ва осон кириб борадиган китоблар дунё юзини кўраётганини таъкидлади. Шунингдек, китоб ўқиган бола ақлли ва билимли бўлишини, ҳамиша тўғри йўлни топа олишини, дунё илмларини тўлиқ эгалласа фозил инсонлар бўлишини айтиб ўтди.
Ўқувчилар китоблар ҳақида мақоллар, тез айтишлар ва қизиқарли маълумотлар айтиб, тадбирни давом эттиришди. Берилган маълумотлар орқали ўқувчилар китобларнинг кўп йиллар илгари пайдо бўлгани, дастлаб лойдан, кейинчалик ҳайвон териларидан, мум суртилган тахтачалар тайёрлангани, йиллар ўтиши билан китоб босиб чиқариш такомиллашиб борганини билиб олишди. Китобларнинг бебаҳо бойлик, билим манбаи эканлиги, тафаккурни юксалитурвчи, бахт келтирувчи ушбу бойликни қадрлаш лозимлигини янада чуқурроқ англашди.
Шундан сўнг, икки ўқувчи тенгдошларига турли топишмоқлар бериб, жавобини тўғри топган ўқувчиларни ширинлик билан сийлашди. Ўйин тарзида қувноқлик билан ўтказилган ушбу қисмда ўқувчилар топишмоқларни тўғри топишга ҳаракат қилдилар.
Тадбир давомида ўқувчилар фаол иштирок этиб, китоб ва билим ҳақида шеърлар айтишди. Қўшиқлар куйлаб, ажойиб рақсларга тушиб, тадбирга хушнудлик бахш этишди. Айниқса, ўқувчиларга Темурбек Бахтиёров ҳамда Ниятулла Янгибоев ифодали айтиб берган шеърлар, қизиқарли маълумотлар жуда манзур бўлди. Ўқувчиларни китобхонликка даъват этиш, китобларнинг қадрини, ўрнини англатиш мақсадида ўтказилган ушбу тадбир жуда қизиқарли ўтди.
Бугун юртимизда китоб нашр қилиш ва китобхонлик давлат сиёсати даражасида эътироф этилмоқда. Ўсиб келаётган ёш авлод қалбида китобларга ва китобхонликка меҳр уйғотиш, қизиқишларини оширишда бу каби тадбирлар муҳим аҳамият касб этади.
Озода Худойберганова, 36-сонли мактабнинг мактабнинг ижодий-маданий масалалар бўйича тарғиботчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
