НАМУНАЛИ ТОМОРҚА ЕР ЭГАЛАРИ ТАЖРИБАСИ ОММАЛАШТИРИЛМОҚДА
Мамлакатимизда томорқа хўжалигини ривожлантиришга қаратилаётган эътибор туфайли сўнгги йилларда ички бозорни сархил мева-сабзавотлар, полиз маҳсулотлари билан таъминлаш яхшиланиб, айни дамда илғор томорқа ер эгалари ўзлари етиштирган маҳсулотлари билан қўшни вилоятлар ва туманлар бозор расталарини ҳам тўлдиришмоқда. Ҳатто ишнинг кўзини биладиган тадбиркор томорқачилар йилнинг тўртта фаслида ҳам турли хил сабзавотлар, цитрус мевалар етиштириб, эл-юрт фаровонлигига муносиб ҳиссаларини қўшмоқдалар.
Амударё туманида ҳам бу борада самарали ишлар амалга оширилиб, туман Фермер, деҳқон хўжаликлари ва томорқа ер эгалари Кенгаши етакчи мутахассислари томонидан энг чекка ҳудудлардаги томорқа ер эгаларига назарий ва амалий ёрдам кўрсатиб келинмоқда. Хусусан, томорқа ер эгаларига ердан унумли фойдаланишлари учун уларни сифатли уруғликлар, ўғит ва кўчатлар билан таъминлаш, тажрибали томорқачилар фаолиятини кенг оммалаштириш, пишиқчилик мавсумида етиштирилган ҳосилни нест-нобуд қилмай йиғиштириб олиб, ички ва ташқи бозорга йўналтириш бўйича амалий ёрдам ва маслаҳатлар берилиб келинмоқда.
Айни пайтда Амударё туманидаги мавжуд томорқа ер майдонларидан унумли фойдаланиш мақсадида Фермерлар, деҳқон хўжаликлари ва томорқа ер эгалари Кенгаши томонидан 2023 деҳқончилик йили учун аниқ ва пухта режа ишлаб чиқилиб, ҳар бир қарич ердан унумли фойдаланишга қаратилган чора-тадбирлар асосида иш олиб борилмоқда. Унга кўра, жорий 2023 йилда тумандаги мавжуд 5807 гектар томорқа ер майдонлари хатловдан ўтказилиб, ҳудудлар бўйича ушбу ер майдонларининг шароитлари мутахассислар томонидан пухта ўрганиб чиқилди ва баҳорги экиш ишлари режалаштирилди. Режага мувофиқ 2731 гектар ерга турли хил сабзавот, 758 гектар томорқа ерларига полиз, 869 гектар ерга картошка, 422 гектар дуккакли, 160 гектар мойли ва 865 гектар бошқа зарур экинлар экиш белгиланди.
Айниқса, аҳоли томорқасидан самарали фойдаланиш, йил давомида камида 2-3 марта ҳосил олиш, қишлоқ хўжалиги маҳсулотлари ишлаб чиқариш ҳажмини камида 1,5 баравар кўпайтириш мақсадида Фермерлар, деҳқон хўжаликлари ва томорқа ер эгалари Кенгаши мутахассислари томонидан амалга оширилаётган назарий ва амалий тадбирлар муҳим аҳамият касб этмоқда.
Холимбег овулида Кенгаш томонидан ташкил этилган, ер билан тиллашиб, ўз оиласи ва эл-юрт фаровонлигига муносиб ҳиссасини қўшаётган илғор, намунали томорқа ер эгалари тажрибаларини оммалаштиришга бағишланган тажриба алмашув семинари иштирокчилари бунинг яққол гувоҳи бўлдилар. Тажриба алмашув семинари Холимбег овулидаги намунали томорқаси Эркинбой Қўшаевнинг хўжалигида ўтказилди.
“Намунали томорқачи” кўкрак нишони соҳиби Эркинбой Қўшаев асосий томорқа еридан йил давомида 2-3 марта ҳосил йиғиб олади. Даромади ҳам шунга яраша. Томорқа ер атрофида саф тортган мевали дарахтлар, узум токлари, чорва-ю паррандасининг баракасидан уй-жойини замонавий қиёфага келтирди, фарзандларини ўқитди, янги автомобиль эгаси бўлди. Муҳими, бутун оила аъзоларининг доимий иш билан бандлиги таъминланди.
Фермерлар, деҳқон хўжаликлари ва томорқа ер эгалари Кенгаши мутахассислари, Холимбег овулига бириктирилган ҳоким ёрдамчиси ва малакали агрономлар ва томорқа ер эгалари иштирок этган мазкур тажриба алмашув семинарида Эркинбой Қўшаевнинг 1 сотихли лимончилик иссиқхонасида амалга оширилаётган зироатчилик тажрибаси оммалаштирилди. Хусусан, қаҳратон қиш ойларида ушбу цитрус мева ниҳолларини парваришлаш, иссиқхонада мўътадил иқлим шароитини яратиш, сархил лимон меваларини етиштириш бўйича Эркинбой Қўшаевнинг тажрибасини туманнинг бошқа ҳудудларидаги томорқачилар фаолиятига кенг жорий этиш бўйича чора-тадбирлар ҳам белгиланди.
Шунингдек, тажриба алмашув семинари давомида иштирокчилар овул ҳудудидаги “Худойберганов Феруз” томорқа хўжалигини ҳам бориб кўрдилар. 3 сотихли иссиқхонасида сабзавот ва полиз экинларининг кўчатларини етиштираётган Феруз Худойберганов ўз тажрибасини овулдаги бошқа томорқачиларга ҳам ўргатиб келмоқда. Намунали томорқачи ўзи эришаётган ютуқларнинг барчаси оилавий бирдамлик, меҳнатни тўғри ташкил этишда эканлигини, айни пайтда қишлоқдошларига ўз тажрибаларини ўргатаётгани, ердан унумли фойдаланиш инсоннинг жамики эзгу ниятларини амалга оширишида муҳим аҳамият касб этиши ҳақида тажриба алмашув семинари иштирокчиларига батафсил маълумот берди.
Бўлиб ўтган тажриба алмашув семинарида “Томорқа – кони фойда”, деган халқ эътирофи жойларда ўз ифодасини топиб, халқимизнинг ерга муносабати, мулкка эгалик туйғуси тобора мустаҳкамланиб бораётгани амалда намоён бўлди.
Робий ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
