САЙЁР ҚАБУЛДА УЙШИНЛИКЛАРНИНГ МУРОЖААТЛАРИ ТИНГЛАНИБ, МУАММОЛАРИ ЎРГАНИЛДИ

Уйшин маҳалласида туман ҳокими, 1-сектор раҳбари Султонбой Йўлдашевнинг сайёр қабули бўлиб ўтди. 12 январь куни маҳалла фуқаролар йиғини биносида бўлиб ўтган сайёр қабулда Президентнинг тумандаги Халқ қабулхонаси бўлими мудири Эркин Ражабов, Ёшлар ишлари агентлиги туман бўлими бошлиғи Сардор Исмаилов ҳамда фуқаролар йиғини масъуллари, фаоллари ва 30 нафарга яқин фуқаролар иштирок этишди.

Тадбирни Президентнинг тумандаги Халқ қабулхонаси бўлими мудири Эркин Ражабов очиб берди ва халқ билан яқин бўлиш, муаммоларини ўрганиб, ёрдам кўрсатиш мақсадида сайёр қабул ва турли учрашувлар ўтказилаётганини, бу ўзининг ижобий самарасини бераётганини айтиб ўтди.

Туман ҳокими Султонбой Йўлдашев ҳам ҳудудларни ижтимоий-иқтисодий ривожлантириш борасида олиб борилаётган ишлар хусусида сўзлаб, халқ орасида бўлиш, аҳоли билан юзма-юз мулоқот қилиш, уларнинг дард-у ташвишларини тинглаш, муаммоларни ўрганиш ва уларни бартараф этиш, маҳаллабай тизимида иш юритиш кабилар Давлатимиз раҳбари томонидан ташкил этилган секторлар ва бошқа мутасадди идоралар раҳбарлари зиммасидаги асосий вазифа эканлигини таъкидлади.

Шунингдек, Президентимизнинг “2022-2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги Қарорига асосан туманимизнинг барча ҳудудларида аҳолини қийнаётган муаммоларни бартараф этиш ва инфратузилмани ривожлантириш мақсадида пул маблағлари ажратилиши белгиланганлиги, ажратилган маблағларни сектор ҳудудидаги овул ва маҳаллаларда босқичма-босқич ички йўлларни таъмирлаш, фуқаролар йиғини маъмурий бинолари ва спорт майдончаларини янгидан қуриш, электр тармоқларини тортиш кабиларга сарфлаш режалаштирилганини айтиб ўтди.

Қабул давомида сўзга чиққан маҳалладаги ҳоким ёрдамчиси ва ёшлар етакчиси аҳоли турмушини яхшилаш, айниқса, юртимиз келажаги бўлган ёшларни ҳар томонлама қўллаб-қувватлаш, уларнинг орзу-мақсадларини рўёбга чиқаришларига имконият яратишга доир масалаларга ҳам алоҳида эътибор қаратилаётганини гапириб, бу борада ҳудудда бажарилган амалий ишлар хусусида маълумот бериб ўтишди.

Мавжуд муаммоларни аниқлаш, уларни бевосита жойида бартараф этиш юзасидан аниқ ва тезкор чоралар кўриш мақсадида ўтказилган сайёр қабулда фуқаролардан турли масалалар юзасидан мурожаатлар келиб тушди. Мурожаатлар асосан моддий ёрдам, фарзандининг олий таълимда ўқиши учун контракт пули, бола пули, кадастр ҳужжатлари, субсидия асосида тикув машинаси бериш, муддатли ҳарбий хизматни ўташ учун бадал пулини қоплашга кўмаклашиш каби масалаларда бўлди.

Мурожаатларга кўра маҳалла фуқаролари Адолат Турсунбоевага олий таълимда ўқиши учун контракт пулини тўлашда, Назира Ситбоевага субсидия асосида тикув машинасини олишда, Қаҳрамон Ҳайитбоевга муддатли ҳарбий хизматни ўташ учун бадал пулини қоплашда кўмаклашиладиган бўлди. Мурожаатлар ижросини туман ҳокими ўз назоратига олди.

Сектор раҳбари ҳудуд аҳолисини қийнаб келаётган муаммоларни бартараф этиш, керакли чораларни кўриш бўйича ҳам тегишли мутасаддиларга аниқ топшириқлар берди.

О.Худойберганова.