Амударё тумани ҳокими Султонбой Йўлдашевнинг Янги йил байрами муносабати билан туман аҳлига табриги

Ассалому алайкум, қадрли юртдошлар!

Бетакрор диёримизда Янги йил шукуҳи кезиб юрган шу кунларда Сиз азизларни, Сизлар орқали барча амударёликларни, юртдошларимизни байрам билан қутлашдан мамнунман!

Халқимиз ҳар йил якунида жорий йилда қўлга киритилган ютуқлар ва эришилган натижаларни сарҳисоб қилиб, келгуси йилга янги режалар тузишга одатланган. Якунига етаётган йилни таҳлил қилар эканмиз, 2022 йил мамлакатимиз тарихида ўзига хос из қолдирадиган давр бўлди, десак янглишмаган бўламиз. Ислоҳотларнинг янги босқичи сифатида жорий йил бошида Президентимиз Фармони билан 2022-2026 йилларга мўлжалланган Янги Ўзбекистоннинг тараққиёт стратегияси тасдиқланди.

Амударё туманида ҳам инсон қадрини юксалтириш ва иқтисодиётимизни жадал ривожлантириш борасида йил давомида тизимли ишлар амалга оширилди. Жумладан, маҳалла институти фаолиятининг самарадорлигини ошириш мақсадида 49 та овул ва маҳаллаларимизда ҳоким ёрдамчилари, хотин-қизлар фаоллари ва ёшлар етакчилари иш бошлади.

Ҳудудларда аҳолини тадбиркорликка кенг жалб қилиш мақсадида оилавий тадбиркорликни ривожлантириш дастури доирасида 3 минг 477 нафар фуқарога жами 72,2 млрд. сўм имтиёзли кредитлар ажратилди. Аҳолининг яшаш шароитларини яхшилаш мақсадида Президентимизнинг биргина 2022 йил 25 октябрдаги қарорига мувофиқ туманимиз ҳудудида умумий қиймати 22 миллиард 209 миллион сўмлик қурилиш-таъмирлаш ишлари амалга оширилмоқда.

2022 йилда туман бўйича барча манбалар ҳисобидан 77 та объектларда умумий қиймати 112,7 млрд. сўмлик қурилиш-таъмирлаш ва реконструкция ишлари амалга оширилди. Ҳудудларимизга 4,7 км узунликда пиёдалар ва саломатлик йўлакчалари қурилди, 4 та маҳалланинг марказий кўчаларига кўча ёриткичлари ўрнатилди. 71 км узунликдаги маҳаллий аҳамиятдаги ва ички йўллар таъмирланиб, Гулзор маҳалласи ҳудудида 5 та 5 қаватли уй-жойлар қуриб битказилди ва фойдаланишга топширилди.

2022 йил давомида тумандаги 3 та мактаб ҳамда 5 та давлат, 3 та оилавий нодавлат мактабгача таълим ташкилотлари бинолари реконструкция қилиниб, 3 та мактаб бинолари жорий таъмирланди. Яратилган шароитлар ва соҳага берилаётган эътибор туфайли умумтаълим мактабларида 4 минг 64 нафар ўқитувчи 38 минг 476 нафар ўқувчига сифатли таълим-тарбия бериб келмоқда. Туман бўйича боғча ёшидаги болаларни қамраб олиш кўрсаткичи 71 фоизга етди.

Аҳолига кўрсатилаётган тиббий хизмат сифатини ошириш мақсадида Тўлқин, Қизилчоли овулларидаги оилавий шифокорлик пунктлари ҳамда 71-сонли оилавий поликлиника бинолари таъмирланди. 15 млрд. сўм маблағ эвазига 90 ўринли янги  туғруқ бўлими биносини қуриш ишлари давом этмоқда.

Деҳқон ва фермерларимизнинг фидокорона меҳнатлари эвазига жорий йилда 12 минг 832 тонна дон, 44 минг 844 тонна пахта ҳосили олинди. Деҳқон ва томорқа хўжаликларида етиштирилган минглаб тонна ғалла, сабзавот ва полиз экинлари, мевалар ҳамда бошқа қишлоқ хўжалиги маҳсулотлари бозорларимиз тўкинлиги, нарх-навонинг барқарорлигини таъминлашда муҳим аҳамият касб этмоқда.

Қадрли юртдошлар!

Муҳтарам Президентимиз яқиндагина Олий Мажлис ва Ўзбекистон халқига Мурожаатномасида келгуси йилга “Инсонга эътибор ва сифатли таълим йили” деб ном бериб, 2023 йилдаги устувор йўналишларни белгилаб бердилар.

Келгуси йилда ҳам туманимизда аҳолининг яшаш шароитларини яхшилаш, янги иш ўринларини яратиш, таълим сифати ва самарадорлигини янги босқичга олиб чиқиш ва ҳудудларни ҳар томонлама ривожлантириш бўйича қатор ишларни амалга ошириш режалаштирилмоқда.

Азиз юртдошлар!

Фурсатдан фойдаланиб, барчангизни кириб келаётган Янги йил байрами билан чин қалбимдан табриклайман! 2023 йил халқимиз фаровонлиги ҳамда жонажон Ватанимиз ривожи йўлида туб бурилишлар рўй берадиган йил бўлишига тилакдошман.

Янги йилда кўнгилларимизни хотиржамлик, хонадонларимизни тинчлик-осойишталик, дастурхонлари-мизни тўкинлик, озод ва обод юртимизни файз ва барака тарк этмасин!

Янги йилингиз муборак бўлсин, азиз юртдошлар!