“Буюк сиймолар” номли адабий кеча бўлиб ўтди

Мана орадан беш асрдан ортиқ вақт ўтибдики, улуғ мутафаккир боболаримиз, сўз мулкининг султони Алишер Навоий ҳамда шоҳ ва шоир Заҳириддин Муҳаммад Бобурнинг бой маънавий мероси бутун дунёни ҳайратга солиб, инсонлар қалбига, онгу шуурига эзгулик, инсонпарварлик, саховат ва меҳр-мурувват нурини таратиб келмоқда.

Шу кунларда юртимизда Алишер Навоий таваллудининг 582 ҳамда Заҳириддин Муҳаммад Бобур таваллудининг 540 йиллиги кенг нишонланмоқда. Амударё тумани Ахборот-кутубхона марказида бўлиб ўтган “Буюк сиймолар” номли адабий кеча ҳам Алишер Навоий ва Заҳириддин Муҳаммад Бобур ҳаёти ва ижодига бағишланди.

Тадбирда сўзга чиққанлар ҳар икки ижодкор дунё адабиёти тарихида жуда катта ўрин тутишини, халқпарвар давлат арбоби сифатида жамиятда тутган юксак мавқеи жиҳатидан ҳам, илм-фан, маданият ва санъат, адабиёт аҳлига кўрсатган ҳомийлиги жиҳатидан ҳам ўхшаши йўқ сиймо эканлигини, улар бугун ўзбек халқининг миллий ифтихорига, адабий, маънавий камолот тимсолига айланганлигини таъкидлади.

Тадбирда Ахборот-кутубхона марказининг китобхонлари, 3-сонли умумтаълим мактабининг фаол ўқувчилари ўзларниниг тайёрлаб келган саҳна кўринишлари, рақсалари билан иштирок этишди.

Тадбир дўстона ва кўтаринки руҳда бўлиб ўтди.

Ахборот кутубхона маркази томонидан ташкил қилинган кўргазма ўқувчиларда ўзгача қизиқиш ва таассурот қолдирди.

Сабаби, Бобур ҳаётини тўлақонли акс эттирувчи “Бобурнома”, XV-XVI асрларда замонасининг машҳур шоирлари томонидан ёзилган қўлёзмаларнинг нусхалари ўқувчиларни ХV аср томон етаклади.

Тадбир давомида ўқувчилар 12 ёшидан бошлаб давлатни бошқарган буюк саркарданинг Алишер Навоийдан кейинги бетакрор сиймо эканлигини янада теран ҳис қилдилар. Ўтказилган ушбу тадбир орқали Бобурнинг ҳаёт йўли, бошидан кечирган қийинчиликлари ва ундан чиқарган хулосалари ўқувчиларга ҳар томонлама ўрнак ва намуна бўлди десак, адашмаган бўламиз. Ўқувчилар тадбирда Заҳриддин Муҳаммад Бобур ва Алишер Навоий ижодидан намуналар ўқишди. Ғазал ва рубоийларнинг маънолари шархладилар.

Шундан сўнг, мумтоз куй ва қўшиқлар ижро этишиб, рақсларга тушишди.

Навоий ва Бобурнинг ҳаёти ва ижодини ўрганар эканмиз, улар умри давомида халққа хизмат қилиб, бунёдкорлик, яратувчанлик ишларида шахсий ибрат кўрсатганини янада ёрқинроқ билиб оламиз. Улар барча асарларида ана шу эзгу ғояларни тарғиб этди.

Халқимиз маънавий дунёсининг юксалишига улкан ҳисса қўшган икки буюк шахс – Алишер Навоий ва Заҳириддин Муҳаммад Бобур таваллуди муносабати билан ташкил этилган тадбирда китобхон ёшлар ва умумтаълим мактаби ўқувчилари ўзаро фикр алмашиб икки буюк сиймонинг бой меъросидан баҳраманд бўлдилар.

Тадбир якунида бадиий кечада иштирок этган барча ўқувчилар фахрий ёрлиқ ва эсдалик совғалари билан тақдирланишди.

Туман ҳокимлигининг Ахборот хизмати.