Амударё туманида Халқаро хотин-қизлар куни кенг нишонланди

Аёлнинг нафосати ва назокати, ақл-заковати ва фидойилиги асрлар мобайнида ҳаёт давомийлиги ва абадийлигига асос бўлиб келади. Шу боис ҳам дунёдаги энг буюк санъат асарлари, қўшиқ ва қасидалар, меъморий обидалар аёллар шаънига бағишлангандир.

Оила ва жамият устуни, ҳаёт файзи ва кўрки бўлган хотин-қизларни эъзозлаш, ҳурмат ва эҳтиром кўрсатиш буюк қадриятдир. Аёллар билан олам мунаввар, ҳаётимиз гўзал ва мазмунли, хонадонларимиз обод ва нурафшон бўлиб, умримиз файз ва нурга тўлади.

7 март санасида Халқаро хотин-қизлар байрами Амударё туманида ҳам кўтаринки руҳда нишонланди. Сана муносабати билан “Хон” ресторанида бўлиб ўтган катта тадбирда туманимизда турли соҳаларда самарали меҳнат қилаётган аёллар, ўз ҳаётий тажрибаси асосида ёшлар тарбиясига, оилалар мустаҳкамлигига муносиб ҳисса қўшаётган нуроний онахонлар, умидли, иқтидорли қизлар иштирок этдилар.

 “Муқаддас аёл” деб номланган ушбу байрам тадбирида туман ҳокими Султонбой Йўлдашев барча аёл-қизларни байрам билан самимий қутлаб, ўзининг энг эзгу тилакларини изҳор этди.

 Туман ҳокими ўз табрик нутқида жамиятнинг ижтимоий-сиёсий ҳаётида аёлларнинг роли катта эканлигини, улар ҳар жабҳада самарали меҳнат қилиб, Ватанимиз тараққиётига ҳисса қўшиб келаётганлигини эътироф этиб ўтди.

Самимий табриклардан сўнг навбат туман Маданият бўлимига қарашли муассасалар санъаткорларига берилди.

Туман ҳокимлиги ва Маданият бўлими ҳамкорлигида ташкиллаштирилган тадбирда фаол аёл-қизлар тўкин дастурхон атрофида дилтортар қўшиқлар тинглаб, гўзал рақслар томоша қилишди. Шунингдек, тадбир иштирокчилари туманимизнинг ёш эстрада хонандалари ижросидаги шўх қўшиқларга рақсга тушиб, маданий ҳордиқ олдилар.

Аёл муқаддаслигини, фидойилиги, матонати ва меҳри уммонлигини мадҳ этувчи шеърлар, қўшиқлар меҳмонларга жуда манзур бўлди.

 “Муқаддас аёл” деб номланган мусиқий дастур томошаси ва ўзларига кўрсатилаётган ҳурмат ва эътибор барча аёл-қизларга олам-олам қувонч ва ифтихор бахш этди.

Туман ҳокимлигининг Ахборот хизмати.