18-сонли мактабда “English party” деб номланган тадбир ўтказилди
Кейинги йилларда жамиятнинг турли соҳаларидаги тараққиёт натижасида чет тилларини биладиган мутахассисларга бўлган талаб ортиб, чет тилиларнинг ўрни тобора мустаҳкамланиб бормоқда. Жаҳонга юз тутган илғор давлатлар меҳнат бозорининг асосий талаби − чет тилида бемалол мулоқот қила оладиган, компьютер технологияларидан хабардор, инновацион ғояларга бой ва ўз услубига эга бўлган кадрлардир. Шу сабабли ҳам бугунги кунда мамлакатимизда чет тилларини ўрганиш ва ўргатишга бўлган эътибор ҳар қачонгидан ҳам кучлироқдир.
Қолаверса, халқимизда қадимдан “Тил билган – эл билар” деган нақл бор. Ўз она тилидан ташқари бошқа халқлар тилини ўрганган инсоннинг дунёқараши, фикрлаш доираси кенг бўлибгина қолмай, ўша халқнинг урф-одати, маданияти билан танишиш имкониятига ҳам эга бўлади.
Ўзбекистон Республикаси Президентининг “Ўзбекистон Республикасида хорижий тилларни ўрганишни оммалаштириш фаолиятини сифат жиҳатидан янги босқичга олиб чиқиш чора-тадбирлари тўғрисида” қарори ҳам айнан шу мақсадларга қаратилган бўлиб, мазкур ҳужжат хорижий тилларни ўрганиш ва ўргатиш даражасининг янада ошишида муҳим восита бўлиб хизмат қилмоқда.
Умумтаълим мактабларида ноябрь ойи хорижий тиллар ойлиги деб эълон қилингани эса ўқувчиларнинг чет тилларини ўрганиш кўникмаларини янада оширишда муҳим восита бўлиб хизмат қилмоқда.
26 ноябрь куни Амударё тумани Халқ таълими бўлимига қарашли 18-сонли умумтаълим мактабида хорижий тиллар фан ойлиги доирасида “English party” деб номланган тадбир ўтказилди.
Тадбирда мактабнинг илмий ва маънавий-маърифий ишлар бўйича директор ўринбосарлари, фан ўқитувчилари, ўқувчилар иштирок этишди.
Тадбирни мактабнинг маънавий ва маърифий ишлар бўйича директор ўринбосари Нурулла Хўжаметов очиб берди ҳамда ўқувчиларга хорижий тилларни ўрганишнинг афзалликлари, тил билган инсон қандай муваффақиятларга эришиши мумкинлигига ҳаётий мисоллар орқали тўхталиб ўтди.
Тадбирда мактаб ўқувчилари ўзларининг тайёрлаган гўзал рақслари, саҳна кўринишларини иштирокчилар эътиборига ҳавола қилишди.
Мактабнинг 7-синф ўқувчилари томонидан “Шолғом” эртаги инглиз тилида намойиш этилгани барча ўқувчиларда катта таассурот қолдирди. 10-синф ўқувчилари эса инглиз тилида ўқувчиларнинг талаффузида рўй бериб турадиган муаммоларни ҳажвий тарзда намойиш қилиб, барчанинг кайфиятини кўтаришди.
Тадбир якунида мактабнинг 1-тоифали инглиз тили фани ўқитувчилари Дилафрўз Тўраева ва Санъат Жумамурадовлар ўқувчиларга ўзлариниг энг эзгу тилакларини билдириб, тадбирга якун ясадилар.
Мактабларда чет тилини ўрганишдан асосий мақсад – мактаб ўқувчилари ўртасида тилга бўлган қизиқишни орттириш ва чет тилида мулоқотни мактаб даврида шакллантиришдан иборат.
Умумтаълим мактабларда чет тили фани ойлиги доирасида ўтказилаётган бу каби тадбирлар эса ўқувчиларнинг билим доираси янада ошишига, нутқининг ривожланишига, уларнинг ўз истеъдод ва қобилиятларини юзага чиқаришларида муҳим восита бўлиб хизмат қилмоқда.
Қувонарлиси, ойлик доирасида бўлиб ўтаётган ҳар бир тадбирда ўқувчилар фаол иштирок этишмоқда. Мазкур тадбир ҳам ўқувчиларнинг хорижий тилларни ўрганишга қизиқишларини янада оширгани билан аҳамиятли бўлди.
Фотима Эшимбетова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
