Амударё туман ҳокими Cултонбой Йўлдашевнинг 8 март – Халқаро хотин-қизлар куни байрами муносабати билан барча аёл-қизларга табриги

Азиз аёллар! Муҳтарама онахонлар, қадрли опа-сингиллар!

Аввало, Сиз азизларни, сизлар орқали барча онахонларимиз, опа-сингилларимиз, дилбар қизларимизни эзгулик ва гўзаллик байрами – 8-март – Халқаро хотин-қизлар куни билан туман ҳокимлиги номидан ва ўз номимдан самимий табриклайман!

Инсоният пайдо бўлганидан бери аёл зотига ўзгача ҳурмат-эҳтиром кўрсатилиб, унинг нафосати, садоқати, ақл-заковати ҳамда фидойилиги юксак қадрланиб келади. Барча даврлар ва замонларда ҳам жамики халқлар ва миллатлар аёлни улуғлаб келади. Оила ва жамиятнинг устуни, хонадонимизнинг файзи ва фариштаси бўлган хотин-қизларни эъзозлаш, уларга ҳурмат ва эҳтиром кўрсатиш халқимизнинг азалий қадриятига айланган. Чунки аёл билан ҳаёт гўзал ва мазмунли, хонадонларимиз обод ва нурафшондир.

Шу сабабли ҳам юртимизда хотин-қизларни ҳар томонлама қўллаб-қувватлаш, оналик ва болаликни муҳофаза қилиш, оилалар мустаҳкамлигини таъминлаш давлат сиёсати даражасига кўтарилган. Конституция ва қонунларимизда ҳам аёлларнинг ўрни ва нуфузи алоҳида мустаҳкамлаб қўйилган. Муҳтарам Президентимиз раҳбарлигида амалга оширилаётган инсон қадрини улуғлаш, аҳоли учун муносиб турмуш шароитини яратиш, эҳтиёжманд оилаларни қўллаб-қувватлашдек эзгу ишлардан ҳам аёл-қизларимизни ҳаётдан рози қилишдек олижаноб мақсадлар кўзланган.

Айниқса, “Аёллар дафтари”, “Темир дафтар”, “Ёшлар дафтари” каби ижтимоий лойиҳалар доирасида миллионлаб аёл-қизларимизнинг турмуш шароитларини яхшилаш йўлида амалга оширилаётган ишлар эътирофга муносибдир. Биргина 2022 йилда туманимизда “Аёллар дафтари”га киритилган ижтимоий ҳимояга муҳтож 3 803 нафар хотин-қизларга ёрдамлар кўрсатилди. 87 нафар хотин-қизларнинг уй-жойлари ҳомийлик ҳисобидан таъмирлаб берилди. Боқувчисини йўқотган, яшаш шароити оғир деб топилган 56 нафар хотин-қизларнинг ижара пуллари учун компенсация ажратилди.

“Аёллар дафтари” жамғармасидан етим ёки ота-онасининг қарамоғидан маҳрум бўлган 16 нафар, “Ёшлар дафтари” жамғармасидан оилавий шароитлари оғир бўлган 142 нафар хотин-қизларнинг контракт пуллари тўлаб берилди. Туман Оила ва хотин-қизлар бўлими тавсияси асосида 11 нафар хотин-қизлар Олий таълим муассасаларига давлат гранти асосида талабаликка қабул қилинди.

Билиб-билмай жиноят йўлига кириб қолган 3 нафар хотин-қизлар Оила ва хотин-қизлар бўлимининг кафиллиги асосида қамоқ жазосидан сақлаб қолинди ва соғлом турмуш тарзига қайтарилди. Бу каби юзлаб мисоллар мамлакатимизда аёл-қизларга берилаётган эътиборнинг ёрқин ифодасидир. Ушбу йўналишдаги ишлар “Инсонга эътибор ва сифатли таълим йили” дея номланган жорий йилда ҳам узлуксиз давом эттирилади.

Ҳурматли онахонлар, опа-сингиллар, мунис аёллар!

Бугун барча соҳаларда илғор ва жонкуяр аёлларимиз ўзларнинг бор куч-ғайрати билан давлат равнақи ва халқ фаровонлигига муносиб ҳисса қўшиб келмоқдалар. Иқтисодий ёки ижтимоий йўналишдаги қайси соҳани олиб қарамайлик, ўз касбининг ҳақиқий эгаси, ўз ишининг билимдони бўлган фаол аёлларни учратишимиз мумкин.

Нуроний момоларимизнинг панд-насиҳатларини, таълим-тарбиясини олган оқила ва интилувчан қизларимиз эса илм-фан чўққиларини эгаллаб, спортда, маданият ва санъатда улкан ютуқларни қўлга киритмоқдалар.

Кечагина ана шундай иқтидорли қизларимиздан бири юксак давлат мукофоти билан тақдирланиб, бутун амударёликларнинг қувончига сабабчи бўлди. Президентимизнинг 6 март кунги қарорига кўра туманимиздаги 35-сонли мактабнинг 11-синф ўқувчиси Самандарова Барно Тозабой қизи Зулфия номидаги Давлат мукофоти билан тақдирланди.

Ўзининг иқтидори, изланувчанлиги, муҳим ғоя ва ташаббуслари, ибратли амалий ишлари ва эришган ютуқлари билан юртимиз ёшларига ўрнак бўлиб келаётган Зулфияхоним издошлари қаторидан Амударё туманининг чекка овулида туғилиб ўсган Барно Самандаровадек ҳамюртимизнинг ҳам жой олгани барчамизга ғурур ва фахр-ифтихор бағишлайди.

Фурсатдан фойдаланиб, Барно Самандарованинг ота-онаси ва яқинларини, ўқитувчилари, устоз ва мураббийларини фарзанди ва шогирдининг ушбу юксак давлат мукофотига сазовор бўлгани билан чин қалбимдан табриклайман! Барно каби иқтидорли ва интилувчан қизларимиз сафи кўпаяверсин!

Муҳтарама аёллар, қадрли опа-сингиллар!

Бугунги қутлуғ сана – Халқаро хотин-қизлар куни билан яна бир бора барчангизни табриклаб, Сиз азиз ва муҳтарама аёл-қизларимизга дунёдаги энг эзгу тилакларни тилайман! Барчангизга оилавий хотиржамлик, хонадонларингизга тинчлик, файзу барака тилайман. Халқимизнинг, давлатимизнинг, яқинларингизнинг ғамхўрлиги, меҳру-муҳаббати ва ардоғида яшаш бахти Сизни ҳеч қачон тарк этмасин! Байрамингиз муборак бўлсин, қадрли онахонлар, азиз опа-сингиллар ва дилбар қизлар!