Умумтаълим мактаблари раҳбарлари учун “Замонавий мактаб лидерлари” нигоҳида мавзусида семинар-тренинг ўтказилди

Жорий йилнинг 7 февраль санасидан 10 февралигача Мактабгача ва мактаб таълими вазирлиги тизимидаги ихтисослаштирилган таълим муассасалари агентлиги томонидан “Замонавий мактаб лидерлар нигоҳида” лойиҳаси доирасида семинар-тренинглар ташкил этилиб, унда Агентлик тизимидаги мактаблар директорлари, умумтаълим мактаблари раҳбарлари иштирок этишди.

Тадбир иштирокчилари ихтисослаштирилган мактаб раҳбарлари билан мактабни бошқариш, муаммоларни жамоавий ҳал этиш, ўқувчиларнинг таълими учун муҳим омиллар борасида фикр ва тажриба алмашдилар.

Амударё туманидаги Халқ таълими бўлимига қарашли умумтаълим мактаблари директорлари учун 9 февраль куни Президент таълим муассасалари Агентлиги тизимидаги аниқ ва табиий фанларга ихтисослаштирилган махсус мактабда ташкил этилган семинар-тренинг ҳам қизғин баҳс-мунозараларга бой тарзда ўтди.

Тадбирни ўтказишдан кўзланган мақсад – Ихтисослаштирилган ва Президент таълим муассасалари тажрибасини ўқитиш ва таълим-тарбия услубини барча мактабларга жорий этишга қаратилгани боис, мактабларнинг раҳбарлари жараёнида фаоллик билан иштирок этишди.

Хусусан, таълим ва тарбиянинг узвийлигини таъминлашга қаратилган ҳурмат ва эътирофга эҳтиёж хавфсизликка эҳтиёж, ривожланиш ва яратувчанликка эҳтиёж, ижтимоий муносабатга эҳтиёж, физиологик эҳтиёж мавзуларига оид баҳс-мунозараларда деярли барча мактабларнинг раҳбарлари ўз шахсий фикр ва муносабатларини билдирдилар.

Семинар-тренингда мактабгача ва мактаб таълими тизимидаги ўқув муассасалари ўқитувчиларига қўйиладиган касбий таълим самарадорлигини таъминлаш, айниқса, ўқувчининг қизиқишлари ва эҳтиёжини ҳисобга олган ҳолда таълим дастурларини ишлаб чиқиш ҳамда амалга ошириш бўйича фикр ва тажриба алмашув жараёнлари қизиқарли таассуротларга бой бўлди.

Икки соатга мўлжалланган ва тўртта топшириқдан иборат бўлган семинар-тренингда биринчи галда соҳа вазирлиги томонидан илгари сурилаётга олий мақсад – Ихтисослаштирилган ҳамда Президент таълим муассасалари тажрибасини барча мактабларда кенг жорий этиш масаласини ҳар бир мактаб раҳбарининг чуқур англашини таъминлаш бўлиб, буни иштирокчилар мамнуният билан ўз фаолиятларида жорий этишга жиддий ҳаракат қилаётганликларини билдиришди.

Иккинчи топшириқ – бола ҳуқуқлари Конвенциясини таҳлил этиш, мактабларда замонавий талаб ва қадриятларни уйғунлаштиришда энг самарадор тизимни қўллашида эътибор бериш керак бўлган жиҳатлар бўлса, учинчи топшириқ битирувчи портрети ва замонавий ўқитувчи портрети қандай, замонавий ўқувчи ва замонавий ўқитувчи деганда кўз олдимизда қандай инсон намоён бўлиши хусусида бўлди. Тўртинчи топшириқ – барча топшириқлар ичида устувор йўналиш ҳисобланиб, таълим ва тарбия соҳасида ҳақиқий шаффофликни таъминлашга эришишдан иборат бўлди.

Семинар-тренинг давомида мактабларнинг раҳбарлари нафақат тажриба ва фикр алмашдилар, балки бугунги давр талаблари даражасида таълим сифатини ошириш бўйича нималарга эътибор қилиш кераклигини, бу борада давлатимиз томонидан қўйилаётган талабларни ҳам тушуниб олишларида муҳим аҳамиятга эга бўлган касбий тушунчаларга ҳам эга бўлдилар.

Робия ЙЎЛДОШЕВА.