67-сонли мактабда “Балли қизлар!” кўрик-танлови ўтказилди
Қиз бола нафақат оиланинг, балки элнинг ҳам кўрки. Оилада қиз фарзанд дунёга келса, шу боисдан ҳам одобли, ақлли, иймонли, тадбирли қилиб вояга етказишга ҳаракат қилинади. Халқимизда қиз болани эъзозлаш, уни келгуси ҳаётга муносиб тайёрлаш учун пазанда, ораста қилиб тарбиялашга алоҳида эътибор берилади. Зеро, қиз бор хонадон файзи бўлакча бўлади.
Асрлар оша яшаб келаётган бунингдек миллий урф-одатларимиз, анъана ва қадриятларимизни ёш авлод қалбига сингдиришда, уларга ҳурмат руҳида тарбиялашда умумий ўрта таълим муассасаларининг ҳам муносиб ўрни бор.
6 март куни Амударё туманидаги 67-сонли мактабда 8 март – Халқаро хотин-қизлар куни муносабати билан ўтказилган “Балли, қизлар!” деб номланган танловда ҳам юқори синфлар ўқувчи-қизларининг билимдонлиги, пазандалиги, чаққонлиги синовдан ўтказилди. Иштирокчи қизлар беллашувини мактабнинг тажрибали муаллималари зийраклик билан кузатиб, одилона баҳолаб бордилар.
Беллашувда Нилуфар Жумамуродова Марҳабо Йўлдошева, Мафтуна Ҳайитбоева, Машҳура Муродбоевалар миллий либосларда саҳнага чиқиб, ўзлари ҳақидаги маълумотларни тақдим этдилар. Гоҳ шеърий мисралар, гоҳ таъсирли сўзлар орқали оиласи, ўзи, қизиқишлари ва келажакдаги орзулари ҳақидаги маълумотларни қизиқарли ва ихчам тарзда баён этган қизлар иккинчи шартда пазандалиги бўйича синовдан ўтказилди. Бунда уларга юртимиз заминида етиштирилган турли сабзавотлар, кўкатлардан баҳорий салат тайёрлаш топширилди. Қизлар бири-биридан хуштаъм, мазали салатлар тайёрлашга интилдилар. Улар учинчи шартда билимдонлик синовидан ўтдилар, саволларга тезкор жавоб бериш ҳам уларга қийинчилик туғдирмади.
Навбатдаги босқичда иштирокчи қизларнинг тафаккури синалди, дейиш мумкин. Улардан бошловчи бошини айтган мақолнинг давомини айтишлари сўралди. Томошабинлар зукко қизларнинг халқ оғзаки ижодининг ажралмас қисми бўлган мақолларни айтишларини қарсаклар билан олқишлаб турдилар. Баҳру байт айтишувида эса иштирокчиларнинг шеъриятга қанчалар қизиқишлари аён бўлди.
Ўқувчи-қизларнинг қизиқишлари бўйича эркин мавзуга навбат берилганда даврада шеър, қўшиқ, рақслар ижро этилди.
Иштирокчи қизларнинг иқтидори 4 та номинация бўйича баҳоланди ва рағбатлантирилди.
Ўқувчи-қизларни ушбу беллашувга мактабнинг тажрибали ўқитувчиси Зулайҳо Бобожонова тайёрлади.
Шуни эътироф этиш керакки, таълим муассасаларида бундай беллашувларнинг ўтказиб турилиши ўқувчиларни ўз устида ишлашига, изланишига рағбатлантиради, дунёқарашини кенгайтиради. Шу маънода олиб қарасак, мазкур тадбир ҳам жуда аҳамиятли бўлди, дейиш мумкин.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
