2022 йилнинг 9 ойини туман маҳаллий бюджети 56 млрд 322,8 млн сўм даромад билан якунлади

5 декабрь куни Амударё туман ҳокимлиги мажлислар хонасида Халқ депутатлари туман Кенгашининг маҳаллий бюджет, иқтисодий ислоҳотларни амалга ошириш, инвестициялар ва тадбиркорликни ривожлантириш масалалари бўйича доимий комиссиясининг йиғилиши бўлиб ўтди.

Йиғилишда Қорақалпоғистон Республикаси Жўқорғи Кенгеси, халқ депутатлари Амударё туман Кенгаши депутатлари, ҳокимлик маъсул ходимлари, корхона, ташкилотлар ва овул, маҳалла фуқаролар йиғинлари раислари, оммавий ахборот воситалари ходимлари иштирок этди.

Йиғилишда “Амударё тумани маҳаллий бюджетининг 2022 йил 9 ойи давомидаги ижроси тўғрисида”ги масала кўриб чиқилди.

Кун тартибидаги масала юзасидан туман молия бўлими мудири ўринбосари Абай Сағинбаев ҳисобот берди. Ҳисоботда таъкидланишича, туман маҳаллий бюджетининг даромадлар қисми режаси 52 млрд 749,3 млн сўмга белгиланган бўлиб, хақиқатда 56 млрд 322,8 млн сўмга, яъни 106,8 фоизга бажарилган. Бу режага нисбатан 3 млрд 573,5 млн сўмга ортиқ деганидир.

2022 йил 9 ойи давомида бюджет харажатлари режаси киритилган ўзгаришлардан кейин жами 214 млрд 759,4 млн сўмни ташкил қилган. Ҳисобот даврида бюджет ҳисобидан жами 213 млрд 77,9 млн сўмлик маблағлар сарфланган.

Жумладан, қишлоқ хўжалиги ва ободонлаштириш соҳасига жами 14,2 млрд сўм сарф қилинган. Бу жами бюджет харажатлари ҳажмининг 6,6 фоизини ташкил қилади. Мактабгача таълим соҳасига жами 15,2 млрд сўм, ёки жами бюджет харажатлари ҳажмининг 7,12 фоизи, таълим соҳасига эса 8,8 млрд сўм, ёки жами бюджет харажатларининг 4,11 фоизи сарфланган.

Бундан ташқари, маданият ва спорт соҳасига жами 4,33 млрд сўм, соғлиқни сақлаш соҳасига жами 63,3 млрд сўм, ижтимоий таъминот соҳасига жами 79,2 млрд сўм маблағ сарфланган. Шунингдек, ижтимоий қўллаб-қувватлаш жамғармаси, “Ёшлар дафтари” ва “Аёллар дафтари” харажатлари учун жами 595 миллион 200 минг сўм сарф-харажат қилинган.

Давлат бошқарув органларини сақлаш учун салкам 11 млрд сўм сарфланган. Бу жами бюджет харажатлари ҳажмининг 5,15 фоизини ташкил қилади. Шунингдек, фуқароларнинг ўзини ўзи бошқариш органлари соҳасига жами 3,7 млрд сўм, захира жамғармаси маблағари учун жами 1,8 млрд сўм, фуқаролар ташаббусли жамғармаси маблағлари учун 10,2 млрд сўм, бошқа харажатлар учун эса 849 млн 445 минг сўм сарф-харажат қилинган.

Халқ депутатлари Амударё туман Кенгашининг ва туман хокимининг тегишли қарор ва фармойишлари асосида бюджет маблағлари тасдиқланган режасидан ташқари йил бошидаги эркин қолдиқ маблағлари ҳисобидан жами 764 млн 989 минг сўм сарфланган. Қорақалпоғистон Республикаси ва туман маҳаллий бюджетлари даромадлар режасининг ортиқча бажарилган қисми маблағлари ҳисобидан эса жами 4 млрд 41,9 млн сўм сарфланган.

Йиғилишда туман маҳаллий бюджетининг 9 ойи давомидаги ижроси юзасидан депутатлар ва доимий комиссия йиғилиши иштирокчилари ўз фикр ва мулоҳазаларини билдириб, саволлар билан мурожаат қилдилар ва тегишли жавоблар олдилар.

Ойгул Ражабова