БЕШТОМ МАҲАЛЛАСИДАГИ 24-СОНЛИ МАКТАБДА ҚОРАҚАЛПОҚ ТИЛИ БАЙРАМИГА БАҒИШЛАНГАН ТАДБИР ЎТКАЗИЛДИ
Республикамизда 1 декабрь – қорақалпоқ тилига давлат тили мақоми берилган кун, қорақалпоқ тили байрами сифатида кенг нишонланади. Жорий йилда ҳам ушбу санага 33 йил тўлгани муносабати билан катта байрам тадбирлари ташкил этилди.
Амударё туманининг Бештом маҳалласидаги қозоқ ва ўзбек тилига ихтисослашган 24-сонли мактабда қорақалпоқ тили байрамига бағишланган тантанали тадбир ўтказилди. Мактабнинг қорақалпоқ тили фани ўқитувчилари ва ўқувчилар томонидан тайёрланган ушбу тадбирда туман ҳокимлиги, туман Маънавият ва маърифат маркази маъсул ходимлари ҳам иштирок этишди. Тадбирни мактабнинг ижодий-маданий масалалар бўйича тарғиботчиси Гулойим Умирбекова очиб берди ва барчани байрам билан табриклади.
Айтиш жоизки, мазкур мактабда 333 нафар ўқувчига 48 нафар малакали педагоглар томонидан замонавий технологиялар асосида таълим-тарбия бериб келинмоқда. Ўзбек ва қозоқ тилига ихтисослашган ушбу мактабда икки навбатда 11 та синфда ўзбек ва 9 та синфда қозоқ тилларида таълим берилмоқда. Тажрибали ўқитувчилардан билим олаётган ўқувчилар туман ва республика миқёсида ўтказилиб келинаётган турли тадбир ва танловларда иштирок этиб, ютуқ ва муваффақиятларга эришиб келишмоқда.
Тадбирда мактабнинг қорақалпоқ тили фани ўқитувчиси Қамашай Жағалова сўзга чиқиб, маъруза қилди ва давлат томонидан тилни ривожлантириш борасида олиб борилаётган ишларга кенг тўхталиб ўтди. Дунёнинг ривожланган давлатларида давлат тилимиз халқаро лойиҳалар асосида тадқиқ этилаётгани, Туркиянинг Измир университетида қорақалпоқ тили ўргатилаётганини фахр билан эътироф этди. Шунингдек, янги лотин графикаси асосида қорақалпоқ тили имло луғати чоп этилгани, Навоий давлат педагогика институтида қорақалпоқ тили ва адабиёти йўналиши очилгани, Қуръон маънолари ва бошқа бир қатор диний китобларнинг қорақалпоқ тилидаги таржималари нашр қилингани, бу давлат тилимизга, халқимиз маънавиятига қаратилаётган юксак эътибор ва ғамхўрлик намунаси эканлигини тўлқинланиб сўзлади.
Шундан сўнг, мактаб ўқувчилари томонидан қорақалпоқ тилида шеърлар, қўшиқлар ижро этилди. Миллий рақслари ва қизиқарли саҳна қўринишларини намойиш этиб, тадбирга ўзгача файз бахш этишди. Қорақалпоқ халқ шоирлари ижодидан намуналарни ифодали тарзда айтиб беришди. Тадбир давомида иншолар танлови ўтказилди ва ғолиблар шу ернинг ўзида аниқланиб, фахрий ёрлиқ ва ташаккурномалар билан тақдирландилар.
Тадбирга ташриф буюрган туман ҳокимлиги, Маънавият ва маърифат маркази масъуллари ҳам сўзга чиқиб, юртимизда давлат тили бўлган қорақалпоқ тилини ривожлантиришга қаратилаётган алоҳида эътибор, ушбу тилда ижод қилиб, бадиий асарлар яратган буюк адиблар ҳақида сўзлашди. Ундан ташқари, давлатимиз раҳбарининг ташаббуси билан Ибройим Юсупов номидаги қорақалпоқ тили ва адабиёти фанини чуқур ўрганишга ихтисослаштирилган ижод мактабининг очилганини, Чимбой туманида қорақалпоқ адабиётининг забардаст вакиллари Кунхўжа ва Бердақ шоирларнинг хотирасига мақбара ва музей қурилгани, улуғ шоирлар Бердақ, Ажиниёз ва Ибройим Юсуповлар асарларини кенг кўламда ўрганилаётганини алоҳида қайд этишди.
Қизиқарли ўтган тадбир давомида ўқувчилар қорақалпоқ тилининг халқимиз ижтимоий ҳаётидаги обрўси ва нуфузини янада ошириш, ўсиб келаётган ёш авлодни ватанпарварлик, миллий қадриятларга садоқат руҳида тарбиялаш, юртимизда давлат тилини тўлиқ жорий қилишни таъминлаш бўйича амалга оширилаётган ишлар ва шу каби бошқа маълумотларга эга бўлишди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
